މަޔާމީ، ޔުނައިޓެޑް ސްޓޭޓްސް (ޖުލައި 10) - ފީފާ ވޯލްޑް ކަޕްގެ ކުއާޓާ ފައިނަލު މެޗަށް ނުކުންނައިރު، ޕްރެޝަރު އޮތީ އިންގްލެންޑަށް ކަމަށާއި އެއީ އެ ޓީމަކީ މުބާރާތް ކާމިޔާބުކުރާނެ ކަމަށް ބެލެވޭ ފޭވަރިޓުންގެ ތެރޭގައި ހިމެނޭ ޓީމެއް ކަމަށް ނޯވޭގެ ފޯވާޑް، އާލިން ބްރައުޓް ހާލަންޑް ބުނެފި އެވެ.
އަށާވީސް އަހަރަށް ފަހު، ނޯވޭ އިން ވޯލްޑް ކަޕްގައި ކުޅޭއިރު، އެ ޓީމުން ވަނީ މުބާރާތުގެ ގަދަ 16 ބުރުގައި، ފަސް ފަހަރު ޗެމްޕިއަންކަން ހޯދާފައިވާ ބްރެޒިލް ކަޓުވާލައިފަ އެވެ. އެ މެޗުގައި ނޯވޭގެ ދެ ލަނޑު ވެސް ޖެހި ހާލަންޑް އަކީ، އިންގްލެންޑްގައި އުފަންވި ކުޅުންތެރިއެކެވެ. އެއީ، އޭނާގެ ބައްޕަ، އަލްފީ ހާލަންޑް، އިނގިރޭސި ޕްރިމިއާ ލީގުގައި ކުޅެމުންދަނިކޮށެވެ.
ހާލަންޑް އަންނަނީ އިނގިރޭސި ޕްރިމިއާ ލީގުގެ މެންޗެސްޓާ ސިޓީގައި މޮޅު ކުޅުމެއް ދައްކަމުންނެވެ. އޭނާ ބުނީ، ވޯލްޑް ކަޕްގެ ނޮކައުޓް މެޗެއްގައި އިންގްލެންޑާ ކުރިމަތިލާން ޖެހުން އޭނާ އަށް ވެސް ހާއްސަވާ ސަބަބުތަކެއް އެބަހުރި ކަމަށެވެ.
"މިއީ ވަރަށް ހާއްސަ މެޗެއް. އަހަރެން އުފަންވީ އިންގްލެންޑްގައި. އިންގްލެންޑް ޓީމުގައި އަހަންނާ އެއް ޓީމަށް ކުޅޭ ކުޅުންތެރިން އެބަތިބި. އެ މީހުންނާ ދެކޮޅަށް ކުޅޭތީވެސް ހާއްސަ. އެއްގޮތަކުން މަޖާޒީ ވެސް ކަންކަން އެބަހުރި، މިއީ ރަނގަޅު މެޗަކަށްވާނެ،" މި ވޯލްޑް ކަޕްގައި ހަތް ގޯލު ޖަހާފައިވާ ހާލަންޑް ބުންޏެވެ.
"އެ މީހުންނަކީ (އިންގްލެންޑަކީ) ފޭވަރިޓުން މި މެޗަށް ވެސް. އަނެއްކޮޅުން އެއީ މުބާރާތުގެ ވެސް ފޭވެރިޓެއް. އަހަންނަށް ހީވާ ގޮތުގައި ތި އެންމެން މޮޅުވުމުގެ ޕްރެޝަރުގެ ވާހަކަ ގެންނަންވީ އެ މީހުންނަށް ހެން،"
ދިގު މެދުކެނޑުމަކަށް ފަހު، ނޯވޭ އިން މި ފަހަރުގެ ވޯލްޑް ކަޕްގައި ކުޅޭއިރު، ހާލަންޑް ބުނީ، ކުއާޓާ ފައިނަލާ ހަމައަށް އާދެވުމަކީ ވެސް ހަގީގަތުގައި ކާމިޔާބެއް ކަމަށެވެ. އަދި، ނޯވޭ ވޯލްޑް ކަޕްގެ ގަދަ އަށް ޓީމުގެ ތެރޭގައި ކުޅުމުން ބައެއް ފަހަރު އޭނާ ވެސް ހައިރާންވާ ކަމަށް ހާލަންޑް ވަނީ ބުނެފަ އެވެ.
"ބްރެޒިލާ ދެކޮޅަށް ކުޅުމަކީ އަހަރެމެން ނޯވޭ މީހުންނަށް ވަރަށް އެހެން ކަހަލަ ކަމެއް ތަޖުރިބާ ކުރެވޭ ކަމެއް. ބްރެޒިލް އަތުން މޮޅުވެގެން ކުއާޓާ ފައިނަލެއްގައި އިންގްލެންޑާ ދެކޮޅަށް އެ ވެސް ޔުނައިޓެޑް ސްޓޭޓްސް އޮފް އެމެރިކާގައި ކުޅޭ މުބާރާތެއްގައި ވާދަކުރުން ހުރިހާ ގޮތަކުން ވެސް ހާއްސަ،" ހާލަންޑް ބުންޏެވެ.
"މިއީ، ހުރިހާ ގޮތަކުން ބަލާއިރު ވެސް ނޯވޭގެ ރައްޔިތުން އުފާކުރާނެ ވަގުުތެއް،"
ހާލަންޑް ބުނީ، އިންގްލެންޑުން ޖެހިޖެހިގެން ތިން ވަނަ ވޯލްޑް ކަޕްގެ ކުއާޓާ ފައިނަލުގައި ކުޅޭއިރު، އެ ޓީމަށް މި ލެވަލްގެ ތަޖުރިބާ ލިބިފައިވާ ކަމަށެވެ. އަނެއްކޮޅުން، ނޯވޭ އަށް އޮތީ މިހާތަނަށް އައިއިރު ވެސް ޓީމެއްގެ ގޮތުގައި ކުރި މަސައްކަތް ތަކުރާރުކުރުން ކަމަށް ހާލަންޑް ވަނީ ބުނެފަ އެވެ.
