މަޔާމީ، ޔުނައިޓެޑް ސްޓޭޓްސް (ޖުލައި 31) - ފީފާ އިން ފީފާ ފޯވާޑް އެންޓަޕްރައިސް (އެފްއެފްއީ)ގެ ނަމުގައި ތިން ވަނަ ފަރާތެއްގެ ބައިވެރިވުމާ އެކު ފަށަން ނިންމާފައިވާ، ފީފާގެ މުބާރާތްތައް ޕްރައިވަޓައިޒްކޮށް ކޮމާޝަލްކުރުމަށް ވިއްކާލުމުގެ ޕްލޭނާ ދެކޮޅަށް އުތުރު އެމެރިކާގެ ފުޓްބޯޅައިގެ ބެލެނިވެރިފަރާތް، ކޮންކަކަފް އިން ތެދުވެއްޖެ އެވެ.
އެފްއެފްއީގެ ކަންކަން ކުރިއަށް ހިނގައިގަތުމަށްޓަކައި، ދުނިޔޭގެ މައި ފުޓްބޯޅަ އިދާރާ ފީފާގެ މެމްބަރު 211 ގައުމުގެ ވޯޓާ އެކު ފާސްކުރަން ޖެހެ އެެވެ. އަދި، އެ ގޮތަށް ފާސްވެއްޖެނަމަ، ފީފާގެ ދަށުން ހިންގާ ހުރިހާ މުބާރާތެއް، ވޯލްޑް ކަޕް ހިމެނޭހެން، ކުރިއަށްގެންދިއުމުގައި މާލީ ނަފާ ހޯދުމުގެ ފުރުސަތު އެފްއެފްއީއާ އެކު އަންނަ އިންވެސްޓަރުންނަށް ލިބޭނެ އެވެ. ޖުމްލަ އެކު، 20 ބިލިއަން ޑޮލަރުގެ އެފްއެފްއީ އިންވެސްޓްމަންޓް ޕްލޭނަކީ، އިންފަންޓީނޯ އާއި ޓްރަމްޕްގެ ބައިވެރިވުން އޮތް ކަމެއް ކަމަށް ފުޓްބޯޅައިގެ ތަޖުރިބާކާރުން ތުހުމަތުކުރެ އެވެ. އެއީ، ފީފާގެ ވިސްނުން ހުރީ، އެފްއެފްއީގެ މައިގަނޑު ހިއްސާދާރެއްގެ ގޮތުގައި، ޓްރަމްޕާ ގުޅުން އޮތް ކުންފުންޏެއް ކަމަށްވާ ތުރައިވް އެޓާނަލް އަށް ދޭ ގޮތަށެވެ. މިއީ، އިންފަންޓީނޯ އަށް ވެސް ކޮންމެ މަހަކު، އެތައް މިލިއަން ޑޮލަރު ފައިދާއެއް ވާނެ ޑީލެއް ކަމަށް ރިޕޯޓްތައް ބުނެ އެވެ.
ފީފާގެ ޕްލޭނާ އެއްގޮތަށް ކަންކަން ކޮށްފިނަމަ ޔޫރަޕްގެ ގައުމުތަކުން ވޯލްޑް ކަޕް ބޮއިކޮޓް ކުރަން ނިންމައިފި
ފީފާގެ މުބާރާތްތައް ޕްރައިވަޓައިޒްކޮށް ކޮމާޝަލްކުރުމަށް ހުށަހަޅާފައިވާ 20 ބިލިއަން ޑޮލަރުގެ އިންވެސްޓްމަންޓް ޕްލޭން ފާސްކޮށްފިނަމަ، ޔޫރަޕްގެ ގައުމުތަކުން ވޯލްޑް ކަޕް ބޮއިކޮޓްކުރަން ވަނީ ނިންމާފައި. މި ޕްލޭނުން ފީފާގެ ރައީސް އިންފަންޓީނޯ އާއި އެމެރިކާގެ ރައީސް ޓްރަމްޕާ ގުޅުން އޮތް ކުންފުންޏަކަށް ބޮޑެތި ފައިދާތަކެއް ލިބޭނެ ކަމަށް ތުހުމަތުކުރެވޭ
މި ޕްރޮޕޯސަލް ފާސްކުރުމަށްޓަކައި، ފީފާއާ އެއްކޮޅަށް ވޯޓު ދޭ ކޮންމެ މެމްބަރު އެސޯސިއޭޝަނަކަށް 40 މިލިއަން ޑޮލަރު ދޭން ވެސް ތައްޔާރެވެ. އަދި، ވަކި ގޮތެއް ނިންމަން ކޮންމެ މެމްބަރު ގައުމަަކަށް ސެޕްޓެމްބަރު 19 ގެ ނިޔަލަށް މުއްދަތެއް ފީފާ އިން ވަނީ ކަނޑައަޅައިފަ އެވެ. އެއާ އެކު، ޔުއެފާ އިން ކުއްލި ބައްދަލުވުމެއް ބާއްވައި، ނިންމާފައިވަނީ، ފީފާ އިން މި ޕްލޭނާ އެއްގޮތަށް ކުރިއަށްގޮސްފިނަމަ، ޔުއެފާގެ 55 ގައުމު ފީފާ ވޯލްޑް ކަޕް ހިމެނޭހެން، ފީފާގެ މުބާރާތްތައް ބޮއިކޮޓްކުރުމަށެވެ.
ޔުއެފާގެ މި ނިންމުމަށް ފަހު، 41 ގައުމު ހިމެނޭ ކޮންކަކަފް އިން ވެސް ވަނީ ބައްދަލުވުމެއް ބާއްވައިފަ އެވެ. ކޮންކަކަފްގައި ހިމެނެނީ ނޯތު އާއި ސެންޓްރަލް އެމެރިކާގެ އިތުުރުން ކެރީބިއަން ފުޓްބޯލް އެސޯސިއޭޝަން އެވެ. ކޮންކަކަފްގެ ބައްދަލުވުމުގައި ނިންމާފައިވަނީ، ފީފާގެ މި ޕްލޭންގައި ދެފުށްފެންނަ ނިޒާމެއް ނެތްއިރު، ކަންކަން ދަނީ އޮންނަން ޖެހޭ ހަރުދަނާ އުސޫލުގެ ތެރެއިން ނޫން ކަމަށް ވާތީވެ، މި ޕްލޭނަށް ތާއީދުކުރެވެން ނެތް ކަމަށެެވެ.
މި ޕްރޮޕޯސަލް އިސްތިހާރު ކުރުމަށްޓަކައި، ފީފާގެ މީޑިއާ ޗެނަލް މެދުވެރިކޮށް، އިންފަންޓީނޯ ވަނީ، އެފްއެފްއީގެ ދިފާއުގައި ވާހަކަ ދައްކަވައި، މިއީ ފުޓްބޯޅަ އަށް މިހާރު ނުލިބި އޮތް ނަފާ ހޯދުަމަށްޓަކައި، ދެން އޮތް ހަރުފަތަށް ދާން އަޅާ ފިޔަވަޅެއް ކަމަށް ވިދާޅުވެފަ އެވެ.
ފީފާގެ ރައީސްކަން 2016 ވަނަ އަހަރުން ފެށިގެން ކުރައްވަމުން އަންނަ އިންފަންޓީނޯ އިސްވެ ހުށަހަޅާފައިވާ މި ޕްރޮޕޯސަލް ފާސްކުރުމަށްޓަކައި، ފީފާގައި ހިމެނޭ 211 މެމްބަރު ގައުމުތަކުގެ ތެރެއިން، 106 ގައުމު (މެމްބަރު އެސޯސިއޭޝަން)ގެ ތާއީދު ބޭނުންވާނެ އެވެ.
