މިދިޔަ ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން ގުޅީފަޅުން ގޯތި ލިބުނު މީހުންނަށް ޑިޖިޓަލްކޮށް ގޯތި ހަވާލުކުރުމުގެ މަސައްކަތް ހައުސިން މިނިސްޓްރީން ފަށައިފި އެވެ.
ހައުސިން މިނިސްޓްރީން ބުނީ ޑިޖިޓަލްކޮށް ގޯތި ހަވާލުކުރާނީ ހިޔާވެހި ޕޯޓަލް މެދުވެރިކޮށް ކަމަށެވެ. އެ ޕޯޓަލްއަށް ލޮގިން ކުރެވޭނީ އީ-ފާސް މެދުވެރިކޮށެވެ.
ހިޔާވެހި ޕޯޓަލް މެދުވެރިކޮށް ގުޅީފަޅުން ގޯތި ލިބުނު މީހުންނަށް ގޯތި ލިބުނު ކަމުގެ ލިޔުން ޑައުންލޯޑުކޮށް، ގޯތި ލިބުނު ސަރަހައްދު ވެސް ފެންނާނެ ކަމަށް މިނިސްޓްރީން ބުންޏެވެ.
"ގޯތި ހަވާލުކުރިކަމުގެ ލިޔުން ހަވާލުކުރުމަށް މި ގެނެވުނު ބަދަލާއެކު މިހާރު އެ ސަރަހައްދަށް ވަޑައިނުގެން ޕޯޓަލް މެދުވެރިކޮށް ލިޔުން ފަސޭހަކަމާއެކު ހޯދޭނެ. އެހެންނަމަވެސް ގޯތި ބެއްލެވުމަށް ގުޅީފަޅަށް ވަޑައިގަންނަވަން ބޭނުންފުޅުވާ ފަރާތްތަކަށް އެކަމުގެ އިންތިޒާމު ހަމަޖައްސައިދެވޭނެ،" ހައުސިން މިނިސްޓްރީން ބުންޏެވެ.
ގުޅީފަޅުން ބިން ދޫކުރާނީ ލޭންޑް ޔޫޒް ޕްލޭނަށް ގެނެވުނު ބަދަލާއެކު ގޯތީގެ ރަޖިސްޓްރީއާ އަލުން ހަވާލުވި މީހުންނަށެވެ. އޭގެއިތުރުން ގޯތި ލިބުނު ސަރަހައްދަކީ މަސައްކަތު ސައިޓެއްނަމަ، އެ ސަރަހައްދަކުން ގޯތި ދޫކުރާނީ އެ މަސައްކަތެއް ނިމުމުންނެވެ.
މި ސަރުކާރުން ވަނީ ގުޅީފަޅުގެ ލޭންޑް ޔޫޒް ޕްލޭނަށް ބަދަލުތަކެއް ގެނެސް، އެތަނުން 3,520 ގޯތި ދޫކުރުމަށް ނިންމާފައެވެ. މީގެ ތެރޭގައި ކުރިން ގިރާވަރުފަޅުން ދޭން ނިންމި 1,114 ގޯތި ވެސް ހިމެނެއެވެ.
އެ ތަނުން ގޯތި ލިބުނު ހުރިހާ އެންމެންނަށް ގޯތި ހަވާލުކޮށް ނިންމުމުގެ މަސައްކަތް ލަސްވަނީ ގުޅީފަޅަކީ ބޮޑު ސަރަހައްދަކަށް ވެފައި، އެތަނުގައި އެއްގަމު ދަތުރުފަތުރުގެ ދަތިކަން ހުރުމުން ކަމަށް މީގެ ކުރިން ހައުސިން މިނިސްޓަރު އަބްދުﷲ މުއްތަލިބު ވިދާޅުވެފައިވެ އެވެ. އެކަން ހައްލު ކުރުމަށްޓަކައި ގުޅީފަޅަށް ބަހެއް ގެންގޮސްގެން އެ މަސައްކަތް ހަލުވި ކުރާނެ ކަމަށް ވެސް އޭރު މުއްތަލިބު ވިދާޅުވި އެވެ.
