ޕެރިސް (މެއި 11) - ފްރެންޗް ލީގުގައި ރޭ ބްރެެސްޓްގެ މައްޗަށް 1-0 އިން ކުރިހޯދައި ޕީއެސްޖީން ޖެހިޖެހިގެން ފަސް ވަނަ ސީޒަނުގައި ލީގު ޗެމްޕިއަންކަން ހޯދުމާ ފިޔަވަޅަކާ ގާތަށް ޖެހިލައިފި އެވެ.
ފްރެންޗް ލީގުގައި ޕީއެސްޖީ އަށް ބާކީ އޮތީ ދެ މެޗެެވެ. އެއް ވަނައިގައި ޕީއެސްޖީ އޮތީ 32 މެޗުން 73 ޕޮއިންޓް ހޯދައިގެންނެވެ. ދެ ވަނައިގައި އޮތް ލޯންސް އަށް ވަނީ 32 މެޗުން 67 ޕޮއިންޓް ލިބިފަ އެވެ. ލޯންސް އިން ވަނީ މި ހަފްތާގައި ކުޅުނު މެޗުން ނޯންޓެސް އަތުން 1-0 އިން މޮޅުވެފަ އެވެ.
ލީގުގެ އެއް ވަނައިގައި ޕީއެސްޖީން ހަ ޕޮއިންޓުގެ ލީޑެއްގައި އޮތްއިރު، ބުދަ ދުވަހުގެރޭ ލޯންސާ ކުޅޭ މެޗުން ޕީއެސްޖީ އަށް ޗެމްޕިއަންކަން ޔަގީންކުރެވޭނެ އެވެ.
ޕީއެސްޖީން އެ ކްލަބްގެ ތާރީހުގައި ފުރަތަމަ ފަހަރަށް ޖެހިޖެހިގެން ދެ ވަަނަ ފަހަރަށް ޗެމްޕިއަންސް ލީގުގެ ފައިނަލަށް ދަތުރުކުރުމަށް ފަހު، ކުޅުނު ފުރަތަަމަ މެޗުގައި ރޭ ބްރެސްޓާ ދެކޮޅަށް ނުކުތީ ފުރަތަމަ އެގާރަ އަށް ނުވަ ބަދަލެއް ގެނެސްގެންނެވެ. ރޭގެ މެޗުގައި ޕީއެސްޖީން ފުރަތަމަ ހަމަލާ ފޮނުވާލީ ފުލްބެކް، ލޫކަސް ހެނާންޑޭޒް އެވެ. ހެނާންޑޭޒް ފޮނުވާލި ހަމަލާ ބްރެސްޓްގެ ކީޕަރު، ގްރެގޯރީ ކޫޑޭ ވަނީ މަތަކޮށްފަ އެވެ.
އޭގެ ފަހުން، ޕީއެސްޖީގެ 18 އަހަރުގެ ފޯވާޑް، ޑްރޯ ފެނާންޑޭޒް ޖެހި ޝޮޓް ދިޔައީ ދަނޑިކައިރިން ބޭރުންނެވެ. އަދި، އޭގެ ފަހުން، ޕީއެސްޖީގެ ލީ ކަންގް އިން ނަގައިދިން ހުރަހެއް ގޮންޒާލޯ ރާމޯސް ގޯލަށް ވައްދާލުމުގެ ކުރިން ބްރެސްޓްގެ ރަފައެލް ލެ ގުއެން ވަނީ ބްލޮކްކޮށްފަ އެވެ.
ލަނޑެއް ނުޖެހި ގަޑިއިރެއްހާއިރު ކުޅެވުނުތަނާ ޕީއެސްޖީން ވަނީ ބަދަލަކަށް ކްވިޗާ ކްވަރަޝްކޭލިއާ އާއި އޮސްމާން ޑެމްބެލޭ އަދި ޑެޒެއާ ޑޫއޭ ކުޅެން އަރުވައިފަ އެވެ. އޭގެ ފަަހުން، ޕީއެސްޖީ އަށް ލީޑުނަގައިދޭން ސެނީ މަޔޫލޫ ފޮނުވާލި ބޯޅައެއް އަމާޒުވީ ގޯލުގެ ހުރަސްދަނޑިއަށެވެ.
މެޗުގައި ފެނިގެންދިޔަ ހަމައެކަނި ލަނޑު 82 ވަނަ މިނިޓްގައި ކާމިޔާބުކުރީ ޑޫއޭ އެވެ. އޭރިއާބޭރުން ޑޫއޭ ތިރިތިރިން ފޮނުވާލި ބޯޅަ އަމާޒުވީ ގޯލުގެ ތިރީ ކަަނަށެވެ. ބްރެސްޓްގެ ކީޕަރު، ކޫޑޭ އަށް އެ ބޯޅަ ހުއްޓުވޭނެ އެއްވެސް ގޮތެއްނުވި އެވެ.
މިއީ، ބްރެސްޓްގެ އަތްދަށުނުވެ، ޕީއެސްޖީން ޖެހިޖެހިގެން ނިންމާލި 34 ވަނަ މެޗެވެ. އެ ގޮތުން، އެ މެޗުތަކުގައި 26 މެޗުން ޕީއެސްޖީ މޮޅުވިއިރު، އަށް މެޗު ނިމުނީ އެއްވަރުވެގެންނެވެ.
