ސަރުކާރު ހިންގާ ޕީއެންސީގެ ނައިބު ރައީސުން ހޮވަންޖެހޭނީ ސިއްރު ވޯޓަކުން ކަމަށް ބަޔާންކޮށް އިލެކްޝަންސް ކޮމިޝަންގައި ރަޖިސްޓްރީކޮށްފައި އޮތް އަސާސީ ގަވާއިދު މިއަދު ބަދަލުކޮށްފި އެވެ.
އިލެކްޝަންސް ކޮމިޝަންގައި ޕީއެންސީން ކުރިން ރަޖިސްޓްރީކޮށްފައި އޮތް އަސާސީ ގަވާއިދުގައި ނައިބުރައީސުން ހޮވަން ނަގަންޖެހޭ ވޯޓަކީ ސިއްރު ވޯޓެކެވެ. ނަމަވެސް ޕީއެންސީން މިހާރު އިލެކްޝަންސްގައި ރަޖިސްޓްރީކޮށްފައި އޮތް އަސާސީ ގަވާއިދުގައިވާ ގޮތުން ނައިބުރައީސުން އިންތިހާބު ކުރެވޭނީ ހާމަ ވޯޓެއް ނަގައިގެންނެވެ.
މިކަމާ ގުޅިގެން އިލެކްޝަންސްގެ ތަރުޖަމާނު ހަސަން ޒަކަރިއްޔާ އަދަދު އަށް ވިދާޅުވީ ޕީއެންސީގެ އަސާސީ ގަވާއިދަށް މިދިޔަ އަހަރު އިސްލާހު ގެނައުމަށްފަހު އީސީގެ އެންޑޯޒްމަންޓް ހޯދި ކަމަށާއި ވެބްސައިޓުގައި އަސާސީ ގަވާއިދު އިސްލާހުތަކާއެކު ޕަބްލިޝް ނުކުރެވި އޮތީ ކޮމިޝަންގެ މައްސަލައަކުން ކަމަށެވެ.
މިގޮތުން ޕީއެންސީން މިދިޔަ އަހަރު އަސާސީ ގަވާއިދަށް ގެނައި އިސްލާހުތަކާއެކު އަސާސީ ގަވާއިދު އީސީގެ ވެބްސައިޓަށް މިހާރު ލާފައިވާނެ ކަމަށް އޭނާ ވިދާޅުވި އެވެ.
ޕީއެންސީގެ ވެބްސައިޓުގައި އާންމުކޮށްފައިވާ އަސާސީ ގަވާއިދުގައި ބުނެފައި ވަނީ އެ ގަވާއިދަކީ، ޕާޓީގެ މަޝްވަރާ މަޖިލީހުން މެއި 15، 2025، ގައި އިސްލާހުކޮށްފައިވާ ގަވާއިދެއް ކަމަށެވެ. ނަމަވެސް މި ނޫހުން ބެލިއިރު، ޖެނުއަރީ، 2026، ގައި ވެސް އެ ބުނާ އިސްލާހު ކުރި ގަވާއިދު ވެބްސައިޓަކަށް ނުލަ އެވެ.
މެއި 15، 2025، ގައި ޕީއެންސީގެ ސެނެޓު ބައްދަލުވުމެއް ބާއްވައި ނައިބު ރައީސުންގެ މަގާމަށް ދެ ބޭފުޅަކު އައްޔަން ކުރި އެވެ. އެކަމަކު، އެ ދުވަހު ޕީއެންސީގެ މަޝްވަރާ މަޖިލީހުގެ ބައްދަލުވުމެއް ބާއްވައި އަސާސީ ގަވާއިދު އިސްލާހު ކުރިކަން ހާމަކޮށްފައެއް ނުވެ އެވެ.
ޕީއެންސީ އިން އިއްޔެ ނެރުނު ބަޔާނުގައި، ބުނެފައިވާ ގޮތުން ސިއްރު ނޫން ވޯޓެއް ނަގަން އެ ޕާޓީގެ އިންތިހާބު ވިލަރެސް ކުރާ ކޮމީޓީއިން ނިންމާފައެއް ނުވެ އެވެ. ނަމަވެސް އަދަދު އާ ވާހަކަ ދެއްކި ޕީއެންސީގެ ސީނިއާ ދެ އޮފިޝަލަކު ވަނީ، ސިއްރު ނޫން ވޯޓެއް ނަގަން އިންތިހާބު ވިލަރެސް ކުރާ ކޮމިޓީއިން ނިންމިކަން ޔަގީންކޮށްދީފަ އެވެ.
ޕީއެންސީގެ އަސާސީ ގަވާއިދުގައިވާ ގޮތުން ޕާޓީއަށް ހަ ނައިބު ރައީސަކު ހޮވަންޖެހެ އެވެ. އެ މަގާމަށް ކުރިމަތިލައްވާނެ ކަމަށް މިހާތަނަށް ހަތް މެންބަރަކު ވަނީ ހާމަ ކުރައްވާފަ އެވެ. އެއީ މެންބަރު އިބްރާހިމް ސުޖާއު އާއި މެންބަރު ފާތިމަތު ސައުދާ އާއި މެންބަރު އަސްމާ ރަޝީދާއި އޭނާގެ ދަރިކަލުން އަދި ސަރުކާރުގެ ތަރުޖަމާނު މުހައްމަދު ހުސެއިން ޝަރީފް އާއި އިގްތިސާދީ މިނިސްޓަރު މުހައްމަދު ސައީދު އާއި ފިޝަރީޒް މިނިސްޓަރު އަހުމަދު ޝިޔާމް އަދި ސްޕޯޓް މިނިސްޓަރު އަބްދުﷲ ރާފިއު އެވެ.
ޕީއެންސީގެ އަސާސީ ގަވާއިދުގައި ބުނެފައިވާ ގޮތުން އެ ޕާޓީގެ ވެރިކަމެއްގައި އެ ޕާޓީގެ އެންމެ އިސް ލީޑަރަކީ އަދި ރައީސްއަކީ ރައީސުލްޖުމްހޫރިއްޔާ އެވެ. ޕާޓީގެ ސިޔާސަތުތައް އެކުލަވާލުމާއި ޕާޓީ ހިންގުމުގެ އެންމެ އިސް ވެރިޔަކީ ވެސް ޕާޓީގެ ރައީސް އެވެ.
