މި ފަަހަރުގެ ފުޓްބޯޅަ ސީޒަންގެ ފުރަތަމަ މުބާރާތް، ކަޕް ވިނާސް ކަޕްގައި އޮޑި ސްޕޯޓްސް ކްލަބް އަތުން 2-1 އިން މޮޅުވެ، މާޒިޔާ ސްޕޯޓްސް އެންޑް ރެެކްރިއޭޝަނުން ފެށުން ރަނގަޅުކޮށްފި އެވެ.
އަށާރަ އަހަރަށް ފަހު، ރާއްޖޭގެ ފުޓްބޯޅަ ސީޒަނުގައި ކަޕް ވިނާސް ކަޕް ހިމަނައިގެން ފުރަތަމަ ފަހަރަށް ކުޅޭއިރު، މުބާރާތުގައި މިއަދު ހަވީރު ކުޅުނު މެޗުން ނިއު ރޭޑިއަންޓް ސްޕޯޓްސް ކްލަބުން ވަނީ 5-0 އިން ބުރު ސްޕޯޓްސް ކްލަބް އަތުން މޮޅުވެފަ އެވެ.
މި ފަހަރުގެ ސީޒަން ފަށަން ކުޅުނު ޗެރިޓީ ޝީލްޑް މެޗުން މާޒިޔާ އިން ވަނީ ޕެނަލްޓީ ޖަހައިގެން ނިއު ބަލިކޮށް، ހަތް ވަނަ ފަހަރަށް ޝީލްޑް އުފުލައިލައިފަ އެވެ. އެ މެޗަށް މާޒިޔާ އިން ނުކުތީ އެސިސްޓަންޓް ކޯޗުން ކަމަށްވާ އަހުމަދު ސުޒެއިރު (ކޮއްކޮ) އާއި އިބްރާހިމް ސައީދު (ކަކާ)ގެ ބެލުމުގެ ދަށުންނެވެ. އެހެން ނަމަވެސް، މިރޭގެ މެޗުގައި މާޒިޔާ އިން ކުޅުނީ އެ ޓީމާ ގުޅުނު ޗެކް ރިޕަބްލިކްގެ ކޯޗު، ތޯމްސް ޓްރޫޗާގެ ބެލުމުގެ ދަށުންނެވެ. މި ސީޒަނުގައި އޮޑިއާ ހަވާލުވާ ޕޯޗުގަލްގެ ކޯޗު، ޕްރާޓާ ރުއީ ޕެޑްރޯ އަދި ޓީމާ ނުގުޅެ އެވެ.
ގަލޮޅު ދަނޑުގައި މިރޭ ކުޅުނު މެޗުގެ 18 ވަނަ މިނިޓްގައި މާޒިޔާ އިން ކައުންޓަ އެޓޭކުގައި ލީޑުނެގި އެވެ. މިއީ، މާޒިޔާގެ އަހުމަދު އައިހަމް (ފަތޯ) އަރިމަތިން ގޮސް، އޭރިއާތެރެއަށް ދުވެފައި އެރި ނައްސާމް އިބްރާހިމް ނާސިރު އަށް ދިން ބޯޅައަކުން އޭނާ ގޯލުގެ ދުރު ކަނަށް އަމާޒުކޮށްލައިގެން ޖެހި ގޯލެކެވެ.
މާޒިޔާ އަށް ލީޑުގައި އޮވެވުނީ 10 މިނިޓެވެ. އޮޑިން ވަނީ މެޗުގެ 28 ވަނަ މިނިޓްގައި ލަނޑު ޖަހައި އެއްވަރުކޮށްފަ އެވެ. މި ލަނޑު ޖެހީ މުޒްދާން ހަސަން އެވެ. މިއީ، އޮޑީގެ އަހުޒަމް ރަޝީދު (އަހު) ނަގައިދިން ހުރަަހަކުން މުޒްދާން ބޮލުން ޖެހި ގޯލެކެވެ. މުޒްދާން ފޮނުވާލި ބޯޅަ ގޯލުގެ ދުރު ކަނަށް އަމާޒުވީ މާޒިޔާގެ ކީޕަރު، ހުސެއިން ޝަރީފް (ހުސެން) އަތްމަތިން ގޮހެވެ.
މެޗުން މާޒިޔާ މޮޅުވި ގޯލު ޖެހިީ ދެ ވަނަ ހާފުގަ އެވެ. ފަތޯ، މި ލަނޑު ޖެހީ މެޗުގެ ފުރިހަމަ ވަގުތު ހަމަވާން 12 މިނިޓަށް ވެފައި ހުއްޓަ އެވެ. އޭރިއާބޭރުން ފަތޯ އަށް ލިބުނު ބޯޅަ ކޮންޓްރޯލް ކުރުމަށް ފަހު ވަނީ ގޯލުގެ ދުރު ކަނަށް ފޮނުވާލައިފަ އެވެ. އެ ބޯޅަ ހުއްޓުވަން އޮޑީގެ ގޯލުގައި ހުރި ކީޕަރު، މުހައްމަދު އަޝްވާން އަށް މާ ބޮޑު ކަމެއް ނުކުރެވުނެވެ.
ރާއްޖޭގެ ފުޓްބޯޅައިގައި ކުރިން ފޯރިގަދަކޮށް ކުރިއަށްގެންދިޔަ އެއް މުބާރާތް ކަމަށްވާ ކަޕް ވިނާސް ކަޕް، އެންމެ ފުރަތަމަ ބޭއްވީ މީގެ 31 އަހަރު ކުރިން، 1995 ވަނަ އަހަރު އެވެ. ކަޕް ވިނާސް ކަޕްގެ 11 މުބާރާތް ބޭއްވުމަށް ފަހު، 2009 އިން ފެށިގެން އެ މުބާރާތް ކުޅެފައިނުވެ އެވެ. އެންމެ ފަހުން، 2008 ވަނަ އަހަރު ބޭއްވި ކަޕް ވިނާސް ކަޕްގެ ޗެމްޕިއަންކަން ހޯދި ނިއު ރޭޑިއަަންޓް ސްޕޯޓްސް ކްލަބުންނެވެ.
ބުރާސްފަތި ދުވަހު ހަވީރު ކުޅޭ މެޗުގައި، މާޒިޔާ އިން ކުޅޭނީ ބުރުއާ އެވެ. އަދި، އެ ރޭ ކުޅޭ މެޗުގައި ނިއު އިން އޮޑިއާ ބައްދަލުކުރާނެ އެވެ.
