ފާއިތުވި ފަސް ސީޒަނުގައި ވެސް ރާއްޖޭގެ ލީގު ޗެމްޕިއަންކަން ހޯދި، މާޒިޔާ ސްޕޯޓްސް އެންޑް ރެކްރިއޭޝަންގެ. ކޯޗަކަށް ޔުއެފާ ޕްރޯ ލައިސަންސް ހާސިލްކޮށްފައިވާ ޗެކް ރިޕަބްލިކްގެ ތޯމަސް ޓްރުޗާ ހަމަޖައްސައިފި އެވެ.
އުމުރުން 54 އަހަރުގެ ޓްރުޗާ ވަނީ މީގެ ކުރިން، މެލޭޝިއާ އާއި އިންޑޮނޭޝިއާ ލީގުގައި މަސައްކަތްކޮށްފަ އެވެ. މާޒިޔާ އަކީ ދެކުނު އޭޝިއާގެ ގަައުމުތަކުން އޭނާ ކޯޗުކޮށްދޭ ފުރަތަމަ ޓީމެވެ. މީގެ ކުރިން، ޓްރުޗާ ވަނީ އިންޑޮނޭޝިއާގެ ޕީއެސްއެމް މަކަސާ އަދި މެލޭޝިއާގެ ޕެނަން އާއި ކެލަންޓަން ޔުނައިޓެޑަށް ކޯޗުކޮށްދީފަ އެވެ.
ދެ ފަހަރެއްގެ މަތިން ކެންޏާގެ އޭފްސީ ލެޕާސް އަށް ކޯޗުކޮށްދިން ޓްރުޗާ ވަނީ ބޮޓްސްވާނާގެ ޓައުންޝިޕް ރޯލާސް އާއި އޮރާޕާ ޔުނައިޓެޑަށް ވެސް އިރުޝާދުދީފަ އެވެ. ދެކުނު އެފްރިކާގެ އެފްސީ ކޭޕް ޓައުންގެ ޔޫތު ޓީމަށް ކޯޗުކޮށްދިން ޓްރުޗާ ވަނީ، ޗެކް ރިޕަބްލިކްގެ މަޝްހޫރު ކްލަބް، ވިކްޓޯރިއާ ޕްލްޒެންގެ އެސިސްޓަންޓް ކޯޗަކަށް ވެސް މަސައްކަތްކޮށްފަ އެވެ.
މި ސީޒަނުގައި މާޒިޔާ އިން ކުޅުނު ފުރަތަމަ މެޗުގައި ނުކުތީ އެސިސްޓަންޓް ކޯޗުން ކަމަށްވާ އަހުމަދު ސުޒޭރު (ކޮއްކޮ) އާއި އިބްރާހިމް ސައީދު (ކަކާ)ގެ އިރުޝާދުގެ ދަށުންނެވެ. ޕެނަލްޓީ ޖަހައިގެން، ނިއު ރޭޑިއަަންޓް ބަލިކޮށް މާޒިޔާ އިން ވަނީ ހަތް ވަަނަ ފަހަރަށް ޗެރިޓީ ޝީލްޑް ކާމިޔާބުކޮށްފަ އެެވެ.
ޓްރުޗާ އަކީ މާޒިޔާ އަށް އިރުޝާދުދޭ އަށް ބިދޭސީ ކޯޗެވެ. މިދިޔަ ސީޒަނުގައި މާޒިޔާ އިން ކުޅެފައިވަނީ، ސްޕެއިނުގެ ލުއިސްމާ ހެނާންޑޭޒްގެ އިރުޝާދުގެ ދަށުންނެވެ. ދެން، މާޒިޔާ އަށް ކޯޗުކޮށްދިން ބިދޭސީ ކޯޗުންނަކީ، ސާބިއާގެ ޑްރަގަން ޑުކަނޯވިޗް، މެސެޑޯނިއާގެ މަރުޖާން ސެކުލޮސްކީ، ސާބިއާގެ މިއޮޑްރަގް ޖެސިކް އާއި ރިސްޓޯ ވިޑަކޮވިޗްގެ އިތުރުން ބަލްގޭރިއާގެ އިވާން ކޮލޭވް އާއި ބޮސްނިއާގެ މިލޮމީރް ސެސްލިޖާ (މިލޯ) އެވެ.
ޓްރުޗާގެ ކޯޗުކަމުގައި މާޒިޔާ އިން ކުޅޭ ފުރަތަމަ މެޗަކަށްވާނީ، 18 އަހަރަށް ފަހު ރާއްޖޭގެ ފުޓްބޯޅަ ކަލަންޑަރަށް އެނބުރި އައި ކަޕް ވިނާސް ކަޕްގައި، މާޒިޔާ އިން މިރޭ އޮޑި ސްޕޯޓްސް ކްލަބާ ބައްދަލުކުރާ މެޗެވެ.
މާޒިޔާ އިން މި މަހު 11 ވަނަ ދުވަހު، އޭއެފްސީ ޗެލެންޖް ލީގުގެ ކޮލިފައިންގައި ކުޅެން ޖެހޭ މެޗުގައި، ބައްދަލުކުރާނީ ތަޖިކިސްތާންގެ ކަޕް ޗެމްޕިއަން، އެފްސީ ރެގާރުއާ ދެކޮޅަށެވެ.
