ނިއު ރޭޑިއަންޓް ސްޕޯޓްސް ކްލަބާއި މާޒިޔާ ސްޕޯޓްސް އެންޑް ރެކްރިއޭޝަން ބައްދަލުުކުރާ މެޗުން މި މަހު 31 ވަނަ ދުވަހު ރާއްޖޭގެ ފުޓްބޯޅަ ސީޒަން ފަށާ ގޮތަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ނިންމައިފި އެވެ.
ނިއު އަކީ ކުރިއަށް އޮތް ސީޒަނަށް އެންމެ ކުރިން ޕްރީ ސީޒަން ފެށި ޓީމެވެ. މާޒިޔާ އިން ވެސް ވަނީ އާ ސީޒަނަށް ތައްޔާރީތައް ފަށައިފަ އެވެ. އޭގެ އިތުރުން، ބުރު ސްޕޯޓްސް ކްލަބުން ވެސް ވަނީ އާ ކޯޗެއްގެ ބެލުމުގެ ދަށުން ޕްރެކްޓިސްތައް ފަށައިފަ އެވެ.
ރާއްޖޭގެ ފުޓްބޯޅަ ސީޒަން ފަށަން ކުޅޭ ޗެރިޓީ ޝީލްޑް މެޗުގެ އެންމެ ކާމިޔާބު ޓީމަކީ މާޒިޔާ އެވެ. މިދިޔަ އަހަރު، ކްލަބް އީގަލްސް 2-0 އިން ބަލިކޮށް މާޒިޔާ އިން ވަނީ ހަ ވަނަ ފަަަހަރަށް ޗެރިޓީ ޝީލްޑް އުފުލާލައިފަ އެވެ. އެންމެ ގިނަ ފަހަރު ޝީލްޑް އުފުލާލުމުގެ ރެކޯޑް އޮތް މާޒިޔާ އިން ވަނީ 2015، 2016، 2017، 2021، 2023 އަދި 2025 ވަނަ އަހަރު ޝީލްޑް ހޯދައިފަ އެވެ.
ކަޕް ވިނާސް ކަޕް އުވާލުމަށް ފަހު، 2009 އިން ފެށިގެން ކުޅެން ފެށި ޗެރިޓީ ޝީލްޑް، ނިއު އިން ވަނީ ދެ ފަހަރެއްގެ މަތިން އުފުލާލައިފަ އެވެ. އެއީ، 2013 އާއި 2014 ވަނަ އަހަރު އެވެ.
މިދިޔަ ސީޒަނުގެ އެފްއޭ ކަޕްގެ ޗެމްޕިއަންކަން ހޯދި ނިއު އިން ސީޒަން ހުޅުވަން ކުޅޭ ޗެރިޓީ ޝީލްްޑް މެޗުގައި އެންމެ ފަހުން ކުޅެފައިވަނީ، މީގެ 10 އަހަރު ކުރިން، 2016 ވަނަ އަހަރު އެވެ. އެ ފަަހަރު ނިއު އިން ވަނީ، މާޒިޔާ އަތުން ބަލިވެފަ އެވެ. ނިއު އިން މީގެ ކުރިން ޝީލްޑް އުފުލާލި ދެ ފަހަރު ވެސް ވަނީ މާޒިޔާ އަތުން މޮޅުވެފަ އެވެ.
އާ ސީޒަނަށް ޓީމު ވަރުގަދަ ކުރުމުގެ ގޮތުން، ނިއު އިން ވަނީ ކްލަބް ވެލެންސިއާގެ ކެޕްޓަން، އީތަން އިބްރާހިމް ޒަކީ އާއި ބުރު ސްޕޯޓްސް ކްލަބްގެ މުހައްމަދު ނާއިމް އަދި މީގެ ކުރިން ބަންގްލަދޭޝްގެ ބަޝުންދަރަ ކިންގްސް އަށް ކުޅުނު ބްރެޒިލްގެ ފޯވާޑް، ޑޮރިއެލްޓަންގެ ސޮއި ހޯދައިފަ އެވެ.
ނިއު އަށް ކޯޗުކޮށްދޭނީ މިދިޔަ ސީޒަނުގެ އެފްއޭ ކަޕްގައި ވެސް އެ ޓީމަށް އިރުޝާދުދިން ސްޕެއިނުގެ ފްރަންސިސްކޯ މެނުއަލް ކައިންޒޯސް (އަންދްރޭ) އެވެ. މާޒިޔާގެ އާ ކޯޗު ކުރިއަށް އޮތް ހަފްތާ ތެރޭގައި ޓީމާ ގުޅޭނެ ކަމަށް ވަނީ މައުލޫމާތު ލިބިފަ އެވެ.
އެފްއޭއެމް އިން އަދި ސީޒަން ކަލަންޑަރު މީޑިއާ އަށް އާންމުކޮށްފައިނުވާއިރު، މިހާތަނަށް ލިބިފައިވާ މައުލޫމާތަށް ބަލާއިރު، ދިވެހި ޕްރިމިއާ ލީގު ފަށަނީ ސެޕްޓެމްބަރު މަހު އެވެ. އޭގެ ކުރިން، ކަޕް ވިނާސް ކަޕް ކުޅެން ނިންމާފައިވާއިރު، އަންނަ މަހު 11 ވަނަ ދުވަހު، އޭއެފްސީ ޗެލެންްޖު ލީގު ކޮލިފައިންގައި މާޒިޔާ އިން ވާދަކުރާނެ އެވެ.
އޭޝިއާގެ ތިން ވަނަ ފަންތީގެ ކްލަބް ފުޓްބޯޅަ މުބާރާތް، އޭއެފްސީ ޗެލެންޖު ލީގުގެ އަންނަ ސީޒަނުގެ ކޮލިފައިން ބުރުގައި، ރާއްޖޭގެ ލީގު ޗެމްޕިއަންކަން ޖެހިިޖެހިގެން ފަސް ފަހަރު ހޯދާފައިވާ، މާޒިޔާ އިން ބައްދަލުކުރާނީ ތަޖިކިސްތާންގެ ކަޕް ޗެމްޕިއަން، އެފްސީ ރެގާރު ޓަޑާޒްއާ އެވެ. އެ މެޗުން މޮޅުވާ ޓީމަކަށް ގްރޫޕް ސްޓޭޖުގެ ޖާގައެއް ލިބޭނެ އެވެ.
