ރާއްޖޭގައި ދިވެހި ފައިސާގެ އަގާ މެދު ހަގީގަތާ ކުރިމަތިލުނާ އުޅެމުންދާތާ އެތައް އަހަރެއް ވެއްޖެ އެވެ. ރަސްމީ ރޭޓަކީ އެމެރިކާ ޑޮލަރަކަށް 15.42 ރުފިޔާ އެވެ. ނަމަވެސް ކަޅު ބާޒާރުގައި ޑޮލަރެއްގެ އަގު ހުރީ 20 ރުފިޔާގަ އެވެ. ބައެއް ފަހަރު އެއަށްވުރެ ވެސް މަތީގަ އެވެ. އަހަރެމެންގެ ތެރެއިން ގިނަ ބަޔަކު މި ފަރަގާ މެދު މާ ބޮޑު ފަރުވާލެއް ނުބަހައްޓަ އެވެ. އެހެންނަމަވެސް، މި ހަފުތާގައި ރާއްޖޭގެ އެންމެ ބޮޑު ބޭންކުން މިކަމަށް ސީދާ ގޮތުން ކުރިމަތިލާ، އެއީ ދާއިމީ ހަގީގަތަކަށް ހަދައިފި އެވެ.
ބޭންކް އޮފް މޯލްޑިވްސް (ބީއެމްއެލް) އިން މިހާރު ވަނީ "ޔޫއެސް ޑޮލަރު އިންވެސްޓްމަންޓް" ގެ ނަމުގައި އާ ފުރުސަތެއް ހުޅުވާލާފަ އެވެ. މިއީ ވަރަށް ހިތްގައިމު ހުށަހެޅުމެކެވެ. ބޭންކަށް ޑޮލަރު ދިނުމުން "25 އިންސައްތައާ ހަމައަށް" މަންފާ ލިބޭނެ ކަމަށް ބުނެ އެވެ. ނަމަވެސް މީގެ އަސްލު ހަގީގަތަށް ބަލާއިރު ކަންވަނީ މިހެންނެވެ؛ އަޅުގަނޑުމެން ބޭންކަށް އެއް ޑޮލަރު ދިނުމުން، މިއަދުގެ ރަސްމީ ރޭޓް ކަމަށްވާ 15.42 ރުފިޔާގެ ނިސްބަތުން އެ ފައިސާ ރުފިޔާ އެކައުންޓަށް ޖަމާކޮށްދެ އެވެ. އަދި އޭގެ ފަހުން، އިންވެސްޓްމަންޓްގެ މަންފާގެ ގޮތުގައި ގާތްގަނޑަކަށް ހަތަރުބައިކުޅަ އެއްބައި އިތުރުކޮށްދެ އެވެ. ހިސާބު ޖަހާލުމުން އެނގެނީ، އެއް ޑޮލަރަށް ބޭންކުން ގާތްގަނޑަކަށް 19.30 ރުފިޔާ ދައްކާ ކަމެވެ.
މިތަނުގައި މިވާ ގޮތަށް ފުންކޮށް ވިސްނާލާށެވެ. ގާނޫނީ ގޮތުން ރާއްޖޭގައި ކަނޑައެޅިފައިވާ ރަސްމީ ރޭޓަށް ވުރެ ބޮޑު އަގުގައި ޑޮލަރު ގަތުމަކީ އެއްވެސް ފަރާތަކަށް ހުއްދަ ކަމެއް ނޫނެވެ. ބޭންކުތަކަށާއި، ލައިސަންސް އޮތް މަނީ އެކްސްޗޭންޖްތަކަށް ވެސް އެކަން އޮތީ މަނާކޮށްފަ އެވެ. ނަމަވެސް ގަވާއިދަކީ ހަމައެކަނި އެއަށް ބޯލަނބާ ބަޔަކަށް އޮންނަ އެއްޗެކެވެ. ބޭންކުތަކަކީ ވަރަށް ގާތުން ބަލައި، ހަރުކަށި އުސޫލުތަކެއްގެ ދަށުން ހިންގާ ތަންތަނަށް ވުމުން، އެ ބޭންކުތަކުން ގަވާއިދަށް ބޯލެނބި އެވެ. އޭގެ ނަތީޖާއަކަށްވީ ބޭންކުތަކުން ޑޮލަރު ހުސްވެ، ކަޅު ބާޒާރުގެ ގޯޅިތަކަށް ޑޮލަރު ދިއުމެވެ. މަނީ އެކްސްޗޭންޖްތަކުން މިކަން ކުރީ މާ ސިއްރުވެރި ގޮތަކަށެވެ. ރަސްމީ ރޭޓަށް ވުރެ އިތުރަށް ދޭ ފައިސާ، އެހެން ވިޔަފާރިއެއްގެ ތެރެއިން ހިސާބުކޮށްލަނީ އެވެ. އެހެންކަމުން ބޭރު ފައިސާގެ ރަސްމީ ހިސާބުތަކުން އެ އުސޫލާ ހިލާފުވުން ނުފެނެ އެވެ. ބޭންކުތަކުން ތެދުވެރިކަމާއެކު ތިބުމުން، އެ މީހުންނަށް ޑޮލަރުގެ ބާޒާރު ބަންދުވީ އެވެ. މިހާރު ރާއްޖޭގެ އެންމެ ބޮޑު ބޭންކުން މިވަނީ އެ މީހުން ހިފަހައްޓަމުން އައި ގަވާއިދުން ރެކޭނެ މަގެއް ހޯދާފަ އެވެ. އެއީ 15.42 ރުފިޔާގެ ރަސްމީ ރޭޓް މުގުރާލުމުގެ ބަދަލުގައި، އިތުރަށް ދޭ ފައިސާއަށް އެހެން ނަމެއް ދީގެންނެވެ. ފައިސާ ބަދަލުކުރާ ވަގުތު އަދިވެސް ހިނގަނީ ރަސްމީ ރޭޓަށެވެ. އެހެންކަމުން ރަސްމީކޮށް އެއްވެސް ބަދަލެއް ނާދެ އެވެ. އިތުރަށް ދޭ ބައި މިހާރު މިވަނީ "އިންވެސްޓްމަންޓް ރިޓާން" ނުވަތަ އިންވެސްޓްމަންޓްގެ މަންފާގެ ގޮތުގައި ނަން ބަދަލުކޮށްފަ އެވެ. މިއީ މާލީ ގޮތުން ހެދި ވަރަށް ހުޝިޔާރު އުކުޅެކެވެ. ނަމަވެސް މިއީ އިއުލާނު ކުރުމަކާ ނުލައި ފައިސާގެ އަގު ވައްޓާލުމެވެ.
މިއީ އުމުރުގައި ދުވަހަކު ވެސް ޑޮލަރެއް ގަނެފައި ނުވާ މީހަކު ވެސް ވިސްނަން ޖެހޭ ކަމެކެވެ. ރާއްޖޭގެ އެންމެ ބޮޑު، ސަރުކާރު ހިއްސާވާ ބޭންކުން ފާޅުގައި 25 އިންސައްތައިގެ އިތުރު އަގަކާއެކު މުއާމަލާތް ކުރަން ފެށުމުން، 15.42 ރުފިޔާގެ ރޭޓުގެ އެއްވެސް މާނައެއް ނޯންނާނެ އެވެ. ކާޑާއި، ތެލާއި، ދަރިންގެ ސްކޫލް ބޫޓު އެތެރެކުރާ ކޮންމެ އިމްޕޯޓަރަކަށް މިހާރު އެނގެނީ ޑޮލަރެއްގެ އަސްލު އަގަކީ 15 ރުފިޔާ ނޫން ކަމާއި، އެއީ 19 ރުފިޔާ ކަމެވެ. އެ މީހުން މުދަލުގެ އަގު ކަނޑައަޅާނީ އެ ނިސްބަތުންނެވެ. ކުރިން ސިއްރުން އޮތް އަގު، މިހާރު މިވަނީ އަޅުގަނޑުމެން ގަންނަ ކޮންމެ އެއްޗެއްގެ އަގުގެ ތެރެއަށް ރަސްމީކޮށް ވަދެފަ އެވެ. ރަސްމީ ރޭޓާއި އަސްލު ރޭޓާ ދެމެދު އޮތް ފަރަގު ކުޑައެއް ނުކުރެވުނެވެ. މި ކުރި ކަމަކީ، ރަސްމީ ރޭޓް މަތިކޮށް، ކަޅު ބާޒާރުގެ ރޭޓާ ހަމަކޮށް، އެ ބުރަ އުފުލުމަށް ކޮންމެ އާއިލާއަކަށް މަޖުބޫރުކުރުވީ އެވެ.
ބީއެމްއެލްގެ ދިފާއުގައި ބުނާނަމަ، އެ ބޭންކަށް ކުރިމަތިވެފައިވާ ދަތިކަމަކީ ހަގީގަތެކެވެ. އަދި އެއީ ބޭންކުން އަމިއްލައަށް އުފެއްދި ކަމެއް ވެސް ނޫނެވެ. ދިވެހިން މިހާރު ބޭރު ގައުމުތަކުގައި ކާޑުން ހޭދަކުރާ މިންވަރު އިންތިހާއަށް ބޮޑެވެ. ބޭންކުން ބުނާ ގޮތުގައި މިއަހަރު މަހަކު ގާތްގަނޑަކަށް 39 މިލިއަން ޑޮލަރު ކާޑުތަކުން ހޭދަކުރެ އެވެ. އަދި ކޮންމެ މަހަކު 250،000 އާއި 300,000 އާ ދެމެދުގެ އަދަދެއްގެ ދިވެހިން ބޭރުގެ ވެބްސައިޓްތަކުގައި ރުފިޔާ ކާޑު ބޭނުންކުރެ އެވެ. ފާއިތުވި އަހަރުތަކުގައި އެ ބޭނުންތައް ފުއްދުމަށް ބޭންކުން ގާތްގަނޑަކަށް 1.6 ބިލިއަން ޑޮލަރު ވިއްކާފައިވެ އެވެ. މީގެ ތެރެއިން ބޮޑު ބަޔަކީ ކާޑު ޕޭމަންޓްތަކެވެ. މިއީ އެތައް ލައްކަ ބަޔަކު ބަރޯސާވާ ހިދުމަތަކަށް ވާއިރު، ބޭންކުން މަސައްކަތް ކުރަނީ އެ ހިދުމަތް މެދުނުކެނޑި ކުރިއަށް ގެންދިއުމަށެވެ.
ނަމަވެސް މި ދަތިކަމުގެ އަގު މިހާތަނަށް ދައްކަމުން އައީ ކޮންބައެއްތޯ ބަލާލަމާ ހިނގާށެވެ. އެއީ ހަމަ އަޅުގަނޑުމެންނެވެ. ބޭރު ގައުމެއްގައި ކާޑުން ހޭދަކުރުމުން ބޭންކުން ޑޮލަރަކަށް 15.42 ރުފިޔާއެއް ނުނަގަ އެވެ. އޭގެ ބަދަލުގައި 30 އިންސައްތައާ ހަމައަށް "ސާޗާޖް" އެއް އިތުރުކުރެ އެވެ. ފީއެއްގެ ނަމުގައި ނެގި ނަމަވެސް، މިއީ ހަމަ ކުރިން ބުނި އިތުރު އަގެވެ. މީގެ މާނައަކީ ޑޮލަރަކަށް ގާތްގަނޑަކަށް 20 ރުފިޔާ ދައްކަމުން އަންނަތާ އެތައް އަހަރެއް ވެއްޖެ ކަމެވެ. މި ހަފުތާގައި އަލަށް ކުރިމަތިވި ކަމަކީ އެ އިތުރު އަގު ނެގުމެއް ނޫނެވެ. އޭގެ ބަދަލުގައި، ބޭންކަށް ޑޮލަރު ވައްދާއިރު ވެސް އެ އިތުރު އަގު ދޭން ބޭންކުން ނިންމުމެވެ. އެއީ ބޮޑު އަގުގައި ޑޮލަރު ވިއްކުމަށްޓަކައި، ބޮޑު އަގުގައި ޑޮލަރު ގަތުމެވެ. މީގެ ނިޔަތް ރަނގަޅު ކަމަށް ބުނެވިދާނެ އެވެ. ނަމަވެސް ނުރައްކާ އޮތީ ފަރުމާކުރެވިފައިވާ ގޮތުގަ އެވެ.
ފަންސަވީސް އިންސައްތައިގެ މަންފާއެއް ލިބޭނެ ކަމަށް ބުނާ ކޮންމެ ސްކީމަކާ މެދު ކުރަންޖެހޭ އެންމެ މުހިންމު ސުވާލަކީ މިއެވެ؛ އެ ފައިސާ އަންނަނީ ކޮންތަނަކުން ހެއްޔެވެ؟ ބޭންކުގެ ޖަވާބަކީ އަޅުގަނޑުމެން ދޭ ޑޮލަރު ބޭނުންކޮށްގެން ފީތައް ހޯދަނީ ކަމަށެވެ. އޭގެ ތެރޭގައި ކާޑު ސާޗާޖް ހިމެނެ އެވެ. އަދި ލިބޭ މަންފާއަކީ އެ އާމްދަނީން ދޭ ބައެއް ކަމަށެވެ. އެއީ ވެދާނެ ގޮތެކެވެ. ނަމަވެސް ސާޗާޖް ބޮޑުކުރެވޭނީ ވެސް ވަކި ވަރަކަށެވެ. އެއަށްވުރެ ބޮޑުވެއްޖެނަމަ ކަސްޓަމަރުން އެކަމާ ދެކޮޅު ހަދާނެ އެވެ. ނުވަތަ ހޭދަކުރުން ހުއްޓާލާނެ އެވެ. އަދި މި ސްކީމުގައި ވައުދުވާ މަންފާ އަންނަނީ މަހުން މަހަށް އިތުރުވަމުންނެވެ. އެހެންކަމުން، މި ސްކީމް ތައާރަފުކުރި ރަސްމިއްޔާތުގައި އެއްވެސް މީހަކު ފާހަގަނުކުރި ކަމަކާ މެދު ވިސްނާލަމާ ހިނގާށެވެ. ބޭންކަށް ވަންނަ ޑޮލަރު ބޮޑު ބައެއް ބޭނުންކުރެވެނީ މިހާރު އޮތް ޑޮލަރުގެ ތަދުމަޑުކަން ފޫބެއްދުމަށާއި، ބޭންކަށް ހަމަޖައްސަން ދަތިވެފައިވާ ކާޑު ހަރަދުތަކަށެވެ. މިއަދުގެ އިންވެސްޓަރުންނަށް ދޭ މަންފާއަކީ އަސްލު އާމްދަނީން ދޭ އެއްޗަކަށް ނުވެ، މާދަމާ އިންވެސްޓްކުރާ މީހުން ވައްދާ ޑޮލަރުން ދޭ އެއްޗަކަށް ވާނަމަ، އެއީ އިންވެސްޓްމަންޓް އުފެއްދުމެއް ނޫނެވެ.
އެއީ "ޕިރަމިޑް" ސްކީމެކެވެ.
އަޅުގަނޑު އެއްވެސް ފަރާތަކުން ޕިރަމިޑް ސްކީމެއް ހިންގާ ކަމުގެ ތުހުމަތެއް ނުކުރަމެވެ. އަޅުގަނޑު މި އިޝާރާތް ކުރަނީ އޭގެ ހިންގުމުގެ ނިޒާމަށެވެ. ސަބަބަކީ އެ ނިޒާމުގެ ނުރައްކާތެރިކަން ބޮޑުވުމެވެ. މިފަދަ ނިޒާމެއް ވަރަށް ފުރިހަމައަށް ހިނގާނީ، އެއްބަސްވި ކަންތައް ކުރަން ޖެހުމުގެ ކުރިން އާ ޑޮލަރު ވަންނަމުންދާ ނަމަ އެވެ. ފަތުރުވެރިކަން ދަށް މޫސުމެއްގެ ސަބަބުން ނުވަތަ އިތުބާރު ކުޑަވުމުގެ ސަބަބުން ނުވަތަ ފެތުރޭ އަޑެއްގެ ސަބަބުން ޑޮލަރު ވަންނަ މިންވަރު މަދުވާ ދުވަހަކުން، ކުރިން ވެފައިވާ އެއްބަސްވުންތައް އުވިގެން ނުދާނެ އެވެ. އެއީ ޕިރަމިޑް ސްކީމެއްގެ އެންމެ ބޮޑު ސިފަ އެވެ. އަދި މިއީ ބީއެމްއެލް އިން ޖަވާބު ދީފައި ނުވާ ސުވާލެކެވެ؛ ބޭރަށްދާ ޑޮލަރަށް ވުރެ އެތެރެވާ ޑޮލަރު މަދުވާ ދުވަހަކުން ވާނީ ކިހިނެއް ހެއްޔެވެ؟
މި ހުރިހާ ކަމަކާ މެދު އުންމީދީ ނަޒަރަކުން ވެސް ވިސްނިދާނެ އެވެ. ބޭންކުތަކަކީ ރާއްޖޭގައި ބޭރު ފައިސާ ގަންނަ އެންމެ ބޮޑު އަދި އެންމެ ނިޒާމީ ފަރާތްތަކެވެ. އެ ފަރާތްތަކަށް މިނިވަންކަމާއެކު ބާޒާރުގައި ޑޮލަރަށް އަގު ހުށަހެޅުމުގެ ފުރުސަތު ލިބުމަކީ، އަގު ކަނޑައެޅުމުގެ ނިޒާމު ހިނގަން ފެށުމެވެ. ބާޒާރުގައި އޮތް އެންމެ ބާރުގަދަ ފަރާތް މިނިވަންވުމުން، ބީއެމްއެލްގެ ފަހަތުން އެހެން ބޭންކުތައް ވެސް ހިނގައިދާނެ އެވެ. މީގެ ނަތީޖާއަކަށް ވާނީ، ދިވެހިން އެތައް އަހަރެއް ވަންދެން ރެކެން އުޅުނު ކަމެއް ކުރިމަތިވުމެވެ. އެއީ ފައިސާގެ އަގު ބާޒާރުގެ އޮއިވަރަށް ދޫކޮށްލުމެވެ. ނުވަތަ "ފްލޯޓް" ކުރުމެވެ. އަގަކީ ތެދު އަގެއް ކަމަށް ބުނެ އެތައް އަހަރެއް ހޭދަކުރި އިގްތިސާދަކަށް، ބާޒާރުން ހަގީގީ އަގު ފެނުމަކީ ކުޑަ ކަމެއް ނޫނެވެ.
ނަމަވެސް، އިއްތިފާގަކުން ދިމާވާ "ފްލޯޓް" އަކާއި، ރޭވުންތެރިކަމާއެކު ކުރާ "ފްލޯޓް" އަކީ ތަފާތު ދެ ކަމެކެވެ. ރޭވުންތެރިކަމާއެކު މިފަދަ ބަދަލެއް ގެންނަނަމަ އެކަން އިއުލާނު ކުރާނެ އެވެ. އެކަން ކުރާނީ ވަކި ތަރުތީބަކުން، އިތުބާރު ހުރި ސިޔާސަތެއްގެ ދަށުން، އަދި ފައިސާގެ އަގު އިންތިހާއަށް ވެއްޓުނަނުދީ ހިފެހެއްޓޭނެ ފަދަ ރިޒާވެއް އޮވެގެންނެވެ. އޭގެ ބަދަލުގައި މިހާރު މި ފެންނަނީ، ރަސްމީ ރޭޓް ދައްކަން ބަހައްޓާފައި، އާ އުފެއްދުމެއްގެ ނަމުގައި ސިއްރުން ފައިސާގެ އަގު ދޫކޮށްލާފައިވާ ތަނެވެ. މީގެ ސަބަބުން އަގަށް އަންނަ ބަދަލުގެ ހުރިހާ ނުރައްކަލެއް ކުރިމަތިވާއިރު، އެކަން ކޮންޓްރޯލް ކުރާނެ އެއްވެސް އޮނިގަނޑެއް ނެތެވެ.
މި ހިސާބުން އަޅުގަނޑުމެން ދަނީ އެއްވެސް މީހަކަށް ކުރަން ނުކެރިފައިވާ ސުވާލަކާ ހަމައަށެވެ. މޯލްޑިވްސް މަނިޓަރީ އޮތޯރިޓީ (އެމްއެމްއޭ) އަށް މިކަން އެނގޭ ހެއްޔެވެ؟ އަދި އެ އިދާރާއިން މިކަމަށް އެއްބަސްވި ހެއްޔެވެ؟ މީގެ އެއްވެސް ޖަވާބަކީ ހިތްހަމަޖެހޭނެ ޖަވާބެއް ނޫނެވެ. ރެގިއުލޭޓަރު މިކަމަށް ހުއްދަ ދީފައިވާނަމަ، މަރުކަޒީ ބޭންކުން މިވަނީ ރައްޔިތުންނަށް އެންގުމަކާ ނުލައި ގައުމުގެ ފައިސާގެ ނިޒާމު ބަދަލުކޮށްފަ އެވެ. މަނިޓަރީ ސިޔާސަތު މި ހިންގަނީ ވިޔަފާރި ބޭންކެއްގެ މޮބައިލް އެޕް މެދުވެރިކޮށެވެ. ހުއްދަ ނުދޭނަމަ، ގައުމުގެ އެންމެ ބޮޑު ބޭންކުން މިވަނީ އަމިއްލައަށް ގައުމުގެ ފައިސާގެ ރޭޓް ކަނޑައަޅަން ފަށާފަ އެވެ. އަދި ރެގިއުލޭޓަރު އޮތީ ބަލާށެވެ. މަރުކަޒީ ބޭންކުގެ ބާރު ކެނޑިފައި އޮތުމަކީ ނުވަތަ އެހެން ބަޔަކު އެ ބާރު އަތުލުމަކީ އެއްވެސް މީހަކަށް ހަމަޖެހިގެން ނިދޭނެ ފަދަ ކަމެއް ނޫނެވެ.
މިއީ މިކަމުގައި އޮތް ނުރައްކާ ބޮޑުވާ ސަބަބެވެ. އުންމީދީ ނަޒަރަކުން ބެލިޔަސް، ބާޒާރުގެ ހަގީގީ ރޭޓެއް ގާއިމުކުރުމަކީ ސީރިއަސް ގައުމުތަކުން ރޭވުންތެރިކަމާއެކު، ރައްކާތެރިކަމުގެ ފިޔަވަޅުތަކާއެކު ކުރާ ކަމެކެވެ. އެއީ އިއްތިފާގަކުން ދިމާވާނެ ކަމަކަށް ދޫކޮށްލާނެ ކަމެއް ނޫނެވެ. އެ އުންމީދު އެއްފަރާތްކޮށްލުމުން ފެންނަން އޮތް އެންމެ ރަނގަޅު ގޮތަކީ، އެތައް އަހަރެއް ވަންދެން އިސްލާހު ނުކޮށް އޮތް ރޭޓާ ކުރިމަތިލުމުގެ ކުރިން ކުޑަ ވަގުތުކޮޅެއް ލިބުމެވެ. އެންމެ ގޯސް ހާލަތަކީ، އާންމު ޑިޕޮސިޓަރުންނާއި، ސަރުކާރުން ގެރެންޓީ ދީގެން ހިފަހައްޓާފައިވާ ބޭންކު އިނދަޖެހިގެން ދިއުމެވެ. ކުޑަ ވަގުތުކޮޅެއް ހޯދުމަށްޓަކައި މުޅި ނިޒާމު ނުރައްކަލަށް ހުށަހެޅުމަކީ ބުއްދިވެރި ކަމެއް ނޫނެވެ. މީގެ ފައިދާއަކީ ކުޑަ ދުވަސްކޮޅަކަށް ކަންކަން ފަސްވުމެވެ. ގެއްލުމަކީ މުޅި ނިޒާމު ގޮވުމެވެ.
މިކަމާ މެދު ދައްކަންޖެހޭ ތެދުވެރި ވާހަކައެއް އެބައޮތެވެ. ނަމަވެސް އަޅުގަނޑުމެން އެ ވާހަކައެއް ނުދައްކަމެވެ. އެއީ ރޭވުންތެރިކަމާއެކު ރޭޓަށް ބަދަލު ގެނައުމާއި، އެކަން ދިފާއުކުރާނެ މާލީ އަދަބުވެރިކަން ގެންގުޅުމާއި، ރިޒާވް ބިނާކުރުމުގެ މަޑުމައިތިރި މަސައްކަތެވެ. އެއީ ވޭން ހުރި، އުނދަގޫ މަސައްކަތެކެވެ. އަދި އެކަމުން ބޭއްވޭނެ ކުލަގަދަ ރަސްމިއްޔާތެއް ނޯންނާނެ އެވެ. ނަމަވެސް އެއީ މައްސަލައަށް އޮތް ހަގީގީ ހައްލެވެ. މައްސަލަ ރީތިކޮށް ފަރުމާކޮށްފައި 25 އިންސައްތައިގެ އަގުގައި އަޅުގަނޑުމެންނަށް އަލުން ވިއްކުމެއް ނޫނެވެ.
ރަސްމީ ރޭޓަކީ އަޅުގަނޑުމެން ހިމޭނުން ތިބިއިރު ގަބޫލުކުރި ހިޔާލީ ވާހަކައެކެވެ. މިހާރު އެކަމުގެ ވާހަކަ މިވަނީ ބާރުވެފަ އެވެ. މާދަމާ ލިބޭ މަންފާއާއެކު މީގެ އަގު އަދާކުރަން ނުޖެހިދާނެ އެވެ. ނަމަވެސް، އެ އަގު ކޮންމެވެސް ދުވަހަކުން ދައްކަން ޖެހޭނެ އެވެ.
