ނިއުޔޯކް، ޔުނައިޓެޑް ސްޓޭޓްސް (ޖުލައި 10) - ފީފާ ވޯލްޑް ކަޕް ފުޓްބޯޅަ މުބާރާތުގައި އިންގްލެންޑުން އެންމެ ފަހުން ކުޅުނު މެޗުގައި އެ ޓީމުގެ ޑިފެންޑަރު، ޖަރެލް ކުއަންސާ އަށް ދެއްކި ރަތް ކާޑުގެ ސަސްޕެންޝަން ދަމަހައްޓަން ފީފާ އިން ނިންމައިފި އެވެ.
ގަދަ 16 ޓީމުގެ ބުރުގައި އިންގްލެންޑުން 3-2 އިން މެކްސިކޯ އަތުން މޮޅުވި މެޗުގެ ދެ ވަނަ ހާފުގައި ކުއަންސާ އަށް ވަނީ ސީދާ ރަތެއް ދައްކައިފަ އެވެ. އިންގްލެންޑުން ވަނީ އެ ރަތް ކާޑަށް ލުޔެއް ހޯދުމަށް އެޕީލްކޮށްފަ އެވެ. އެއީ، މި ފަހަރުގެ ވޯލްޑް ކަޕްގައި، އެމެރިކާގެ ފޯވާޑް، ފަަލޮރިން ބަލޮގަން އަށް ދެއްކި ރަތް ކާޑަށް ވެސް ލުއިތަކެއް ދީ އޭނާ އަށް ޖެހިގެން އައި މެޗުގައި ކުޅުމުގެ ފުރުސަތު ދޭން ފީފާ އިން ނިންމުމާ ގުޅިގެންނެވެ.
އެކަމަކު، ފީފާ އިން ނިންމީ، ކުއަންސާ އަށް ދީފައި އޮތް ދެ މެޗުގެ ސަސްޕެންޝަން ދަމަހައްޓާށެވެ. މާނަ އަކީ، ކުއަންސާ އަށް އިންގްލެންޑުން ކުއާޓާ ފައިނަލުގައި، ނޯވޭއާ ދެކޮޅަށް ކުޅޭ މެޗު ގެއްލުމެވެ. އަދި، އެ މެޗުން މޮޅުވެއްޖެނަމަ، ސެމީ ފައިނަލުގައި އިންގްލެންޑުން ކުޅޭ މެޗުގައި ވެސް ކުއަންސާ އިންނަން ޖެހޭނީ ދަނޑު ބޭރުގަ އެވެ. ސެމީގައި އިންގްލެންޑުން ކުޅެން ޖެހިއްޖެނަމަ ވާދަކުރަން ޖެހޭނީ، އާޖެންޓީނާ ނޫނީ ސްވިޒަލެންޑާ އެވެ.
ފްރާންސް އިން ވެސް ވަނީ ކާޑަކަށް ލުއި ހޯދަން އެޕީލްކޮށްފަ އެވެ. އެ ގޮތުން، މި ފަހަރުގެ ވޯލްޑް ކަޕްގެ ގަދަ 16 ޓީމުގެ ބުރުގައި، ޕެރަގުއޭ އަތުން ފްރާންސް މޮޅުވި މެޗުގައި އެ ޓީމުގެ މައިކަލް އޮލީސޭ އަށް ދެއްކި ރީނދޫ ކާޑަށް ލުޔެއް ހޯދަން، ކުރި އެޕީލް ވެސް ފީފާ އިން ވަނީ އަނބުރާ ފޮނުވާލައިފަ އެވެ. ފްރާންސް އިން ރޭ މޮރޮކޯއާ ދެކޮޅަށް 2-0 އިން މޮޅުވި މެޗުގައި އޮލީސޭ އަށް ރީނދޫ ކާޑެއް ދެއްކި ނަމަ އޭނާ އަށް ސެމީ ފައިނަލް މެޗު ސަސްޕެންޝަންގެ ސަބަބުން ގެއްލޭނެ އެވެ.
ވޯލްޑް ކަޕްގެ ގަވާއިދުގައިވާ ގޮތުން، ގްރޫޕް ސްޓޭޖަށް ފަހު، އެއް ރީނދޫ ކާޑު ދައްކާފައިވާ ކުޅުންތެރިންގެ ކާޑުތައް މާފުވާނެ އެވެ. އަދި، ކުއާޓާ ފައިނަލަށް ފަހު ވެސް، އެއް ރީނދޫ ކާޑުގައި ތިބި ކުޅުންތެރިންގެ ކާޑުތައް މާފުވާނެ އެވެ.
