ޕެރިސް (ޖުލައި 30) - ފީފާ އިން ފީފާ ފޯވާޑް އެންޓަޕްރައިސް (އެފްއެފްއީ)ގެ ނަމުގައި ތިން ވަނަ ފަރާތެއްގެ ބައިވެރިވުމާ އެކު ފަށަން ނިންމާފައިވާ، ފީފާގެ މުބާރާތްތައް ޕްރައިވަޓައިޒްކޮށް ކޮމާޝަލްކުރުމަށް ވިއްކާލުމުގެ ޕްލޭނާ އެއްގޮތަށް ކަންކަން ކޮށްފިނަމަ، ޔޫރަޕްގެ ގައުމުތަކުން ފީފާ ވޯލްްޑް ކަޕް ފުޓްބޯޅަ މުބާރާތް ބޮއިކޮޓް ކުރަން ނިންމައިފި އެވެ.
އެފްއެފްއީގެ ކަންކަން ކުރިއަށް ހިނގައިގަތުމަށްޓަކައި، ދުނިޔޭގެ މައި ފުޓްބޯޅަ އިދާރާ ފީފާގެ މެމްބަރު 211 ގައުމުގެ ވޯޓާ އެކު ފާސްކުރަން ޖެހެ އެެވެ. އަދި، އެ ގޮތަށް ފާސްވެއްޖެނަމަ، ފީފާގެ ދަށުން ހިންގާ ހުރިހާ މުބާރާތެއް، ވޯލްޑް ކަޕް ހިމެނޭހެން، ކުރިއަށްގެންދިއުމުގައި މާލީ ނަފާ ހޯދުމުގެ ފުރުސަތު އެފްއެފްއީއާ އެކު އަންނަ އިންވެސްޓަރުންނަށް ލިބޭނެ އެވެ.
ޖުމްލަ އެކު، 20 ބިލިއަން ޑޮލަރުގެ އެފްއެފްއީ އިންވެސްޓްމަންޓް ޕްލޭނަކީ، އިންފަންޓީނޯ އާއި ޓްރަމްޕްގެ ބައިވެރިވުން އޮތް ކަމެއް ކަމަށް ފުޓްބޯޅައިގެ ތަޖުރިބާކާރުން ތުހުމަތުކުރެ އެވެ. އެއީ، ފީފާގެ ވިސްނުން ހުރީ، އެފްއެފްއީގެ މައިގަނޑު ހިއްސާދާރެއްގެ ގޮތުގައި، ޓްރަމްޕާ ގުޅުން އޮތް ކުންފުންޏެއް ކަމަށްވާ ތުރައިވް އެޓާނަލް އަށް ދޭ ގޮތަށެވެ. މިއީ، އިންފަންޓީނޯ އަށް ވެސް ކޮންމެ މަހަކު، އެތައް މިލިއަން ޑޮލަރު ފައިދާއެއް ވާނެ ޑީލެއް ކަމަށް ރިޕޯޓްތައް ބުނެ އެވެ.
މި ޕްރޮޕޯސަލް ފާސްކުރުމަށްޓަކައި، ފީފާއާ އެއްކޮޅަށް ވޯޓު ދޭ ކޮންމެ މެމްބަރު އެސޯސިއޭޝަނަކަށް 40 މިލިއަން ޑޮލަރު ދޭން ވެސް ތައްޔާރެވެ. އަދި، ވަކި ގޮތެއް ނިންމަން ކޮންމެ މެމްބަރު ގައުމަަކަށް ސެޕްޓެމްބަރު 19 ގެ ނިޔަލަށް މުއްދަތެއް ފީފާ އިން ވަނީ ކަނޑައަޅައިފަ އެވެ. މި ޕްރޮޕޯސަލް އިސްތިހާރު ކުރުމަށްޓަކައި، ފީފާގެ މީޑިއާ ޗެނަލް މެދުވެރިކޮށް، އިންފަންޓީނޯ ވަނީ، އެފްއެފްއީގެ ދިފާއުގައި ވާހަކަ ދައްކަވައި، މިއީ ފުޓްބޯޅަ އަށް މިހާރު ނުލިބި އޮތް ނަފާ ހޯދުަމަށްޓަކައި، ދެން އޮތް ހަރުފަތަށް ދާން އަޅާ ފިޔަވަޅެއް ކަމަށް ވިދާޅުވެފަ އެވެ.
ފީފާގެ މި ވާހަކަތަކާ އެކު، ޔުއެފާގެ މެމްބަރު ގައުމުތަކުން ވަނީ، އިމަޖެންސީ ބައްދަލުވުމެއް މިއަދު ބާއްވައިފަ އެވެ. އެ ބައްދަލުވުމަށް ފަހު، ޔުއެފާގެ 55 ގައުމު ތަމްސީލްކުރާ ގޮތަށް، ނެރުނު ބަޔާނެއްގައި ބުނެފައިވަނީ، ހުރިހާ ގައުމެއް ތިބީ އެކަތިގަނޑެއްގެ ގޮތުގައި ކަމަށެވެ.
"ޔުއެފާގެ ހުރިހާ ގައުމެއް މި ތިބީ އެކުގައި، ފީފާ އިން ޕްރައިވެޓް އިންވެސްޓަރުންނަށް ފީފާ ވޯލްޑް ކަޕް ހިމެނޭހެން ފީފާގެ ހުރިހާ މުބާރާތެއްގެ ރައިޓްސް ދިނުމާ ދެކޮޅަށް ތެދުވެ. ވޯލްޑް ކަޕަކީ އިންވެސްޓްމަންޓް ޕްރޮޑަކްޓެއްގެ ގޮތުގައި އަމަލެއް ނުކުރެވޭނެ. އެއި ފުޓްބޯޅައިގެ އެންމެ ބޮޑު ލެގަސީތައް ޝާމިލުވާ ކަމެއް. އެއީ، އެތައް ޖީލެއްގެ ބައިވެރިވުމާ އެކު، ކުޅުންތެރިންނާއި ގައުމީ ޓީމުތަކުންނާއި ސަޕޯޓަރުން އެކުވެގެން ބިނާކުރި އެއްޗެއް. އޭގެ އެއްވެސް އެއްޗެއް އިންވެސްޓަރުންނަށް ވިޔަފާރި ކުރެވިގެން ނުވާނެ،" ޔުއެފާގެ ބަޔާނުގައިވެ އެވެ.
"ވޯލްޑް ކަޕް މިއޮތީ ސޭލްގައެއް ނޫން،"
ޔުއެފާ އިން ބުނީ، ފީފާގައި ތިބި ވަކި ބައެއް އަމިއްލަ މަންފާ ހޯދުމަށްޓަކައި، ފުޓްބޯޅަ އަށް މި ކަހަލަ ބަދަލު ގެންނަން ހުށަހެޅުން ވެސް ބަލައިނުގަނެވޭނެ ކަމަށެވެ.
ފީފާގެ ރައީސް އިންފަންޓީނޯ އާއި އެމެރިކާގެ ރައީސް، ޑޮނާލްޑް ޓްރަމްޕްގެ ދެމެދުގައި އޮތް ގުޅުމުގެ ގެއްލުން ފުޓްބޯޅަ އަށް ވަރަށް ބޮޑަށް އެބައޮތް ކަމަށް ފީފާގެ ކުރީގެ ރައީސް، ސެޕް ބްލެޓާ ވަނީ ވިދާޅުވެފަ އެވެ. ސަތާރަ އަހަރު ފީފާގެ ރައީސްކަން ކުރެއްވި ބްލެޓާ މި ގޮތަށް ވިދާޅުވީ، އޭނާ އަށް ފަހު، 2016 ވަނަ އަހަރުން ފެށިގެން ފީފާގެ ރައީސްގެ މަގާމު ފުރުއްވަމުން އަންނަ އިންފަންޓީނޯގެ ލީޑަޝިޕުން މިހާރު ކުރަން ނިންމާފައި އޮތް ޕްރައިވެޓް އިންވެސްޓްމެންޓާ ދެކޮޅަށް ވާހަކަ ދައްކަވަމުންނެވެ.
