ވެރިކަން ކުރާ ޕީޕަލްސް ނެޝަނަލް ކޮންގްރެސްގެ ނައިބު ރައީސުން އިންތިހާބު ކުރަން ހާމަ ވޯޓެއް ނަގަން އެ ޕާޓީ އިން ފާސް ކުރި ނަމަވެސް އިލެކްޝަންސް ކޮމިޝަނުގައި ރަޖިސްޓްރީކޮށްފައިވާ އެ ޕާޓީގެ އަސާސީ ގަވާއިދު ބުނާ ގޮތުން ނައިބު ރައީސުން ހޮވަންޖެހޭނީ ސިއްރު ވޯޓަކުން ކަން ހާމަވެއްޖެ އެވެ.
ޕީއެންސީ އިން އިއްޔެ ނެރުނު ބަޔާނެއްގައި ބުނީ އެ ޕާޓީ އިން އަމަލު ކުރަމުންދަނީ އިލެކްޝަންސް ކޮމިޝަނުގައި ރަޖިސްޓްރީކޮށްފައިވާ އެ ޕާޓީގެ އަސާސީ ގަވާއިދަށް ކަމަށެވެ. އެ ގަވާއިދުގައި ބުނާ ގޮތުން ނައިބު ރައީސުން ހޮވަން ނަގަންޖެހޭނީ ހާމަ ވޯޓެއް ކަމަށް ވެސް ޕީއެންސީ އިން ބުނެ އެވެ.
"ޕާޓީގެ އަސާސީ ގަވާއިދުގެ 69 ވަނަ މާއްދާގެ ހ. ގައި ބުނެފައި ވަނީ ޕާޓީގެ މަތީ މަޖިލީހުގެ ކަންކަން ފާސް ކުރުމަށް ވޯޓު ދޭނީ އަތް އުފުލައިގެން ކަމަށް. އަދި އެ މާއްދާގެ ށ. ގައި ބަޔާންކޮށްފައި ވަނީ ޕާޓީގެ މަތީ މަޖިލީހުގައި، ޕާޓީގެ މެންބަރުންގެ މަޖިލީހަށް މެންބަރުން އިންތިހާބު ކުރުމަށް ނެގޭނީ ހާމަ ވޯޓެއް ކަމަށް،" ޕީއެންސީގެ ބަޔާނުގައި ބުނެފައިވެ އެވެ.
ޕީއެންސީގެ ބަޔާނުގައި ބުނެފައިވާ ގޮތަށް، އެ ޕާޓީގެ ވެބްސައިޓުން ފެންނަ އަސާސީ ގަވާއިދުގައި ބުނެފައިވާ ގޮތުން ނައިބު ރައީސުން ހޮވުމަށްޓަކައި ނަގަންޖެހެނީ ހާމަ ވޯޓަކުންނެވެ. އެކަމަކު މި ނޫހުން މިއަދު ބެލިއިރު ވެސް، އިލެކްޝަންސް ކޮމިޝަނުގެ ވެބްސައިޓުން ފެންނަ، އެ ކޮމިޝަނުން އެންޑޯޒް ކޮށްފައި އޮތް ޕީއެންސީގެ އަސާސީ ގަވާއިދު ބުނާ ގޮތުން ނައިބު ރައީސުން ހޮވަން ނަގަންޖެހޭނީ ސިއްރު ވޯޓެކެވެ.
"ޕާޓީގެ މަތީ މަޖިލީހުގެ ކަންކަން ފާސް ކުރުމަށް ވޯޓު ދޭނީ އަތް އުފުލައިގެން. ޕާޓީގެ މަތީ މަޖިލީހުގައި މެންބަރުންގެ މަޖިލީހަށް މެންބަރުން އިންތިހާބު ކުރުމަށް ނެގޭނީ ސިއްރު ވޯޓެއް،" އީސީ އިން އެންޑޯޒްކޮށްފައިވާ ޕީއެންސީގެ އަސާސީ ގަވާއިދުގައި ބުނެފައިވެ އެވެ.
ޕީއެންސީގެ ވެބްސައިޓުގައި މިހާރު އާންމުކޮށްފައިވާ އަސާސީ ގަވާއިދުގައި ބުނެފައި ވަނީ އެ ގަވާއިދަކީ، ޕާޓީގެ މަޝްވަރާ މަޖިލީހުން މެއި 15، 2025، ގައި އިސްލާހުކޮށްފައިވާ ގަވާއިދެއް ކަމަށެވެ. ނަމަވެސް މި ނޫހުން ބެލިއިރު، ޖެނުއަރީ، 2026، ގައި ވެސް އެ ބުނާ އިސްލާހު ކުރި ގަވާއިދު ވެބްސައިޓަކަށް ނުލަ އެވެ.
މެއި 15، 2025، ގައި ޕީއެންސީގެ ސެނެޓު ބައްދަލުވުމެއް ބާއްވައި ނައިބު ރައީސުންގެ މަގާމަށް ދެ ބޭފުޅަކު އައްޔަން ކުރި އެވެ. އެކަމަކު، އެ ދުވަހު ޕީއެންސީގެ މަޝްވަރާ މަޖިލީހުގެ ބައްދަލުވުމެއް ބާއްވައި އަސާސީ ގަވާއިދު އިސްލާހު ކުރިކަން ހާމަކޮށްފައެއް ނުވެ އެވެ.
ޕީއެންސީ އިން އިއްޔެ ނެރުނު ބަޔާނުގައި، ބުނެފައިވާ ގޮތުން ސިއްރު ނޫން ވޯޓެއް ނަގަން އެ ޕާޓީގެ އިންތިހާބު ވިލަރެސް ކުރާ ކޮމީޓީއިން ނިންމާފައެއް ނުވެ އެވެ. ނަމަވެސް އަދަދު އާ ވާހަކަ ދެއްކި ޕީއެންސީގެ ސީނިއާ ދެ އޮފިޝަލަކު ވަނީ، ސިއްރު ނޫން ވޯޓެއް ނަގަން އިންތިހާބު ވިލަރެސް ކުރާ ކޮމިޓީއިން ނިންމިކަން ޔަގީންކޮށްދީފަ އެވެ.
"އަސާސީ ގަވާއިދުގައި އެހާ ސާފުކޮށް އޮތް ކަމެއް ވިއްޔާ ކީއްކުރަންތޯ ކޮމިޓީއިން ނިންމަންވީ ހާމަ ވޯޓެއް ނަގަން. އެކަމަކު ކޮމިޓީ އެގޮތަށް ނިންމި،" ނަން ހާމަނުކުރަން އެދި މި ނޫހާ ވާހަކަ ދެއްކި ޕީއެންސީގެ ސީނިއާ އޮފިޝަލަކު ވިދާޅުވި އެވެ.
ޕީއެންސީގެ އަސާސީ ގަވާއިދުގައިވާ ގޮތުން ޕާޓީއަށް ހަ ނައިބު ރައީސަކު ހޮވަންޖެހެ އެވެ. އެ މަގާމަށް ކުރިމަތިލައްވާނެ ކަމަށް މިހާތަނަށް ހަތް މެންބަރަކު ވަނީ ހާމަ ކުރައްވާފަ އެވެ. އެއީ މެންބަރު އިބްރާހިމް ސުޖާއު އާއި މެންބަރު ފާތިމަތު ސައުދާ އާއި މެންބަރު އަސްމާ ރަޝީދާއި އޭނާގެ ދަރިކަލުން އަދި ސަރުކާރުގެ ތަރުޖަމާނު މުހައްމަދު ހުސެއިން ޝަރީފް އާއި އިގްތިސާދީ މިނިސްޓަރު މުހައްމަދު ސައީދު އާއި ފިޝަރީޒް މިނިސްޓަރު އަހުމަދު ޝިޔާމް އަދި ސްޕޯޓް މިނިސްޓަރު އަބްދުﷲ ރާފިއު އެވެ.
ޕީއެންސީގެ އަސާސީ ގަވާއިދުގައި ބުނެފައިވާ ގޮތުން އެ ޕާޓީގެ ވެރިކަމެއްގައި އެ ޕާޓީގެ އެންމެ އިސް ލީޑަރަކީ އަދި ރައީސްއަކީ ރައީސުލްޖުމްހޫރިއްޔާ އެވެ. ޕާޓީގެ ސިޔާސަތުތައް އެކުލަވާލުމާއި ޕާޓީ ހިންގުމުގެ އެންމެ އިސް ވެރިޔަކީ ވެސް ޕާޓީގެ ރައީސް އެވެ.
