ބޭރު ފައިސާއާ ބެހޭ ގާނޫނުގެ ދަށުން ޑޮލަރު މާރުކުރާއިރު، ޑޮލަރުން ލިބޭ އާމްދަނީގެ 40 ޕަސެންޓު މާރުކުރަން ޖެހޭ ގޮތަށް ގާނޫނު ބަދަލުކުރަން ރައްޔިތުންގެ މަޖިލީހަށް ހުށަހަޅަން ނިންމާފައިވާ ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ގަވަރުނަރު އަހުމަދު މުނައްވަރު މިއަދު ވިދާޅުވެއްޖެ އެވެ.
ޑޮލަރު ތާށިކަމުގެ މައްސަލައިގައި ސަރުކާރުން އަޅާ ފިޔަވަޅުތައް އިއުލާންކުރަން ރައީސް އޮފީހުން ބޭއްވި ނޫސްވެރިންގެ ބައްދަލުވުމެއްގައި މުނައވްަރު ވިދާޅުވީ، މިހާރު އޮންނަ ގޮތަށް ބޮލަަކަށް 500 ޑޮލަރު ނޫނީ އާމްދަނީގެ 20 ޕަސެންޓު މާރުކުރަން ޖެހޭ ގޮތަށް އޮތް ބައި ބަދަލުކުރަން ވަރަށް އަވަހަށް ހުށަހަޅާނެ ކަމަށެވެ.
މި ބަދަލުތައް ގެންނަން ބޭނުންވާ ސަބަބެއް ކަމަށް މުނައްވަރު ވިދާޅުވީ، ޑޮލަރުގެ އެކްސްޗޭންޖު ރޭޓު ކަނޑައެޅުމުގެ މާލީ ބާރުވެރިކަން އެމްއެމްއޭއަށް ނެގުމެވެ. އޭނާ ވިދާޅުވީ، މިކަން ކުރެވެން އޮތް ހަމައެކަނި ގޮތަކީ މަރުކަޒީ ބޭންކަށް ވަންނަ ޑޮލަރުތައް އިތުރުކޮށް، ޑޮލަރުގެ ރިޒާވެއް ގާއިމު ކުރެވިގެން ކަމަށެވެ.
"އަޅުގަނޑުމެން އެހެން ގައުމުތަކަށް ބަލާއިރުގައި މިސާލަކަށް ފިކްސްޑް ރެޖީމެއްގައި ވެއްޖިއްޔާމުން ރިޒާވު ހުންނާނެ އަޅުގަނޑުމެންނަށް މިސާލަކަށް އެ އެ ބޭނުންވާ ވަރަކަށް އިންޓަވެންޝަން ކުރެވޭ." މުނައްވަރު ވިދާޅުވި އެވެ.
އެމްއެމްއޭގައި ޑޮލަރު ރިޒާވު އިތުރުކޮށް، މި މައްސަލައަށް ދާއިމީ ހައްލެއް ގެނެވޭނީ މުނައްވަރު ވިދާޅުވި ގޮތުގައި، އެމްއެމްއޭއަށް މާރުކުރާ ޑޮލަރު އިތުރުކުރެވިގެން ކަމަށެވެ. އަދި، މިއީ އެމްއެމްއޭގެ ހުރިހާ ގަވަރުނަރު ވެސް ހިއްސާކުރެއްވި އަދި އިއްތިފާގުވާ ތަސައްވުރެއް ކަމަށް އޭނާ ވިދާޅުވި އެވެ.
މި ބަދަލުގެ އިތުރުން، މިހާރު އޮންނަ ތިން މަސް ދުވަހުގެ ބަދަލުގައި ޑޮލަރު މާރުކުރަން ޖެހޭ މުއްދަތު މަސް ދުވަހަށް މަދުކުރަން ވެސް އެމްއެމްއޭއިން ވަނީ ނިންމާފަ އެވެ. ހަމައެހެންމެ، އާމްދަނީ ލިބޭ ކަމުގައި ވަނީ ނަމަ، ބޭންކުތަކަށް މާރުނުކުރާ ފައިސާ ހޭދަ ކުރަނީ ކޮން ގޮތަކަށް ކަންކަން ބެލޭނެ އުސޫލުތަކެއް ގާނޫނުގައި ހިމަނަން ވެސް ވަނީ ނިންމާފަ އެވެ.
ގަވަރުނަރު މި ބަދަލުތައް އިއުލާންކުރެއްވިއިރު، ރިސޯޓުތަކަށް ޑޮލަރުގެ އިހުތިޔާރު އުވާލަން ގާނޫނު ބަދަލުކުރުމުގެ ބިލު މިހާރު ވެސް އޮތީ ރައްޔިތުންގެ މަޖިލީހުގައި އެވެ. މި މަހުގެ 12 ގައި މަޖިލީހުގައި ފުރަތަމަ ކިޔުން އިއްވި މި ބިލުގެ މިހާރު ކުރިއަށް ދަނީ ކޮމިޓީ މަރުހަލާ އެވެ.
ކޮމިޓީ މަރުހަލާގެ ތެރެއިން ސަރުކާރު ހިންގާ ޕީއެންސީގެ މެންބަރުން ވަނީ އެމްއެމްއޭއިން ހުށަހެޅި ކަންކަމުގެ އިތުރުން، ކަޅު ބާާޒާރުގައި ޑޮލަރު ވިއްކާ އަގުގެ ވާހަަކަ ދެއްކުން މަނާކުރާށާއި ރަސްމީ ރޭޓަށް ވުރެ ބޮޑުކޮށް ޑޮލަރު ވިއްކާ ނަމަ ޖޫރިމަނާކުރަން ވެސް ގާނޫނުގައި ހިމަނަން ނިންމާފަ އެވެ.
