އިރާނު ހަނގުރާމައާ ގުޅިގެން ޑޮލަރުގެ މާކެޓަށް ވަގުތީ ހީނަރުކަމެއް އައި ނަމަވެސް، ޑޮލަރުގެ އަގު މިހާ ބޮޑަށް މައްޗަށް ދާން ޖެހޭ ސަބަބެއް ނުފެންނަ ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ގަވަރުނަރު އަހުމަދު މުނައްވަރު މިއަދު ވިދާޅުވެއްޖެ އެވެ.
ބޭރު ފައިސާގެ ގާނޫނަށް ގެންނަ ބަދަލުތަކާއި ތަންފީޒީ ނިޒާމު ހަރުކަށި ކުރުމާ ގުޅޭ ގޮތުން މައުލޫމާތު ދޭން ރައީސް އޮފީހުގައި ބޭއްވި ބައްދަލުވުމެއްގައި، މުނައްވަރު ވެސް ވަނީ އަގުގެ މައްސަލައިގެ ފަހަތުގައި ވަނީ ސްޕެކިއުލޭޝަން ނޫނީ ބަޔަކު ރޭޓުތައް ކަނޑައެޅުން ވިދާޅުވެފަ އެވެ.
މުނައްވަރު ވިދާޅުވީ، އެމްއެމްއޭއިިން އެއްކުރި ތަފާސްހިސާބުތަކުން ދައްކަނީ ޓޫރިސްޓުން އަންނަ ޖުމްލަ އަދަދު މަދުވީ ކަމުގައި ވިޔަސް، ޓޫރިޒަމަށް ވަންނަ އާމްދަނީ ވަނީ ޕަސެންޓެއް އިތުރުވެފައިވާ ކަމަށެވެ. އަދި، ބޭންކުތަކުގައި ހުރި ޑޮލަރު ޑިޕޮސިޓުތަކާއި ކްރެޑިޓު ވެސް 18 ޕަސެންޓު އިތުރުވެފައިވާ ކަމަށް އޭނާ ވިދާޅުވި އެވެ.
މި އަހަރުގެ ތެރޭގައި އަމިއްލަ މީހުންނާއި ވިޔަފާރިތަކަށް ލިބުނު ޑޮލަރާއި ރައްކާކުރި ޑޮލަރު އިތުރުވީ ނަމަވެސް، ދައުލަތުގެ ޑޮލަރު ރިޒާވު ވަނީ ދަށްވެފަ އެވެ. މުނައްވަރު ވިދާޅުވީ، މިހެން ދިމާވީ ތެލަށް ކުރަން ޖެހޭ ހަރަދު އިތުރުވެފައިވާތީ ކަމަށެވެ. އޭނާ ވިދާޅުވީ، ތެލަށް ކުރާ ހަރަދުތައް ދެ ގުނަ މަތިވެ، ޔޫކްރެއިން ހަނގުރާމަ ފެށި އަހަރަށް ވުރެ ވެސް ތެލަށް ކުރާ ހަރަދުތައް ބޮޑު ކަމަށެވެ.
މި އަދަދުތަކަށް ރިއާޔަތްކުރަމުން މުނައްވަރު ވިދާޅުވީ، ޑޮލަރުގެ އަގު އުުފުލެން ފެށީ ޑޮލަރު މާރުކުރުމުގެ ސިޔާސަތު ތަންފީޒުކުރަން ފެށުމުގެ ގޮތުން ޓޫރިޒަމް ސިނާއަތުގެ ސްޓޭކްހޯލްޑަރުންނާ މަޝްވަރާކުރަން ފެށި ހިސާބުން ކަމަށެވެ. އަދި، މިވާ ގޮތެއް ބެލުމުގެ ގޮތުން މަނީ ޗޭންޖަރުންނަށް އަމާޒުކޮށްގެން އެމްއެމްއޭއިން ހާއްސަ އޮޕަރޭޝަނެއް ފެށި ކަމަށް އޭނާ ވިދާޅުވި އެވެ.
"ޑޮލަރުގެ މާކެޓަށް ވަގުތީ ހީނަރުކަމެއް އައި ނަމަވެސް، މި ހިސާބަށް ދާއިރުގައި ވެސް އަޅުގަނޑުމެންނަކަށް ނުފެނޭ މިހާ ބޮޑަށް ރޭޓު މައްޗަށް ދާން ޖެހޭ ސަބަބެއް. އެހެންވީމަ މީގައި އެބައުޅޭ ވަރަށް ބޮޑަށް ސްޕެކިއުލޭޓިވް އެލެމަންޓުތަކެއް އުޅޭ ކަމަށް ވަރަށް ބޮޑަށް ފާހަަގަކުރެވޭތީވެ، އަޅުގަނޑުމެންނަށް މަނީ ޗޭންޖަރުންނަށް ހާއްސަ ގޮތެއްގައި ވަރަށް ބޮޑަށް، އެ ބޭފުޅުން ކުރާ އޮޕަރޭޝަންސްތައް މި ދިޔައީ މޮނީޓާ ކުރަމުން،" މުނައްވަރު ވިދާޅުވި އެވެ.
އެމްއެމްއޭއިން ހިންގި މި އޮޕަރޭޝަނުން ފާހަގަ ކުރެވުނު ގޮތުގައި ޑޮލަރުގެ ކަޅު ބާޒާރު ހިނގަނީ ޑޮލަރުން އާމްދަނީ ލިބޭ މީހުންނާއި ކަޅު ބާޒާރަށް ޑޮލަރު މާރުކުރާތީ އެވެ. މިކަން ކުރަނީ މަނީ ޗޭންޖަރުން މެދުވެރިކޮށް ކަމަށް މުނައްވަރު ވިދާޅުވި އެވެ.
މި މަނީ ޗޭންޖަރުތަކާ ގުޅިގެން ހިނގި އޮޕަރޭޝަންގެ ތަފާސްހިސާބުތައް ހިއްސާކުރައްވަމުން ނޫސްވެރިންގެ ބައްދަލުވުމުގައި ބައިވެރިވި ހޯމް މިނިސްޓަރު އަލީ އިހުސާން ވިދާޅުވީ، ކަޅު ބާޒާރުގައި އެއްވެސް ހުއްދައެއް ނެތި ޑޮލަރު މާރުކުރާ ގިނަ ބަޔަކު ހަރަކާތްތެރިވާ ކަން ފާހަގަކުރެވިފައިވާ ކަމަށެވެ. އޭގެ މިސާލެއް ދެއްވަމުން އޭނާ ވިދާޅުވީ، ހުއްދަ ނަގައިގެންނާއި ހުއްދަ ނުނަގާ ހިންގާ ހަތް މަނީ އެކްސްޗޭންޖެއް މޮނީޓާ ކުރިއިރު، ނުވަ މަސް ދުވަހުގެ ތެރޭގައި 76 މިލިއަން ޑޮލަރު މާރުކޮށްފައިވާ ކަން އެނގިފައިވާ ކަމަށެވެ.
ޑޮލަރު ތާށިކަމުގެ މައްސަލައިގައި ނިޒާމު އިތުރަށް ހަރުކަށިކޮށް، އާންމު ރައްޔިތުން ޑޮލަރު މާރުކުރުން މަނީ ލޯންޑްރިންއާ އެއް ފަދަ ކުރިއިރު، އިގުތިސޯދީ މާހިރުން ބުނަނީ މި ހުރިހާ ކަމެއް ކުރިޔަސް ސަރުކާރުގެ ހަރަދުތައް ކުޑަ ނުކުރަނީސް މި މައްސަލަ ހައްލު ނުވާނެ ކަމަށެވެ.
