ބޮސްޓަން، ޔުނައިޓެޑް ސްޓޭޓްސް (ޖުލައި 10) - ދެ ވަނަ ހާފުގެ ލަނޑުތަކާ އެކު 2-0 އިން މޮޮރޮކޯ ބަލިކޮށް ފީފާ ވޯލްޑް ކަޕް ފުޓްބޯޅަ މުބާރާތުގެ ސެމީ ފައިނަލުގެ ފުރަތަމަ ޖާގަ ފްރާންސް އިން ހޯދައިފި އެވެ.
ގަތަރުގައި 2022 ވަނަ އަހަރު ބޭއްވި ފީފާ ވޯލްޑް ކަޕްގެ ސެމީ ފައިނަލުގައި ފްރާންސް އިން ވަނީ މޮރޮކޯ ބަލިކޮށްފަ އެވެ. މިރޭގެ މެޗަށް މޮޮރޮކޯ އިން ނުކުތްއިރު، އެންމެ ފަހުން ކުޅުނު 34 މެޗުން ވެސް ބަލިވެފައިނުވެ އެވެ.
ސެމީ ފައިނަލުގައި ފްރާންސް އިން ކުޅޭނީ ބެލްޖިއަމާއި ސްޕެއިން ކުޅޭ ކުއާޓާ ފައިނަލުން މޮޅުވާ ޓީމަކާ އެވެ.
ފްރާންސުން މެޗު ފަށައިގެން މާ ގިނައިރުތަކެއް ނުވެ، އެޓޭކްކުރަން ފެށި އެވެ. އެ ގޮތުން، އޭރިއާބޭރުން ފްރާންސްގެ ކެޕްޓަން، ކީލިއަން އެމްބާޕޭ، ފޮނުވާލި ބޯޅައެއް މޮރޮކޯގެ ކީޕަރު، ޔާސީން ބޯނޯ ވަނީ މަަތަކޮށްފަ އެވެ. ކޯނަރަކުން އަވަސްކޮށް ކުޅެން ފަށައި، އޭރިއާތެރެއަށް ނެގި ހުރަހަކުން ފްރާންސްގެ ޑަޔޫޓް އުޕަމެކާނޯ ބޮލުން ޖެހި ބޯޅަ ވެސް ކީޕަރު ބޯނޯ ވަނީ ހުއްޓުވައިފަ އެވެ.
ފުރަތަމަ ހާފުގައި ފްރާންސަށް ލީޑުނަގައިދޭން އެންމެ ރަނގަޅު ފުރުސަތެއް ލިބުނީ، އެމްބާޕޭ އަށެެވެ. އޭނާ އަށް މޮރޮކޯގެ ޑިފެންޑަރު، ނުޒައިރު މަޒްރައޯއީ ކުރި ފައުލަކަށް ދިން ޕެނަލްޓީން އެމްބާޕޭ ފޮނުވާލި ބޯޅަ ކީޕަރު ބޯނޯ ވަނީ މަތަކޮށްފަ އެވެ. ޕެނަލްޓީ ލިބުނު ފަހުން، ފޮނުވާލުމާ ދޭތެރޭ 3 މިނިޓާއި 12 ސިކުންތު ހޭދަވީ، ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލަން ޖެހޭ ކަންކަމަށް ފަހު އެވެ.
މޮރޮކޯ އަށް ފުރަތަމަ ހާފުގައި އެންމެ ހަމަލާއެއް ވެސް ގޯލަށް ފޮނުވާނުލެވުނުއިރު، ފްރާންސުން ވަނީ ގޯލެއް ޖެހުމާ ވަރަށް ގާތަށް ޖެހިލައިފަ އެވެ. އެ ގޮތުން، ހާފުގެ މެދެއްހާ ހިސާބުން ވާތުބެކް، ލޫކަސް ޑީންޏާ ޖެހި ޝޮޓް ބޭރުވީ ހުރަސްދަނޑީގައި ޖެހިފަ އެވެ.
މެޗުގައި ފްރާންސް އިން ފުރަތަމަ ލަނޑު ޖެހީ ދެ ވަނަ ހާފުގެ 15 ވަަނަ މިނިޓްގަ އެވެ. މިއީ، މެޗުގެ 60 ވަނަ މިނިޓްގައި، އޭރިއާ ރޮނގުކައިރިން، ލިބުނު ފުރުސަތަކުން ގޯލުގެ ދުރު ކަނަށް ބޯޅަ ފޮނުވާލައިގެން، އެމްބާޕޭ ޖެހި ގޯލެކެވެ. އޭގެ ހަ މިނިޓް ފަހުން، ފްރާންސް އިން ލީޑުފުޅާކުރި އެވެ. މިއީ، އެމްބާޕޭ ދިން ބޯޅައަކުން އޮސްމާން ޑެމްބެލޭ ޖެހި ގޯލެކެވެ. ޑެމްބެލޭ ފޮނުވާލި ބޯޅަ ގޯލަށް ވަނީ ކީޕަރު ބޯނޯ އަތުގައި ޖެހިފަ އެވެ.
މޮރޮކޯގެ އަޒެދީން އުނާހީ، ހާފުގެ މެދުތެރެއިން ޖެހި ޝޮޓެއް ފްރާންސްގެ ކީޕަރު މައިކް މައިންނޯން ވަނީ މަތަކޮަށްފަ އެވެ. ފްރާންސް އިން ތިން ވަަނަ ލަނޑު ޖަހަން ކުރި މަސައްކަތުގައި، ބްރެޑްލީ ބާކޮލާ ޖެހި ޝޮޓް ކީޕަރު، ބޯނޯ ހުއްޓުވިއިރު، އޮލީސޭ ޖެހި ބޯޅަ ދިޔައީ ގޯލާސީދާނުވެ އެވެ.
ކުއާޓާ ފައިނަލުގައި މާދަމާރޭ ކުޅޭނީ ބެލްޖިއަމާއި ސްޕެއިން އެވެ. އަދި، ދެން އޮތް ދެ ކުއާޓާ ފައިނަލަކީ، އިންގްލެންޑާއި ނޯވޭ ކުޅޭ މެޗާއި އާޖެންޓީނާ އާއި ސްވިޒަލެންޑް ބައްދަލުކުރާ މެޗެެވެ.
