ޕެރިސް (އޭޕްރީލް 21) - މެންޗެސްޓާ ޔުނައިޓެޑަކީ އަބަދުވެސް އޭނާ ޝައުގުވެރިވާ ކްލަބެއް ކަމަށް ރެއާލް މެޑްރިޑްގެ ލޯން އެއްބަސްވުމެއްގެ ދަށުން ފްރާންސްގެ ލިޔޯނަށް ކުޅެމުން އަންނަ ބްރެޒިލްގެ ޒުވާން ފޯވާޑް، އެންޑްރިކް ބުނެފި އެވެ.
ރެއާލްގައި އެކަށީގެންވާ ވަރަށް ކުޅުމުގެ ފުރުސަތު ނުލިބޭތީވެ، އެންޑްރިކް، 19، ވަނީ ޖެނުއަރީ ޓްރާންސްފާގައި ލިޔޯނަށް ބަދަލުވެފަ އެވެ. ލިޔޯންގެ ފުރަތަމަ އެގާރައިގައި ގިނަ މެޗުތަކެއް ކުޅެ، މުހިންމު ގޯލުތަކެއް ޖަހަމުން އަންނަ އެންޑްރިކް އަކީ ފްރެންޗް ލީގުގައި ލިޔޯނުން އެންމެ ފަހުން ކުޅުނު މެޗުގައި 2-1 އިން ޕީއެސްޖީ ބަލިކުރިއިރު، އެންމެ ރަނގަޅު ކުޅުމެއް ދެއްކި ކުޅުންތެރިޔާ އެވެ. އެންޑްރިކް ވަނީ އެ މެޗުގައި ގޯލެއް ޖެހުމުގެ އިތުރުން ގޯލެއް ޖަހަން ފުރުސަތު ތަަނަވަސްކޮށްދީފަ އެވެ.
ލިޔޯނަށް ބަދަލުވެ، 17 މެޗުން ހަތް ގޯލު ޖަހައި، ހަތް ގޯލު ޖަހަން ފުރުސަތު ހޯދައިދީފައިވާ، އެންޑްރިކް އަށް އަންނަ ސީޒަނުގައި ރެއާލުން ގިނަ ފުރުސަތުތަކެއް ދޭނެ ކަމަށް ސްޕެއިނުގެ ނޫސްތަކުން ރިޕޯޓްކޮށްފައިވެ އެވެ.
ފޯފޯޓޫ މެގަޒިން އަށް ދިން އިންޓަވިއުއެއްގައި އެންޑްރިކް ބުނެފައިވަނީ، ފުޓްބޯޅައިގައި އޭނާ އެންމެ ބޮޑަށް ބަލައިގަންނަ އެއް ކުޅުންތެރިއަކީ ކްރިސްޓިއާނޯ ރޮނާލްޑޯ ކަމަށެވެ. އަދި، ރޮނާލްޑޯގެ ކެރިއަރު ދިޔަ ގޮތް ވަރަށް ގަޔާވާ ކަމަށާއި އެ ގޮތުން، ޔުނައިޓެޑަކީ ވެސް ކަމުދާ ކްލަބެއް ކަމަށެވެ.
"އަހަރެން ރޮނާލްޑޯގެ ކެރިއަރު ދިޔަ ގޮތް ވަރަށް ބަލަން. މެންޗެސްޓާ ޔުނައިޓެޑް، ރެއާލް މެޑްރިޑް، ޔުވެންޓަސް ދެން މިހާރު އަލް ނަސްރު. ކޮންމެ ތަނެއްގައި ރޮނާލްޑޯ ކުޅުނަސް އަހަރެން އެ ދިމާލަކަށް ޝައުގުވެރިކަން ބަހައްޓަން،" އެންޑްރިކް ބުންޏެވެ.
"ޔުނައިޓެޑަކީ ރޮނާލްޑޯ އެންމެ ރަނގަޅަށް ކެރިއަރު ފެށިތަން. އަހަރެން ބޮޑުވީ އެ މަންޒަރުތައް ބަލަމުން. އެހެންވެ، މެންޗެސްޓާ ޔުނައިޓެޑަށް އަބަދުވެސް ހާއްސަ ޝައުގުވެރިކަމެއް ހުރޭ،"
އެންޑްރިކް ގަންނަން ރެއާލުން އެއްބަސްވުމަކަށް އައީ އޭނާގެ އުމުރުން 18 އަހަރު ނުވަނިސް އެވެ. އެއީ، 2022 ވަނަ އަހަރު އެވެ. އެންޑްރިކް، ރެއާލަށް ހަ އަހަރުގެ އެއްބަސްވުމެއްގެ ދަށުން ސޮއިކުރީ 2024 ވަނަ އަހަރު އެވެ. ރެއާލުން ވަނީ މި ޑީލުގައި ޕަލްމެއިރަސް އަށް ޖުމްލަ އެކު، 70 މިލިއަން ޑޮލަރު ދައްކާނެ އެވެ.
