ކުއަލަ ލަމްޕޫރު، މެލޭޝިއާ (ޖުލައި 31) - އަމިއްލަ އިންވެސްޓަރުންނަށް ފީފާގެ މުބާރާތްތަކުގެ ކޮންޓްރޯލް ލިބޭ ގޮތަށް ފަށަން ފީފާ އިން މަސައްކަތް ކުރަމުން އަންނަ، ފީފާ ފޯވާޑް އެންޓަޕްރައިސް (އެފްއެފްއީ)އާ ދެކޮޅަށް އޭޝިއާގެ މައި ފުޓްބޯޅަ އިދާރާ، އޭޝިއަން ފުޓްބޯލް ކޮންފެޑެރޭޝަން (އޭއެފްސީ) އިން ވެސް ތެދުވެއްޖެ އެވެ.
އެފްއެފްއީގެ ކަންކަން ކުރިއަށް ހިނގައިގަތުމަށްޓަކައި، ދުނިޔޭގެ މައި ފުޓްބޯޅަ އިދާރާ ފީފާގެ މެމްބަރު 211 ގައުމުގެ ވޯޓާ އެކު ފާސްކުރަން ޖެހެ އެެވެ. އަދި، އެ ގޮތަށް ފާސްވެއްޖެނަމަ، ފީފާގެ ދަށުން ހިންގާ ހުރިހާ މުބާރާތެއް، ވޯލްޑް ކަޕް ހިމެނޭހެން، ކުރިއަށްގެންދިއުމުގައި މާލީ ނަފާ ހޯދުމުގެ ފުރުސަތު އެފްއެފްއީއާ އެކު އަންނަ އިންވެސްޓަރުންނަށް ލިބޭނެ އެވެ.
ޖުމްލަ އެކު، 20 ބިލިއަން ޑޮލަރުގެ އެފްއެފްއީ އިންވެސްޓްމަންޓް ޕްލޭނަކީ، އިންފަންޓީނޯ އާއި ޓްރަމްޕްގެ ބައިވެރިވުން އޮތް ކަމެއް ކަމަށް ފުޓްބޯޅައިގެ ތަޖުރިބާކާރުން ތުހުމަތުކުރެ އެވެ. އެއީ، ފީފާގެ ވިސްނުން ހުރީ، އެފްއެފްއީގެ މައިގަނޑު ހިއްސާދާރެއްގެ ގޮތުގައި، ޓްރަމްޕާ ގުޅުން އޮތް ކުންފުންޏެއް ކަމަށްވާ ތުރައިވް އެޓާނަލް އަށް ދޭ ގޮތަށެވެ. މިއީ، އިންފަންޓީނޯ އަށް ވެސް ކޮންމެ މަހަކު، އެތައް މިލިއަން ޑޮލަރު ފައިދާއެއް ވާނެ ޑީލެއް ކަމަށް ރިޕޯޓްތައް ބުނެ އެވެ.
ޔޫރަޕެކޭ އެއްގޮތަށް އުތުރު އެމެރިކާ އިން ވެސް ފީފާގެ ޕްލޭނަށް ނޫނެކޭ ބުނެފި
ފީފާގެ މުބާރާތްތައް ޕްރައިވަޓައިޒްކޮށް ކޮމާޝަލްކުރުމަށް ހުށަހަޅާފައިވާ 20 ބިލިއަން ޑޮލަރުގެ ޕްލޭނާ ދެކޮޅަށް ޔޫރަޕްގެ އިތުރުން އުތުރު އެމެރިކާގެ ފުޓްބޯޅަ އިދާރާ (ކޮންކަކަފް) އިން ވެސް ތެދުވެއްޖެ. މި ޕްލޭނަކީ ދެފުށް ފެންނަ ހަރުދަނާ އުސޫލެއް ނެތް ކަމެއް ކަމަށް ޔޫރަޕާއި ކޮންކަކަފްގެ ގައުމުތަކުން ވަނީ ބުނެފައި.
ފީފާގެ މި ޕްލޭނާ ދެކޮޅަށް އެންމެ ފުރަތަމަ ނުކުތް ޔޫރަޕްގެ މައި ފުޓްބޯޅަ އިދާރާ، ޔުއެފާ އިން ވަނީ، މިހާރު އޮތްގޮތަށް ކަންކަން ކުރިއަށްގޮސްފިނަމަ، ޔޫރަޕުން ފީފާ ވޯލްޑް ކަޕް ހިމެނޭހެން އެ އިދާރާ އިން ބާއްވާ ހުރިހާ މުބާރާތެއް ބޮއިކޮޓްކުރާނެ ކަމަށް ބުނެފަ އެވެ. ޔުއެފާގެ މި ނިންމުމަށް ފަހު، 41 ގައުމު ހިމެނޭ ކޮންކަކަފް އިން ވެސް ވަނީ ބައްދަލުވުމެއް ބާއްވައިފަ އެވެ. ކޮންކަކަފްގައި ހިމެނެނީ ނޯތު އާއި ސެންޓްރަލް އެމެރިކާގެ އިތުުރުން ކެރީބިއަން ފުޓްބޯލް އެސޯސިއޭޝަން އެވެ. ކޮންކަކަފްގެ ބައްދަލުވުމުގައި ނިންމާފައިވަނީ، ފީފާގެ މި ޕްލޭންގައި ދެފުށްފެންނަ ނިޒާމެއް ނެތްއިރު، ކަންކަން ދަނީ އޮންނަން ޖެހޭ ހަރުދަނާ އުސޫލުގެ ތެރެއިން ނޫން ކަމަށް ވާތީވެ، މި ޕްލޭނަށް ތާއީދުކުރެވެން ނެތް ކަމަށެެވެ.
ޔުއެފާ އާއި ކޮންކަކަފްގެ ނިންމުމަށް ފަހު، ތިން ވަނަ ފެޑެރޭޝަނަކަށް ގޮތް ނިންމާފައި މި ވަނީ އޭއެފްސީންނެވެ. އޭއެފްސީން ނެރުނު ބަޔާނެއްގައި ބުނެފައިވަނީ، އެފްއެފްއީގެ މި ޕްރޮޕޯސަލާ ދެކޮޅަށް ޔުއެފާ އާއި ކޮންކަކަފްގެ ނިންމުމަށް އޭއެފްސީން ތާއީދުކޮށް، އެ ދެ ފެޑެރޭޝަނާ އެކު ސާބިތުވެ ހުރި ކަމަށެވެ.
"ހާލަތު މިހާ ސީރިއަސްވެ، ފީފާ ވޯލްޑް ކަޕް ބޮއިކޮޓް ކުރާ ހިސާބަަށް ދިއުމަކީ އާންމުންގެ މެދުގައި ވެސް މިކަމަށް ވަރަށް ބޮޑު ސަމާލުކަމެއް ހުއްޓޭނެ ކަމެއް. ފުޓްބޯޅައިގެ މުސްތަގުބަލަށްޓަކައި ބިރު ހީވެ، އެންމެން ވެސް ފުން ނަޒަރަކުން ވިސްނަން ފަށާ ފަދަ ހާލަތަކަށް ކަންކަން ގެންދިއުން ރަނގަޅެއް ނޫން،" ޖުމްލަ އެކު 46 ގައުމު ތަމްސީލް ކުރާ އޭއެފްސީގެ ބަޔާނުގައިވެ އެވެ.
ފީފާ އިން ތައާރަފްކުރާ އެފްއެފްއީ ޕްރޮޕޯސަލް ފާސްކުރުމަށްޓަކައި، ފީފާއާ އެއްކޮޅަށް ވޯޓު ދޭ ކޮންމެ މެމްބަރު އެސޯސިއޭޝަނަކަށް، މުޅި އަހަރަށް ބަހާލައިގެން 40 މިލިއަން ޑޮލަރު ދޭން ވެސް ފީފާގެ ޕްލޭނުގައިވެ އެވެ. ފީފާގެ މި ހުށަހެޅުމަށް ވަކި ގޮތެއް ނިންމަން ކޮންމެ މެމްބަރު ގައުމަަކަށް ސެޕްޓެމްބަރު 19 ގެ ނިޔަލަށް މުއްދަތެއް ފީފާ އިން ވަނީ ކަނޑައަޅައިފަ އެވެ.
ކޮންކަކަފް އާއި ޔުއެފާ އިން ޕްލޭނާ ދެކޮޅަށް ނުކުތުމާ އެކު، ފީފާ އިން މިއަދު ނެރުނު ބަޔާނެއްގައި ބުނެފައިވަނީ، އެފްއެފްއީގެ ކަންކަން ބައެއް މީޑިއާ ރިޕޯޓްތަކުން އޮޅުވާލަމުން އަންނަ ކަމަށާއި ވޯލްޑް ކަޕް ވިއްކާލަން ފީފާ އިން ނޫޅޭ ކަމަށެވެ. އަދި، ކޮންމެ ފެޑެރޭޝަނަކީ ވެސް ފީފާގެ ވަކި ސަހުސެއް ކަމަށާއި އެ ގޮތުން، ފެޑެރޭޝަނުން ގައުމުތައް ތަމްސީލްކުރާ ގޮތަށް، އެފްއެފްއީގެ ކަންކަމުގައި ބަސްނުބުނެވޭނެ ކަމަށެވެ. އެ ގޮތުން، އެފްއެފްއީއާ މެދު ވަކިން މެމްބަރު އެސޯސިއޭޝަނަށް ގޮތް ނިންމުމުގެ އިހުތިޔާރު އޮންނާނެ ކަމަށް ފީފާގެ ބަޔާނުގައި ވަނީ ބުނެފަ އެވެ.
