ބޮސްޓަން، ޔުނައިޓެޑް ސްޓޭޓްސް (ޖުލައި 9) - ފީފާ ވޯލްޑް ކަޕް ފުޓްބޯޅަ މުބާރާތުގެ ކުއާޓާ ފައިނަލް ފުރަތަމަ މެޗުގައި މިރޭ ކުޅުމުގެ ކުރިން، މެޗުގައި ބައްދަލުކުރާ ފްރާންސްގެ ކޯޗު ޑިޑިއޭ ޑެޝޯމްޕްސް އާއި މޮޮރޮކޯގެ ކޯޗު، މުހައްމަދު އުއާބީ، މެޗުގެ ރެފްރީންނަށް އިތުބާރު އޮތް ކަމަށް ބުނެ، ތައުރީފުކޮށް ވާހަކަ ދައްކައިފި އެެވެ.
މޮރޮކޯ އާއި ފްރާންސް ބައްދަލުކުރާ މެޗުގެ ފަސް ރެފްރީން ވެސް ނިސްބަތްވަނީ އާޖެންޓީނާ އަށެވެ. މިއީ، ވަކި މަގުސަދެއްގައި ކޮށްފައިވާ ކަމެއްތޯ ނޫސްވެރިންގެ ބައްދަލުވުމުގައި ފްރާންސްގެ ކޯޗު ޑެޝޯމްސް ގާތުގައި އެހުމުން، އޭނާ ބުނެފައިވަނީ، ވާދަކުރަން ޖެހެނީ ރެފްރީންނާ ނޫން ކަމަށާއި ކުޅެނީ މޮރޮކޯއާ ކަމަށެވެ.
"ރެފްރީންނާ މެދު ވިސްނައިގެން ކުރެވޭނެ ކަމެއް ނެތް. އެހެންވެ، އަހަރެން މި ނިންމަނީ ރެފްރީންނަށް އިތުބާރު ކުރަން. އަހަންނަށް ފެންނަ ގޮތުގައި އެ މީހުން ވަރަށް ރަނގަޅަށް އެކަންކުރާނެ. ވަކި ގައުމެއްގެ ބަޔަކަށް ވެގެން ރެފްރީންނާ ގުޅޭ ވާހަކައެއް ނުދެއްކޭނެ،" ޑެޝޯމްޕްސް ބުންޏެވެ.
އޭނާ ބުނީ، ރެފްރީންގެ ނިންމުންތަކާ މެދު އަބަދުވެސް ބަހުސްތައް ކުރެވޭނެ ކަމަށާއި އެއީ ފުޓްބޯޅައިގެ ތެރޭގައި ހިނގާނެ ކަންކަން ކަމަށެވެ. އަދި، މީގެ ހުރިހާ ކަމެއް ވެސް ބިނާވަނީ އެ މީހެއް ހުންނަ "ފަޅިއެއް"ގެ ގޮތުން ކަމަށް ވެސް ޑެޝޯމްޕްސް ވަނީ ބުނެފަ އެވެ.
"އަހަރެން އެއްވެސް އިރެއްގައި ވިސްނި ގޮތެއް ނޫން ރެފްރީ އަކީ އަހަންނާ ދެކޮޅު މީހެކޭ. ހަގީގަތަކީ ރެފްރީ އެ ތަނުގައި އެ ހުންނަނީ ފުޓްބޯޅައިގެ ގަވާއިދާ އެއްގޮތަށް އަމަލުކުރަން،" ޑެޝޯމްޕްސް ބުންޏެވެ.
މީގެ ހަތަރު އަހަރު ކުރިން، ގަތަރުގައި 2022 ވަނަ އަހަރު ބޭއްވި ވޯލްޑް ކަޕްގެ ސެމީ ފައިނަލުގައި ފްރާންސުން ވަނީ މޮރޮކޯ ބަލިކޮށްފަ އެވެ. އެ މެޗުގައި މޮރޮކޯ އަށް ދެ ޕެނަލްޓީއެއް ލިބެންޖެހޭ ފައުލުތަކެއް ކަމަށް ބުނެ، އެ ޓީމުން އެ މެޗުގެ ތެރެއިން ވަރަށް ބޮޑަށް އެޕީލްކުރި އެވެ.
ޑެޝޯމްޕްސް އެކޭ އެއްގޮތަށް، މޮރޮކޯގެ ކޯޗު އުއާބީ ވެސް ވަނީ ރެފްރީންނަށް އިތުބާރު އެބައޮތް ކަމަށް ތަކުރާރުކޮށް ބުނެފަ އެވެ.
"މި މެޗުގެ ރެފްރީގެ ތަޖުރިބާ އެބަހުރި. އެއީ އަހަރެމެން ވެސް އެ ދޭ ގޮތަކީ ތަޖުރިބާ ހުރި ރެފްރީއެއް ހުރުން، އަހަރެމެން މި ތިބީ އެ ވިސްނުމަށް ބަލާއިރު ވަރަށް ހަމަޖެހިލައިގެން. ދެން، ރެފްރީން އެ ދަނީ އެ މީހުންގެ ޒިންމާ އަދާކުރަމުން،" އުއާބީ ބުންޏެވެ.
އޭނާ ބުނީ، މޮރޮކޯ އިން ގަދަ 16 ޓީމު ކުޅުނު ބުރުގައި ކެނަޑާ އަތުން މޮޅުވި މެޗުގައި ހުރި ރެފްރީން ވަރަށް ރަނގަޅު ކަމަށާއި ހަމައެކަނި ކަންބޮޑުވުމަކީ ކާޑު ދެއްކުން ތަންކޮޅެއް އަވަސްވުން ކަމަށެވެ. އެކަމަކު، ފްރާންސާއި ޕެރަގުއޭ ކުޅުނު މެޗުގައި ފެނުނީ އެހެން ގޮތަކަށް ކަމަށާއި އެ މެޗުގައި ކާޑެއް ފެނުން ވީ އުނދަގޫ ކަމަކަށް ކަމަށް އުއާބީ ވަނީ ފާހަގަކޮށްފަ އެވެ.
ފްރާންސުން ވަނީ 2022 ވަނަ އަހަރުގެ ވޯލްޑް ކަޕްގެ ސެމީގައި 2-0 އިން މޮޮރޮކޯ ބަލިކޮށްފަ އެެވެ. އެ މެޗުގެ ފަހުން ކުޅުނު 34 މެޗުން ވެސް މޮރޮކޯ ބަލިވެފައިނުވެ އެވެ.
