ގައްޒާ، ފަލަސްތިން (އޮގަސްޓް 4) - ފީފާ ވޯލްޑް ކަޕް ހިމެނޭހެން އެ ފެޑެރޭޝަންގެ މުބާރާތްތަކުގެ ހިއްސާ އަމިއްލަ ކުންފުނިތަކަށް ވިއްކާލަން އުޅުމުގެ މާ ކުރިން، ފީފާގެ ލީޑަޝިޕްގެ އިތުބާރު ގެއްލިފައިވާ ކަމަށާއި، އިޒްރޭލާ މެދު ފިޔަވަޅު އަޅަން ފަސްޖެހުނު ހިސާބުން ފީފާ ފެއިލްވެފައިވާ ކަމަށް ފަލަސްތީންގެ ފުޓްބޯޅަ އެސޯސިއޭޝަނުން ބުނެފި އެވެ.
ތިން ވަނަ ދައުރަކަށް ފީފާގެ ރައީސްކަން ކުރައްވަމުން އަންނަ އިންފަންޓީނޯ އަށް މަގާމުގައި ދެމިހުރުމަށްޓަކައި ދަތިތަކެއް ވަނީ ކުރިމަތިވެފަ އެވެ. އެއީ، ފީފާ ފޯވާޑް އެންޓަޕްރައިސް (އެފްއެފްއީ)ގެ ނަމުގައި، ޕްރައިވެޓް އިންވެސްޓަރުންނަށް ފީފާ ވޯލްޑް ކަޕް ހިމެނޭހެން، ފީފާ މުބާރާތްތަކުގެ، 21 ޕަސެންޓް ހިއްސާ ވިއްކާލަން އުޅުނު ޑީލުގެ ސަބަބުންނެވެ. އެމެރިކާގެ ރައީސް ޑޮނާލްޑް ޓްރަމްޕްގެ ހިއްސާ އޮތް ތުރައިވް އެޓާނަލް އަށް ވޯލްޑް ކަޕްގެ ހިއްސާ ހިމެނޭ މި ޑީލް ދިނުން ހުއްޓުވީ، ޔޫރަޕްގެ މައި ފުޓްބޯޅަ އިދާރާ، ޔުއެފާގެ އިސް ނެގުމާ އެކު، އެ އަށް އުތުރު/ސެންޓްރަލް އެމެރިކާގެ ފުޓްބޯޅަ އިދާރާ ކޮންކަކަފް އަދި އޭޝިއާގެ ފުޓްބޯޅަ އިދާރާ، އޭއެފްސީން ބާރު އަޅައިގެންނެވެ.
ޔުއެފާ އިން މިހާރު އަންނަނީ އިންފަންޓީނޯ މަގާމުން ދުރުކުރުމަށްޓަކައި މަސައްކަތް ކުރަމުންނެވެ. އަދި، އެފްއެފްއީގެ ތަހުގީގެއް ކުރުމަށްޓަކައި ވެސް ޔުއެފާ އިން އިސްނަގާފައިވާއިރު، މި ހުރިހާ ކަމެއްގެ މައިގަނޑު ބޭނުމަކަށް އޮތީ، އަންނަ އަހަރުގެ މާޗް މަހުގައި އޮތް ފީފާގެ އިންތިހާބުގައި، އިންފަންޓީނޯ ނޫން ފަރާތަކަށް ފީފާގެ ރައީސްކަން ދިނުމަށެވެ.
ފީފާގެ ލީޑަޝިޕަށް މިހާރު ދިމާވެފައި އޮތް ހާލަތާ ގުޅޭގޮތުން، ފަލަސްތީން އެފްއޭ އިން ވަނީ ބަޔާނެއް ނެރެފަ އެވެ.
ފަލަސްތީން އެފްއޭގެ ބަޔާނުގައި ބުނެފައިވަނީ، ފީފާ އިން މާލީ ގޮތުން ކުރަމުން އަންނަ ކަންތައްތަކާ ގުޅޭގޮތުން، ކަންބޮޑުވުން ފާޅުކޮށް ގައުމުތަކުން ފާހަގަކުރަމުން އަންނަނީ ހައްގު އަދާކުރުމުގެ ގޮތުން ކުރަން ޖެހޭ ކަންކަން ކަމަށެެވެ. އެކަމަކު، އަބަދުވެސް ފަލަސްތީނުން ދައްކަން ޖެހިފައި އޮތީ އެއް ވާހަކައެއް ކަމަށް އެ ބަޔާނުގައި ބުނެފައިވެ އެވެ.
"ފީފާގެ ކިބަޔަކު ނެތް އެ މީހުންނަށް ލިބިފައި އޮތް ގާނޫނީ ބާރުގެ ބޭނުންކޮށްގެން ސިޔާސީ ކަމެއްގައި ނުޖެހި އެންމެންނަށް ހައްގު ހޯދައިދިނުމުގެ ހިތްވަރެއް. އަހަރެމެންގެ ކަންބޮޑުވުން އޮތީ ފީފާ ލީޑުކުރަނީ ކާކުތޯ އެއް ނޫން. އަަހަރެމެން ބޭނުމީ ލިބެންޖެހޭ އިންސާފު ނުލިބުން،" ބަޔާނުގައި ލިޔެފައިވެ އެވެ.
ފީފާ އަށް މިހާރު އައި ލީޑަޝިޕް 2016 ވަނަ އަހަރު އައި ފަހުން، ދެ ފަހަރެއްގެ މަތިން، ފަލަސްތީންގެ ހައްގު ހޯދައިދީ، އިޒްރޭލަށް ފިޔަވަޅު އަޅަން ގޮވާލި ނަމަވެސް އެ އަށް އެކަށީގެންވާ އިޖާބައެއް ނުލިބުނުކަން ބަޔާނުގައި ވަނީ ފާހަގަކޮށްފަ އެވެ. ފީފާ އިން ކަންކަން ކުރަމުން އަންނަ އެކި މަރުހަލާތައް ވިސްނޭ ކަމަށާއި އެކަމަކު އިންސާފުގެ މަގުން ކަންކަން ނުހިނގާ ކަމަށް ފަލަސްތީން އެފްއޭ އިން ވަނީ ބުނެފަ އެވެ.
"އިޒްރޭލުން ގައްޒާ އަށް އަރައި ލާއިންސާނީ ހަނގުރާމަ ފަށައިގެން ކުރިއަށް އެ ގެންދަނީ، އަހަރެމެންގެ ފުޓްބޯޅަ އާއިލާ އަށް ވެސް ފޫނުބެއްދޭނެ ގެއްލުންތަކެއް ވެއްޖެ. 1013 ފުޓްބޯޅަ ކުޅުންތެރިން، ކޯޗުން،ރެފްރީން، އޮފިޝަލުން ނޫނީ ފުޓްބޯޅަ އާއިލާގެ މީހުން މަރާލައިފި، ފުޓްބޯޅަ ކުޅޭނެ ހުރިހާ އިންފްރާސްޓްރަކްޗާއެއް ހެން ހަލާކުކޮށްލައިފި. ފަލަސްތީންގެ ފުޓްބޯޅައިގެ ޖީލެއް ނުރައްކަލުގެ ތެރޭގައި އެ ތިބީ. އަހަރެމެންގެ ޑޮމެސްޓިކް މުބާރާތްތައް ހުއްޓިއްޖެ، އަމިއްލަ ގައުމުގައި ކުޅުމުގެ ނަސީބު ފީފާގެ މެމްބަރު 210 ގައުމަށް އޮތް ކަމަށް ވިޔަސް އަހަރެމެންނަށް ނެތް،" ފަލަސްތީން އެފްއޭގެ ބަޔާނުގައިވެ އެވެ.
"މި ހުރިހާ ކަމަކަށް ބަލާއިރު، ފީފާ އޮތީ މާ ކުރިން ފެއިލްވެފައި،"
ކެނަޑާގެ ވެންކޫވާގައި އޭޕްރިލް މަހު ކުރިއަށްދިޔަ ފީފާގެ 67 ވަނަ ކޮންގްރެސްގެ ތެރެއިން، ފަލަސްތީނާއި އިޒްރޭލުގެ އޮފިޝަލުންގެ މެދުގައި ސަލާމްކުރާ ފޮޓޯއެއް ނެގުމަށްޓަކައި، ފީފާގެ ރައީސް އިންްފަންޓީނޯ ކުރެއްވި މަަސައްކަތް ނާކާމިޔާބުވެ، ގިނަ ބަޔެއްގެ ފާޑުކިޔުންތަކާ ކުރިމަތިލާން ޖެހުނެވެ.
ފީފާގެ ކޮންގްރެސްގެ ތެރެއިން، ޑެލިގޭޓުންނަށް ޕޯޑިއަމްގައި ވާހަކަ ދެއްކުމުގެ ފުރުސަތު ދެމުން ދިޔައިރު، ފަލަސްތީން އެފްއޭގެ ރައީސް ޖިބްރީލް ރަޖޫބް ވާހަކަ ދެއްކެވީ، އިޒްރޭލް ތަމްސީލްކުރަން އައިސް ހުންނެވި، އިޒްރޭލް އެފްއޭގެ ނައިބު ރައީސް ބަސިމް ޝެއިހް ސުލިމަން އަށް ވުރެން ކުރިންނެވެ. ޖިބްރީލް ވާހަކަ ދެއްކެވި ފަހުން، އިންފަންޓީނޯ ތެދުވެވަޑައިގެން، ޖިބްރީލް އާއި ސުލިމަން، ސަލާމްކުރުމަށް މަސައްކަތްކުރައްވައި، އެ ފޮޓޯ ނެގުމަށް ބާރުއެޅުއްވި ނަމަވެސް، އެކަން ކާމިޔާބެއްނުވި އެވެ. އެ ފޮޓޯ ނެގުމުގެ އެއްވެސް ޝައުގުވެރިކަމެއް ނެތް ކަމަށް ޖިބްރީލް، އަޑުހަރުކޮށް ވިދާޅުވެފައިވެ އެވެ.
އިންފަންޓީނޯ، ބޭނުންވި ފޮޓޯގަނޑު ލިބޭގޮތް ނުވެ، ޖިބްރީލް އާއި ސުލިމަން، ސްޓޭޖުން ދިއުމާ އެކު، އިންފަންޓީނޯ ވިދާޅުވީ، އުންމީދަކީ، ފަލަސްތީނާއި އިޒްރޭލުގެ ކުޑަކުދިންގެ ހައްގުގައި ދެ ގައުމުން އެކުގައި މަސައްކަތް ކުރުން ކަމަށެވެ.
ކޮންގްރެސް އަށް ފަހު، ޖިބްރީލް ވަނީ ހިނގައިދިޔަ ކަންތައްތަކާއި އޭނާ ދެކޭ ގޮތްތައް ހިއްސާކުރައްވައިފަ އެވެ.
"އަހަރެން އަބަދުވެސް ފީފާގެ ގަވާއިދުތަކާއި އޮންނަ ހުދޫދުތަކުގެ ތެެރެއިން ކަންކަމަށް ބޯލަނބާނަން. އެކަމަކު، ހަގީގަތް ގަބޫލުުކުރަން ޖެހޭ. އިޒްރޭލަށް ހަގީގަތުގައި އޮންނަން ޖެހޭނީ ފިޔަވަޅު އަޅާފައި. ފީފާ އިން އިންސާނީ ހައްގުތައް ކަށަވަރުކުރަން ކުރާ މަސައްކަތާ ހިލާފަށް އިޒްރޭލުން އެ ދަނީ ތަކުރާރުކޮށް އަމަލުކުރަމުން،" ޖިބްރީލް ވިދާޅުވި އެވެ.
