ރައްޔިތުންގެ މަޖިލީހުގެ މެންބަރުން ކުރައްވާ ސުވާލުތައް އެޖެންޑާ ކުރުމުގައި ލަސްތަކެއް އުޅުމަކީ އެ ސުވާލުތަކަށް ޖަވާބު ނުލިބުގެ ޒިންމާ ނަގަން ޖެހޭ ސަބަބެއް ނޫން ކަމަށް ކޮންސްޓްރަކްޝަން މިނިސްޓަރު އަބްދުالله މުއްތަލިބު ވިދާޅުވެއްޖެ އެވެ.
މަޖިލިސް ޖަލްސާއަށް މިއަދު މުއްތަލިބު ހާޒިރުވެވަޑައިގެންނެވީ ކެންދޫ ދާއިރާގެ މެންބަރު މައުރޫފް ޒާކިރު ކުރެއްވި ދެ ސުވާލަކަށް ޖަވާބު ދެއްވުމަށެވެ. އެއީ އޭނާގެ ދާއިރާގައި ހިމެނޭ ކިހާދޫ އާއި ކުޑަރިކިލުގެ ފެނާއި ނަރުދަމާގެ ނިޒާމާ ގުޅޭ ސުވާލުތަކެކެވެ. އެއީ ސެޕްޓެމްބަރު 2025، ގައި ކޮށްފައިވާ ސުވާލެކެވެ.
"ތި ބޭފުޅުން ސުވާލުތަކުގެ އަދަދު ގިނަވީމާ ކިއުގައި، މަޖިލީހުގައި އެޖެންޑާ ކުރެވޭ ގޮތް ލަސްވުމަކީ އަދި އަޅުގަނޑު އެކަމުގައި ޒިންމާވާން ޖެހޭ ކަމެއް ނޫނޭ،" އެ ސުވާލަށް ޖަވާބު ދެއްވަން ފެއްޓެވުމުގެ ކުރިން މުއްތަލިބު ވިދާޅުވި އެވެ.
އެމްޑީޕީގެ މެންބަރުން މަޖިލީހަށް ހުށަހެޅި ސުވާލުތަކުގެ ތެރެއިން އެންމެ ގިނަ ސުވާލު އަމާޒުވެފައިވަނީ މުއްތަލިބަށެވެ. އެންމެ ގިނައިން ސުވާލުތަކަށް ޖަވާބު ދެއްވުމަށް ވިހިވަނަ މަޖިލީހަށް ވަޑައިގެންނެވި އެއް ވަޒީރަކީ މުއްތަލިބެވެ.
ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް (ކުޑޫ) ހާމަކުރައްވާފައިވާ ގޮތުގައި މުއްތަލިބަށް އަމާޒުކޮށް 56 ސުވާލެއް އެމްޑީޕީގެ މެންބަރުން ވަނީ ކޮށްފަ އެވެ. އޭގެ ތެރެއިން ގިނަ ސުވާލުތަކަށް އަދިވެސް ޖަވާބު ލިބިފައެއް ނުވެ އެެވެ.
ވަޒީރުން މަޖިލީހަށް ހާޒިރުނުވެ، މެންބަރުންނަށް ޖަވާބުދާރީވެވަޑައިނުގަންނަވާތީ އެމްޑީޕީ މެންބަރުން ކަންބޮޑުވުން ފާޅުކުރެ އެވެ. އިކޮނޮމިކް މިނިސްޓަރު މުހައްމަދު ސައީދުގެ އިތުބާރު ނެތްކަމުގެ މައްސަލާގައި ވެސް އެންމެ ބޮޑަށް ފާހަގަކޮށްފައިވަނީ މަޖިލީހަށް ޖަވާބުދާރީނުވުމުގެ މައްސަލަ އެވެ.
