ވެރިކަން ހިންގާ ޕީޕަލްސް ނެޝަނަލް ކޮންގްރެސްގެ ލީޑަރުން ހޮވަން ބާއްވާ ވޯޓު ސިއްރު ނުކުރަން އެ ޕާޓީ އިން ފާސްކޮށްފި އެވެ.
ޕީއެންސީގެ ލީޑަރުން ހޮވަން ބާއްވާ އިންތިހާބުގައި ސިއްރު ވޯޓަކަށް ނުދާން ނިންމީ އިންތިހާބުގެ ކަންކަން ކުރިއަށްގެންދަން އެކުލަވާލާފައިވާ ކޮމިޓީއިންނެވެ. އެ ކޮމިޓީގައި ނައިބު ލީޑަރުންނަށް ވާދަ ކުރައްވާ ބާރަށު ދާއިރާގެ މެންބަރު އިބްރާހިމް ސުޖާއު އާއި ނިލަންދޫ ދާއިރާގެ މެންބަރު ފާތިމަތު ސައުދާ ވެސް ހިމެނިވަޑައިގަންނަވަ އެވެ.
އޭގެ އިތުރުން އެ ކޮމިޓީގައި ހިމެނިވަޑައިގަންނަވަނީ އެ ޕާޓީގެ ޕާލަމެންޓަރީ ގްރޫޕުގެ ލީޑަރު އިބްރާހިމް ފަލާހު އާއި ފުވައްމުލަކު ދެކުނު ދާއިރާގެ މެންބަރު އިބްރާހިމް ހުސެއިން އާއި ފިޝަރީޒް މިނިސްޓަރު އަހުމަދު ޝިޔާމް އަދި އަބްދުﷲ މުހައްމަދު (ބޯފަން އަބްދުﷲ) އެވެ.
ސިއްރު ވޯޓަކަށް ނުދާން ނިންމި ކޮމިޓީގެ ބައްދަލުވުމުގައި ސައުދާ އާއި ސުޖާއު ބައިވެރިވެވަޑައިގެންނެވިކަމެއް ނޭނގެ އެވެ.
ޕީއެންސީގެ ލީޑަރު އަދި ރައީސްއަކީ ރައީސް މުހައްމަދު މުއިއްޒެވެ. ޕާޓީގެ އަސާސީ ގަވާއިދުގައި ބުނާ ގޮތުން ޕީއެންސީގެ ވެރިކަމެއްގައި ޕާޓީގެ ލީޑަރުގެ މަގާމުގައި ހުންނަވާނީ ރައީސުލްޖުމްހޫރިއްޔާ އެވެ. އެހެންކަމުން ދެން ހޮވާނީ ޕީއެންސީގެ ނައިބު ލީޑަރުންނެވެ.
ސުޖާއު އާއި ސައުދާގެ އިތުރުން ޕީއެންސީގެ ނައިބު ލީޑަރުންނަށް ވާދަ ކުރައްވަނީ މެންބަރު އަސްމާ ރަޝީދު އާއި އޭނާގެ ދަރިކަލުން އަދި މުއިއްޒުގެ ތަރުޖަމާނު މުހައްމަދު ހުސެއިން ޝަރީފް އާއި ސްޕޯޓްސް މިނިސްޓަރު އަބްދުﷲ ރާފިއު އަދި އިގްތިސާދީ މިނިސްޓަރު މުހައްމަދު ސައީދު އެވެ.
ޕީއެންސީގެ ނައިބު ލީޑަރުންގެ ގޮތުގައި މިވަގުތު ތިއްބެވީ ނައިބު ރައީސް ހުސެއިން މުހައްމަދު ލަތީފު އާއި ކުރީގެ ޑިފެންސް މިނިސްޓަރު ޣައްސާން މައުމޫން އާއި ފިޝަރީޒް މިނިސްޓަރު އަހުމަދު ޝިޔާމް އާއި އިގްތިސާދީ މިނިސްޓަރު ސައީދު އާއި މެންބަރު ސުޖާއު އާއި އެލްޖީއޭގެ ސީއީއޯ މުހައްމަދު ނިމާލް އެވެ.
