ނިއު ޔޯކް، ޔުނައިޓެޑް ސްޓޭޓްސް (ޖުލައި 9) - ފީފާ ވޯލްޑް ކަޕްގައި އިންސާފުކުރަމުން އަންނަ ރެފްރީންނަށް އެއްވެސް ބައެއްގެ ނުފޫޒެއް ނުފޯރާނެ ކަމުގެ ޔަގީންކަން އެބައޮތް ކަމަށް ފީފާގެ ރެފްރީސް ޗީފް، އިޓަލީގެ ޕިއެރްލުއީޖީ ކޮލީނާ ބުނެފި އެވެ.
ދުނިޔޭގެ ފުޓްބޯޅަައިގައި ފެނިގެންދިޔަ އެންމެ ޖެހިލުންކުޑަ އެއް ރެފްރީ، ކޮލީނާ މިހެން ބުނީ، ފީފާ ވޯލްޑް ކަޕްގެ ގަދަ 16 ޓީމުގެ ބުރުގައި މިސްރު އަތުން 3-2 އިން އާޖެންޓީނާ އިން މޮޅުވި މެޗުގެ ރެފްރީ ފްރަންކޮއާ ލެޓެކްސިއާއާ ދެކޮޅަށް މިސްރުން ރަސްމީކޮށް ގިނަ ތުުހުމަތުތަކެއް ކޮށް މައްސަލަ ހުށަހަޅާފައިވާ ދަނޑިވަޅެއްގަ އެވެ. އަދި، އެމެރިކާގެ ފޯވާޑް، ފަލޮަރިން ބަލޮގަންގެ ރަތް ކާޑަށް ލުއިދޭން ފީފާ އިން ނިންމި ގޮތަށް ވެސް ގިނަ ބައެއްގެ ފާޑުކިޔުން އަމާޒުވި އެވެ.
ފީފާ މީޑިއާ އަށް ކޮލީނާ ދިން އިންޓަވިއުއެއްގައި ބުނެފައިވަނީ، ފުޓްބޯޅައިގެ ކަންކަން ރަނގަޅުކުރަން ބިނާކުރަނިވި ފާޑުކިޔުންތަކަށް މަރުހަބާ ކިޔާނެ ކަމަށާއި އަދި އެއާ އެއްގޮތަށް ބަދަލު ގެންނަން ޖެހިއްޖެނަމަ އެ ގޮތަށް އަމަލު ވެސް ކުރާނެ ކަމަށެވެ. އެކަމަކު، ސާބިތުނުހިފޭ ވާހަކަ ދެއްކުމަކީ ކުޅިވަރުގައި ވެސް އެއްވެސް ޖާގައެއް ދެވިގެންދާނެ ކަމަކަށް ވެގެންނުވާނެ ކަމަށް ކޮލީނާ ވަނީ ބުނެފަ އެވެ.
"ފީފާ ވޯލްޑް ކަޕްގެ މެޗު އޮފިޝަލުން (ރެފްރީން)ގެ އިންސާފުވެރިކަމާ މެދު ސުވާލު އުފެއްދޭނެ އެއްވެސް މީހަކު ނެތް. މި ކަހަލަ ކަންކަން ކުރީމަ މި ވާ ގޮތަކީ، ސާބިތުނުހިފޭ ވާހަކަތަކެއްގެ ސަބަބުން، ރެފްރީންނާއި އެ މީހުންގެ އާއިލާ ހުށަހެޅެނީ ނުރައްކަލެއްގެ ތެެރެއަށް،" ކޮލީނާ ބުންޏެވެ.
"ހަގީގަތަކީ، އެއްވެސް މީހަކަށް ފީފާގެ ރެފްރީންގެ ކަންކަމަށް ނުފޫޒެއް ނުފޯރުވޭނެ، ފީފާގެ ރައީސަށް ވެސް އެކަން ނުކުރެވޭނެ،"
ކޮލީނާ ބުނީ، ގަދަ 16 ބުރުގައި މިސްރާއި އާޖެންޓީނާ ބައްދަލުކުރި މެޗުގައި، ރެފްރީ ލެޓެކްސިއާގެ ނިންމުންތައް ރަނގަޅު ކަމަށެވެ. އަދި، ވީޑިއޯ އެސިސްޓަންޓް ރެފްރީ (ވީއޭއާރް) ބަލާފައި ނިންމާފައި ހުރީ ވެސް ރަނގަޅަށް ކަމަށާއި މެޗުގެ ނަތީޖާ އަށް އަސަރުކުރިފަދަ ގޯސްތަކެއް ރެފްރީ ހަދާފައިވާ ކަމަށް އެ ބުނާ ވާހަކަތަކަށް ބާރުދޭނެ ކަމެއް ގަވާއިދުން ވެސް ފެންނަން ނެތް ކަމަށް ކޮލީނާ ވަނީ ފާހަގަކޮށްފަ އެވެ.
