މެޑްރިޑް (ޖުލައި 22) - ފީފާގެ ރައީސްގެ މަގާމުން ޖިއާނީ އިންފަންޓީނޯ އިސްތިއުފާދޭން ޖެހޭ ކަމަށް ސްޕެނިޝް ލީގު ހިންގާ ލަލީގާގެ ރައީސް ހަވިއޭ ޓެބާސް ގޮވާލައިފި އެވެ.
ޓެބާސް ވަނީ ފީފާ ވޯލްޑް ކަޕްގެ ފައިނަލް ބެލުމަށް އެމެރިކާގެ ނިއު ޖާޒީގެ މެޓްލައިފް ސްޓޭޑިއަމަށް ގޮސްފަ އެވެ. އަދި، އެ މެޗުގައި ފެނުނު ކަންތައްތަކާއި މި ފަހަރުގެ ވޯލްޑް ކަޕްގައި ޖުމްލަކޮށް މުޅި ދުނިޔޭގެ ފުޓްބޯޅަ ސަޕޯޓަރުން ތަޖުރިބާކުރަން ޖެހުނު ދަތި ކަންކަމަށް ބަލާއިރު، ފީފާގެ ރަައީސްގެ މަގާމުގައި އިންފަންޓީނޯ ކުރިއަށްދާން ޖެހޭ ސަބަބެއް ނެތް ކަމަށް ޓެބާސް ވަނީ ފާހަގަކުރައްވައިފަ އެވެ.
"ފީފާ އިން ކަންކަން ރާވާފައި ހުރީ އެ މީހުންގެ އަމިއްލަ ފައިދާއަށް. އެއީ ފުޓްބޯޅަ އަށް ރަނގަޅަކަށް ކޮށްފައި ހުރި ކަންކަމެއް ނޫން. އެ މީހުން 27 ވަނަ މިނިޓްގައި ބްރޭކެއް ބޭނުންވީމަ އެ އޮތީ އެކަން ވެސް ކޮށްފައި. ހައިޑްރޭޝަން ބްރޭކަކީ ލޯ މައްޗަށް ދައްކާލުމެއް. ލަލީގާގައި ވެސް އެކަން (ކޫލިން ބްރޭކް) އޮވޭ. އެކަމަކު، އެކަން ކުރަނީ ހޫނު ގަދަވެއްޖެނަމަ،" ޓެބާސް ވިދާޅުވި އެވެ.
"އެމެރިކާގެ ޑަލަސް، އެލްއޭ، އެޓްލަންޓާ މި ތަންތަނުގައި ހުރި ދަނޑުތަކުގައި އެއާ ކޮންޑިޝަން (އޭސީ) ކޮށްފައި ހުރީ. އަހަރެން ވެސް ސްވެޓަރު ލައިގެންހުރި، އެ ހާލުގައި ގެންނަން ޖެހޭ ބްރޭކެއް އޮވެގެން ވާނެ ކަމަށް ނުދެކެން، މުޅިން އިސްތިހާރު ވިއްކަން ކުރި ކަންކަން އެއީ،"
މީގެ އިތުރުން، މި ފަހަރުގެ ވޯލްޑް ކަޕްގެ ގަދަ 32 ޓީމުގެ ބުރުގައި ބޮސްނިއާ އަތުން އެމެރިކާ މޮޅުވި މެޗުގައި، އެ ޓީމުގެ ފޯވާޑް، ފަލޮރިން ބަލޮގަންގެ ރަތް ކާޑަށް ލުއި ހޯދަން، އެމެރިކާގެ ރައީސް ޑޮނާލްޑް ޓްރަމްޕް ފޯނުން ގުޅުއްވައިގެން، ފީފާގެ ރައީސް ޖިއާނީ އިންފަންޓީނޯއާ ވާހަކަ ދައްކަވައި، އެމެރިކާ އިން ބޭނުންވާ ގޮތަށް ފީފާގެ ޑިސިޕްލިނަރީ ކޮމިޓީން ކަންކަން ނިންމި ގޮތާ މެދު ފުޓްބޯޅައިގެ ތެރޭގައި އުޅޭ އެތައް ފަރާތްތަކަކުން ވަރަށް ބޮޑަށް ހިތްހަމަނުޖެހުން ފާޅުކުރި އެވެ.
"އިންފަންޓީނޯގެ ނަސީބު ރަނގަޅުވީމަ، ބެލްޖިއަމް އަތުން ބަލިވެ، ގަދަ 16 ބުރުގައި އެމެރިކާ ކެޓީ. އެ ނޫންނަމަ، ބަލޮގަންގެ އެ ކޭސްގެ މައްސަލަައިގައި އިންފަންޓީނޯޯގެ ވަޒީފާ ގެއްލޭނެ ހާލަތަށް ކަންކަން ދާނެ.،" ޓެބާސް ވިދާޅުވި އެެވެ.
އިންފަންޓީނޯ، ފީފާގެ ރައީސްގެ މަގާމުން ދުރުވާން ޖެހޭ ވަގުތު އައިސްފައިވާ ކަމަށާއި އެކަމަކު އެކަން ކުރެވެން ނެތީ މިހާރު ވެސް ކުރިއަށް އޮތް އިންތިހާބަށް އޭނާ އޮތީ މަގާމު ދިފާއުކުރެވޭ ވަރަށް ގައުމުތަކުގެ ތާއީދު ހޯދައިގެން ކަމަށް ޓެބާސް ފާހަގަކުރެއްވި އެވެ. އަސްލު މައްސަލަ އަކީ މި ވަގުތު ކަންކަން ކުރެވޭނެ އިދިކޮޅު ކެންޑިޑޭޓެއް ވެސް ނެތުން ކަމަށާއި އިންފަންޓީނޯއާ އެކު ފީފާ އަށް މުސްތަގުބަލެއް ނެތް ކަމަށެވެ.
