ތަކެތީގެ އަގު އުފުލުމާއި ރައްޔިތުންނަށް ދިމަވާ އެހެނިހެން ދަތިތަކާ ގުޅިގެން އަޑު އުފުމަށް އިދިކޮޅު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން ވެރި ރަށް މާލޭގައި ކުރުމަށް ތައްޔާރުވަމުން އަންނަ މުޒާހަރާ އޯގަސްޓު 13 ވަނަ ދުވަހުގެ ރެއަށް ބަދަލުކޮށްފި އެވެ.
އެމްޑީޕީން މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން އެ ޕާޓީގެ ކުރީގެ ނައިބުރައީސް، މުހައްމަދު ޝިފާޒް (ޝިއްޕެ) ވިދާޅުވީ އޯގަސްޓު 12، 13 އަކީ އަނިޔާވެރި ޒަމާންވީ ވެރިކަމެއް ބަދަލުކުރެވިދާނެކަން ދިވެހިރައްޔިތުންނަށް ހާމަކޮށްދިން ތާރީހު ކަމަށެވެ.
އެގޮތުން މި އަހަރުގެ އޯގަސްޓު 12،13 އާ ކުރިމަތިލާއިރު، މިހާރު މި އޮތް ވެރިކަން ބަދަލުކުރުމުގެ ހާލަތު ޖެހިއްޖެ ކަމަށް އޭނާ ވިދާޅުވި އެވެ. އަދި، އެ މަގަށް ކަންކަން ގެންދިޔުމަށްޓަކައި އެމްޑީޕީގެ ހަރަކާތްތައް އިތުރުކުރަން ޖެހިއްޖެ ކަމަށް ވެސް އޭނާ ވިދާޅުވި އެވެ.
"ހާއްސަކޮށް [އޯގަސްޓު] 13 ވަނަ ދުވަސް އަޅުގަނޑުމެން މި ފާހަގަކުރަނީ އަލުން އަނބުރާ އަޅުގަނޑުމެން މިހާރު މި ރާއްޖެއަށް ދިމާވެފައި އޮތް ހާލަތު ބަދަލުކުރުމަށް ސަރުކާރަށް ޕްރެޝަރު ކުރުމަށްޓަކައި މުޒާހަރާކުރާ ދުވަހެއްގެ ގޮތުގައި އަޅުގަނޑުމެން އާންމު މެންބަރުންނާއި ރާއްޖޭގެ ރައްޔިތުންނަށް މި އިއުލާނުކުރަނީ،" ޝިއްޕެ ވިދާޅުވި އެވެ.
ރައީސް މުހައްމަދު މުއިއްޒުގެ ވެރިކަމުގައި ތަކެތީގެ އަގު ވަނީ ވަރަށް ބޮޑަށް އުފުލިފަ އެވެ. ސަރުކާރުން އާންމު ތަފާސްހިސާބުތަކަށް ބަލާއިރު، އަހަރެއްގެ ތެރޭގައި އަސާސީ ކާބޯތަކެތީގެ އަގު ވަނީ އަށް ޕަސެންޓު އުފުލިފަ އެވެ.
ސްޓެޓިސްޓިކްސް ބިއުރޯއިން ނެރޭ އެސެންޝަން ކޮމޮޑިޓީސް ޕްރައިސް އިންޑެކްސް އިން ދައްކާ ގޮތުގައި އަހަރެއްގެ ތެރޭގައި އެންމެ ބޮޑުވީ ގޭހާއި ތެލުންނެވެ. ކާބޯތަކެއްޗާއި ބެވެރޭޖާސް އާއި ރީތިވާ ސާމާނުގެ އަގުތައް ވެސް ވަނީ އުފުލިފަ އެވެ.
އޭގެ އިތުރުން، ޑޮލަރުގެ ހަރަދު މަދު ނުކުރުމާއި ޑޮލަރުން ލިބޭ އާމްދަނީ އެކަށީގެންވާ މިންވަރަކަށް އިތުރުނުވާތީ ޑޮލަރުގެ އަގު ވެސް ވަނީ ވަރަށް ބޮޑުތަން އުފުލިފަ އެވެ. މިވަގުތު ޑޮލަރެއް ގަންނަން ލިބެނި 21.70 ރުފިޔާއަށެވެ.
