ލޮސް އެންޖެލްސް، ޔުނައިޓެޑް ސްޓޭޓްސް (ޖުލައި 10) - ސްޕެއިނަކީ މި ފަހަރުގެ ފީފާ ވޯލްޑް ކަޕް ކާމިޔާބު ކުރާނެ ޓީމުގެ ގޮތުގައި، ގިނަ ބަޔެއްގެ ފޭވަރިޓް ކަމަށް ދެކެވޭ ވާހަކަ އަކީ އޭނާ ސަމާލުކަން ދޭ ކަންކަމެއް ނޫން ކަމަށް ސްޕެއިނުގެ ކޯޗު ލުއިސް ޑެ ލަ ފުއެންޓޭ ބުނެފި އެވެ.
ސްޕެއިނުން މި ފަހަރުގެ ވޯލްޑް ކަޕްގައި މިހާތަނަށް ކުޅުނު ފަސް މެޗުގެ ތެރެއިން ވަނީ ހަތަރު މެޗުން މޮޅުވެފަ އެވެ. މި ހުރިހާ މެޗެއްގައި ވެސް ސްޕެއިން ނިންމާލީ ކޮޅަށް ގޯލެއް ވަނަނުދީ އެވެ. އެންމެ ފަހުން، ގަދަ 16 ބުރުގައި ސްޕެއިނުން ވަނީ 1-0 އިން ޕޯޗުގަލް ބަލިކޮށްފަ އެވެ.
މިއީ، 2010 ވަނަ އަހަރު ފީފާ ވޯލްޑް ކަޕްގެ ޗެމްޕިއަންކަން ހޯދި ސްޕެއިނުން މިދިޔަ 16 އަހަރު ތެރޭ ވޯލްޑް ކަޕްގެ ކުއާޓާ ފައިނަލުގައި ކުޅޭ ފުރަތަމަ ފަހަރެވެ. އެންމެ ފަހުން، 2024 ވަނަ އަހަރު ބޭއްވި ޔޫރޯ ފުޓްބޯޅަ މުބާރާތުގެ ޗެމްޕިއަންކަން ހޯދި ސްޕެއިންގެ ކޯޗު ޑެ ލަ ފުއެންޓޭ ބުނީ، މި ފަހަރުގެ ވޯލްޑް ކަޕްގައި މިހާތަނަށް ސްޕެއިނުން ދެއްކި ކުޅުމާ ބަލާއިރު، އެ ޓީމާ މެދު ސަޕޯޓަރުން ދެކޭނީ ވަރަށް ޕޮޒިޓިވްކޮށްކަން އެނގޭ ކަމަށެވެ.
"އަހަރެން ހިތުގައި ބިރެއް ނެތް (މުބާރާތް ކާމިޔާބުކުރާނެ) ފޭވަރިޓަކަށް ސްޕެއިން ވިޔަސް ނުވިޔަސް. ފޭވަރިޓުންގެ ގޮތުގައި ގުނުމަކީ ވަކި ކަމެއް އަހަރެމެންނަށް ޔަގީންވާނެ ވެސް ކަމެއް ނޫން،" ކުއާޓާ ފައިނަލްގައި ބެލްޖިއަމްއާ ދެކޮޅަށް ކުޅޭ މެޗުގެ ކުރިން އޮތް ނޫސްވެރިންގެ ބައްދަލުވުމުގައި ޑެ ލަ ފުއެންޓޭ ބުންޏެވެ.
"އަހަންނަށް ބުނެވޭނީ އެންމެ ވާހަކައެއް. އަހަރެމެން މި ދަނީ ހުރިހާ ކަމަކަށް ވެސް ތައްޔާރުވަމުން. އަހަރެމެން މި ދަނީ މި ކަހަލަ ނޮކައުޓް މެޗުތަކަށް ވެސް ތައްޔާރުވުން، މިއީ އަހަރެންގެ ނަޒަރުގައި ފޭވަރިޓުންނެއް އޮންނާނެ މެޗުތަކެއް ވެސް ނޫން،"
ގިނަ ބަޔަކު ދެކޭގޮތުގައި، ބެލްޖިއަމާ ދެކޮޅަށް ސްޕެއިނުން ކުޅޭ ކުއާޓާ ފައިނަލަކީ. "ފަސޭހަ މެޗެއް" ކަމަށް ބެލި ކަމުގައި ވިޔަސް އޭނާ ތައްޔާރުވަނީ އުނދަގޫ ޗެލެންޖަކަށް ކަމަށެވެ. އެންމެ މުހިންމު ކަމަކީ، ރަނގަޅު ވިސްނުމެއްގައި ހުރެ، އަމިއްލަ ގޭމެއް ކުޅެގެން ނަތީޖާ ނެރުމަށް ކަމަށާއި ސްޕެއިނަށް ކޮންމެ މެޗަކުން ވެސް މޮޅުވެވެން އޮތީ އެންމެ ރަނގަޅު ކުޅުން ދައްކައިގެން ކަމަށް ޑެ ލަ ފުއެންޓޭގެ ވާހަކައިގައި ވަނީ ތަކުރާރުކޮށްފަ އެވެ.
ސްޕެއިން ސްކޮޑުގައި އަނިޔާގެ މައްސަލައެއް ނެތްކަން ފާހަގަކޮށް، ޑެ ލަަ ފުއެންޓޭ ބުނީ، އެންމެ ބޮޑު ހިތްހަމަޖެހުމަކީ ކޮންމެ ހާލަތަކަށް ވެސް ކުޅުންތެރިން ތައްޔާރުވެގެން ތިބެ، މެޗުން ނަތީޖާ ނެރުމުގެ ފޯކަސްގައި މަސައްކަތް ކުރާނެ ކަމުގެ ޔަގީންކަން އޮތުން ކަމަށެެވެ.
މި ފަހަރުގެ ވޯލްޑް ކަޕްގައި ސްޕެއިންގެ ވިދުންގަދަ ތަރި، ލަމީން ޔަމާލްގެ އެންމެ ރަނގަޅު ކުޅުން އަދި ނުފެންނަ ކަމަށާއި އުންމީދަކީ ބެލްޖިއަމާ ދެކޮޅަށް ޔަމާލަށް އަސްލު ފޯމުގައި ކުޅެވުން ކަމަށް ޑެ ލަ ފުއެންޓޭ ވަނީ ބުނެފަ އެެވެ.
