އަށާރަ އަހަރުގެ މެދުކެނޑުމަކަށް ފަހު، ކަޕް ވިނާސް ކަޕް ފުޓްބޯޅަ މުބާރާތް ބާއްވާއިރު، މި ފަަހަރުގެ މުބާރާތުގައި ކުޅުނު ފުރަތަމަ މެޗުން ނިއު ރޭޑިއަންޓް ސްޕޯޓްސް ކްލަބުން 5-0 އިން ބުރު ސްޕޯޓްސް ކްލަބް ބަލިކޮށްފަ އެވެ.
މި ފަހަރުގެ ސީޒަން ހުޅުވަން ކުޅުނު ޗެރިޓީ ޝީލްޑް މެޗުގައި ޕެނަލްޓީ ޖަހައިގެން މާޒިޔާ ސްޕޯޓްސް އެންޑް ރެކްރިއޭޝަން އަތުން ބަލިވި، ނިއު އިން މިއަދު ހަވީރު ކުޅުނު މެޗުގެ ފުރަތަމަ ހާފުގައި އެއް ގޯލުގެ ލީޑެއް ނެގިއިރު، ދެ ވަަނަ ހާފުގައި އިތުރު ހަތަރު ގޯލު ވަނީ ޖަހައިފަ އެވެ.
ގަލޮޅު ދަނޑުގައި މިއަދު ހަވީރު ކުޅުނު މެޗު ފަށައިގެން 20 ސިކުންތުގެ ތެރޭގައި ނިއު އިން ލީޑުނެގި އެވެ. އެ ޓީމަށް މި ލަނޑު ޖަހައިދިނީ، ޑޮރިއެލްޓަން ގޯމޭސް (ޑޯރީ) އެވެ. އޭރިއާތެރެއިން ހުރަސްވި ބޯޅައެއް ބުރުގެ ކީޕަރު، ޝައިހާން އަލީ އަތްމަތިން އައި ވަގުތު ޑޯރީ ވަނީ ބޮލުން ގޯލަށް ވައްދާލައިފަ އެވެ.
ބުރުން ނަތީޖާ ހަަމަހަމަ ކުރަން ކުރި މަސައްކަތުގައި މެޗުގެ 33 ވަނަ މިނިޓްގައި ލަނޑެއް ޖެހި އެވެ. އެ ގޮތުން، ހިލޭ ޖެހުމެއްގައި ނިއުގެ އޭރިއާތެރެއިން ލިބުނު ބޯޅައެއް ބުރުގެ އަރީން އަބްދުﷲ އިބްރާހިމް ގޯލަށް ފޮނުވާލިއިރު، ލައިންސްމަން ހުރީ އޮފްސައިޑަށް ދިދަ ނަގައިގެންނެވެ.
މެޗުގެ 60 ވަނަ މިނިޓްގައި ޑޯރީ ވަނީ ނިއުގެ ދެ ވަނަ ލަނޑު ޖަހައިދީ ލީޑުފުޅާކޮށްދީފަ އެވެ. މިއީ، ނިއުގެ ބްރެޒިލް މިޑްފީލްޑަރު، ގޯމޭސް ޑަ ސިލްވާ ނެގި ހުރަހަކުން ޑޯރީ ބޮލުން ޖެހި ގޯލެކެވެ. އޭގެ ހަތަރު މިނިޓް ފަހުން، ބުރުގެ ހާފު މެދެެއްހާ ހިސާބުން ލިބުނު ބޯޅައެއް ހިފައިގެން އޭރިއާތެރެއަށް ވަދެ، ގޯލުގެ ދުރު ކަނަށް ފޮނުވާލައިގެން، ޑޯރީ ވަނީ އޭނާގެ ހެޓްރިކް ފުރިހަމަަކޮށްފަ އެވެ. ފަނަރަހާސް ޑޮލަރުގެ މުސާރަ އަކަށް ނިއު އަށް ގެނައި ޑޯރީ މި ވަނީ އެ ޓީމަށް ކުޅެދިން ފުރަތަމަ ދެ މެޗުން ފަސް ލަނޑު ޖަހައިފަ އެވެ.
ނިއުގެ ހަތަރު ވަނަ ލަނޑު ޖެހީ ބަދަލަކަށް ކުޅެން އެރި އަލީ ފާސިރު (ސެންޓޭ) އެވެ. އޭރިއާތެރެއަށް ޑަ ސިލްވާ ނެގި ހުރަހަކުން ސެންޓޭ ފުރަތަަަމަ ޖެހި ބޯޅަ ކީޕަރު ޝައިހާން އަތުގައި ޖެހިފައި ނުކުތް ވަގުތު އޭނާ ވަނީ ރީބައުންސް ގޯލަށް ވައްދާލައިފަ އެވެ.
މެޗުގައި ނިއުގެ ފަހު ލަނޑު ޖެހީ، އަބްދުﷲ ބިލިޓީ އެވެ. ލައިބީރިއާގެ ޓީމަށް ކުޅެފައިވާ ބިލިޓީ އަށް ލިބުނު ފުރުސަތުގައި ވަނީ ތިރިތިރިން ގޯލަށް ބޯޅަ ވައްދާލައިފަ އެވެ.
ރާއްޖޭގެ ފުޓްބޯޅައިގައި ކުރިން ފޯރިގަދަކޮށް ކުރިއަށްގެންދިޔަ އެއް މުބާރާތް ކަމަށްވާ ކަޕް ވިނާސް ކަޕް، އެންމެ ފުރަތަމަ ބޭއްވީ މީގެ 31 އަހަރު ކުރިން، 1995 ވަނަ އަހަރު އެވެ. ކަޕް ވިނާސް ކަޕްގެ 11 މުބާރާތް ބޭއްވުމަށް ފަހު، 2009 އިން ފެށިގެން އެ މުބާރާތް ކުޅެފައިނުވެ އެވެ. އެންމެ ފަހުން، 2008 ވަނަ އަހަރު ބޭއްވި ކަޕް ވިނާސް ކަޕްގެ ޗެމްޕިއަންކަން ހޯދި ނިއު ރޭޑިއަަންޓް ސްޕޯޓްސް ކްލަބުންނެވެ.
މި ފަހަރުގެ މުބާރާތުގައި ނިއު އާއި ބުރުގެ އިތުރުން ކުޅެނީ މާޒިޔާ ސްޕޯޓްސް އެންޑް ރެކްރިއޭޝަން އާއި އޮޑި ސްޕޯޓްސް ކްލަބް އެވެ. މިރޭ ކުޅޭ މެޗުގައި އޮޑި އާއި މާޒިޔާ ބައްދަލުކުރާނެ އެވެ.
