ޕެރިސް (އޭޕްރީލް 27) - އަންނަ ޖޫން މަހު، އެމެރިކާ، މެކްސިކޯ އަދި ކެނަޑާގައި ފަށާ ފީފާ ވޯލްޑް ކަޕް ފުޓްބޯޅަ މުބާރާތާ މެދު ވިސްނާފައި، ކްލަބް ފުޓްބޯޅަ ސީޒަނުގެ އެންމެ މުހިންމު ހިސާބުގައި ކުޅުންތެރިން ރެސްޓް ކުރުމަކީ ކްލަބްތަކުގެ ކޯޗުންނަށް ކުރެވޭނެ ކަމެއް ނޫން ކަމަށް ޕީއެސްޖީގެ ކޯޗު، ލުއިސް އެންރީކޭ ބުނެފި އެވެ.
ހަތަރު އަހަރުން އެއް އަަހަރު ކުޅޭ ދުނިޔޭގެ އެންމެ ބޮޑު ފުޓްބޯޅަ މުބާރާތް، ފީފާ ވޯލްޑް ކަޕް ފަށަން 50 އަށް ވުރެން މަދު ދުވަސްކޮޅެއް އޮތްއިރު، ކްލަބް ފުޓްބޯޅައިގައި ވޭތުވެދިޔަ މަހެއްހާ ދުވަސްތެރޭ ގިނަ ކުޅުންތެރިންތަކަކަށް އަނިޔާވެ، މި އަހަރުގެ ވޯލްޑް ކަޕުން ފެނުމުގެ ފުރުސަތު ވަނީ ގެއްލިފަ އެވެ. އެހެންވެ، ގައުމީ ޓީމުތަކުގެ ކޯޗުންނާއި ފުޓްބޯޅަ ފެޑެރޭޝަންތަކުން އަންނަނީ ކޮންމެ ތިން ދުވަހަކުން، އިންތިހާ އަށް ވާދަވެރި މެޗުތަކުގައި ކުޅުންތެރިން ކުޅެން ޖެހޭ ކަމުގެ ޝަކުވާ ކުރަމުންނެވެ.
ޔޫރަޕްގެ އެންމެ ފަހުގެ ޗެމްޕިއަން، ޕީއެސްޖީގެ ކޯޗު އެންރީކޭ ބުނީ، އޭނާ އަށް ފުރަަތަމަ އޮތީ އަމިއްލަ ވަޒީފާއާ މެދު ވިސްނުން ކަމަށާއި އެހެންކަމަކާ މެދު ފިކުރުކުރެވޭނީ އޭގެ ފަހުން ކަމަށެވެ.
"އަހަންނަކީ ޕެރިސް ސެއިން ޖާމެއިން (ޕީއެސްޖީ)ގެ ކޯޗު، އެހެން ކަންކަމާ މެދު އަހަރެން ވިސްނަންޖެހޭނީ، ފުރަތަމަ ކުރަން ޖެހޭ ކަންކަމަށް ފަހު. (ވޯލްޑް ކަޕާ ދިމާކޮށް ކުޅުންތެރިން ރެސްޓް ކުރުމުގެ ވާހަކަ) އެ ކަންކަމަކީ އަހަރެން ވިސްނަން ޖެހޭ ކަމެއް ނޫން. އަހަރެން އެންމެ ފުރަތަމަ މެނޭޖްކުރަން ޖެހެނީ ޕީއެސްޖީގެ ހާލަތު، އެއީ އަހަރެންގެ ވަޒީފާގައި ވަރަށް ސާފުކޮށް އޮތް ކަމެއް،" 2022 ވަނަ އަހަރުގެ ވޯލްޑް ކަޕްގައި ސްޕެއިނުގެ ކޯޗަކަށް ހުރި އެންރީކޭ ބުންޏެވެ.
ޕީއެސްޖީގެ ބައެއް ކުޅުންތެރިން މެޗުތަކުގައި ކުޅެނީ އެއްކޮށް ފިޓްނުވެ ކަމަށާއި އެކަމަކު، އެއީ ކުޅުންތެރިން ވެސް އިހުތިޔާރުކުރާ ގޮތް ކަމަށް އެންރީކޭ ވަނީ ބުނެފަ އެވެ.
ފްރެންޗް ލީގުގެ އެއް ވަނައިގައި އޮތް ޕީއެސްޖީން ޗެމްޕިއަންސް ލީގުގެ ސެމީ ފައިނަލުގައި ކުޅެން ޖެެހެނީ، 35 ވަނަ ފަހަރަށް ޖަރުމަނު ލީގުގެ ޗެމްޕިއަންކަން ހޯދާފައިވާ ބަޔާން މިއުނިކާ ދެކޮޅަށެވެ.
