ލަންޑަން (ޖުލައި 29) - ތިރީސް ފަސް އަހަރުން މަތީގެ ޖޯޑަން ހެންޑަސަން އާއި ޑެނީ ވެލްބެކް އަށް ޗެލްސީން ދެ އަހަރުގެ ކޮންޓްރެކްޓެއް ދޭން ނިންމައިފި އެވެ.
މިއީ، ޗެލްސީ ހިންގުމާ މީގެ ހަތަރު އަހަރު ކުރިން، އެމެރިކާގެ މަހުޖަނު ޓޮޑް ބޯލީ އިސްވެ އުފެއްދި ކޮންސޯޓިއަމް ހަވާލުވި ފަހުން، އެ ޓީމުން ސޮއިކުރާ އެންމެ ދުވަސްވީ ދެ ކުޅުންތެރިންނެވެ.
ކުރިން ލިވަޕޫލްގެ ކެޕްޓަންކަން ކުރި ހެންޑަސަން، 36، ވަނީ އޭނާ އެންމެ ފަހުން ކުޅެމުން އައި އިނގިރޭސި ޕްރިމިއާ ލީގުގެ ބްރެންޓްފޯޑްގެ ކޮންޓްރެކްޓް ނިމުމަކަށް ގެނެސްފަ އެވެ. އަދި، އާސެނަލާއި މެންޗެސްޓާ ޔުނައިޓެޑަށް ކުރިން ކުޅުނު ވެލްބެކް، 35، ޗެލްސީ އަށް ބަދަލުވާއިރު، ޗެލްސީން އޭނާގެ ސޮއި ހޯދަން ބްރައިޓަން އަށް ފީ އެއް ދައްކާނެ ކަމަށް ރިޕޯޓްތައް ބުނެ އެވެ.
ވެލްބެކް އާއި ހެންޑަސަން ސޮއިކުރަން، ޗެލްސީގެ މެނޭޖްމަންޓުގައި އެދުނީ އެ ޓީމުގެ ކޯޗުކަމާ ހަވާލުވި، ބަޔާ ލެވަކޫސަނާއި ރެއާލް މެޑްރިޑްގެ ކުރީގެ ކޯޗު، ޒަބީ އަލޮންސޯ އެވެ. ވެލްބެކް އާއި ހެންޑަސަން ގެންނަަ އެންމެ ބޮޑު ސަބަބަކީ، ކުރިއަށް އޮތް ސީޒަނަކީ ޗެލްސީ އަށް ޔޫރަޕްގެ އެއްވެސް މުބާރާތެއްގެ ފުރުސަތު ނެތް އަހަރަކަށް ވުމުން، ޑޮމެސްޓިކް މުބާރާތްތަކުގައި ކުޅޭއިރު، ސްކޮޑަށް ތަޖުރިބާ ހުރި ކުޅުންތެރިން. އިތުރު ކުރުމުގެ ގޮތުންނެވެ.
އެ ގޮތުން، ހެންޑަސަން އާއި ވެލްބެކަށް ދެ އަހަރުގެ ކޮންޓްރެކްޓެއް ދިން ނަމަވެސް، ކުރިއަށް އޮތް ސީޒަނަށް ފަހު، އެ އެއްބަސްވުން ނިމުމަކަށް ގެނައުމުގެ އިހުތިޔާރު ދެ ފަރާތަށް ވެސް އޮންނާނެ އެވެ.
ސަންޑަލެންޑުން ކެރިއަރު ފެށި ހެންޑަސަން ވަނީ ލިވަޕޫލަށް ކުޅުމުގެ އިތުރުން، ބްރެންޓްފޯޑާ ގުޅުމުގެ ކުރިން ސައުދީ ޕްރޯ ލީގުގެ އަލް އިއްތިފާގާއި ނެދަލެންޑްސްގެ އަޔަކްސް އަށް ކުޅެފަ އެވެ. އަދި، ވެލްބެކް ވަނީ ޔުނައިޓެޑާއި އާސެނަލް އަދި ބްރައިޓަންގެ އިތުރުން ޕްރިމިއާ ލީގުގައި ސަންޑަލެންޑާއި ވަޓްފޯޑަށް ވެސް ކުޅެފަ އެވެ. މިދިޔަ ސީޒަނުގައި ވެލްބެކް ވަނީ ޕްރިމިއާ ލިގުގައި 13 ގޯލު ޖަހައިފަ އެވެ.
މި ފަހަރުގެ ޓްރާންސްފާގައި ޗެލްސީން ގެނައި ކުޅުންތެރިންނަށް ބަލާއިރު، ކަޒަކްސްތާންގެ ފޯވާޑް ޑަސްޓާސް ސަޓްޕައޭވް، ބްރެޒިލްގެ ވާތުބެކް ޑެނެއާ، ނެދަލެންޑްސްގެ ފޯވާޑް އެމަނުއެލް އެމެގާ، ޕޯޗުގަލްގެ ވިންގް ޖިއޮވާނީ ކުއެންޑާ، އިޓަލީގެ ވާތުބެކް މާކޯ ޕަލެސްޓްރާ އަދި އެސްޓަން ވިލާގެ މިޑްފީލްޑަރު މޯގަން ރޮޖާސް ހިމެނެ އެވެ.
