ޕެރިސް (މެއި 3) - ފްރެންޗް ލީގުގެ އެއް ވަނައިގައި އޮތް ޕީއެސްޖީން މި ހަފްތާގައި ކުޅުނު މެޗުގައި މޮޅުނުވުމުގެ ފައިދާނަގަން ލީގުގެ ދެ ވަނައިގައި އޮތް ލޯންސް އަށް ލިބުނު ފުރުސަތު ގެއްލިއްޖެ އެވެ.
ޕީއެސްޖީން ހުކުރު ދުވަހުގެރޭ ކުޅުނު މެޗުގައި އަމިއްލަ ދަނޑުގައި 2-2 އިން ލޯރިއަންޓާ އެއްވަރުވިއިރު، ލޯންސް އިން ވަނީ ރޭ ރަށުންބޭރުގައި ނީސްއާ 1-1 އިން އެއްވަރުވެފަ އެވެ.
ލީގުގެ އެއް ވަނައިގައި އޮތް ޕީއެސްޖީ އަށް 31 މެޗުން ވަނީ 70 ޕޮއިންޓް ލިބިފަ އެވެ. ދެ ވަނައިގައި އޮތް ލޯންސް އަށް ވަނީ 31 މެޗުން 64 ޕޮއިންޓް ލިބިފަ އެވެ. ތިން ވަނައިގައި އޮތް ލިޔޯނަށް 31 މެޗުން 57 ޕޮއިންޓް ލިބިފައިވާއިރު، ހަތަރެއްގައި އޮތް ލިލް އަށް ވެސް ވަނީ 31 މެޗުން 57 ޕޮއިންޓް ލިބިފަ އެވެ.
ޕީއެސްޖީން އިބްރާހިމް އެމްބާއޭގެ ގޯލުން ލީޑުނެގި މި މެޗުގައި ލޯރިއަންޓުން ވަނީ ޕަބްލޯ ޕަގިސް ޖެހި ގޯލުން އެއްވަރުކޮށްފަ އެވެ. ދެ ވަނަ ހާފުގައި ވަރެން ޒައިރް އެމެރީ ލަނޑު ޖަހައި ޕީއެސްޖީ އަށް އަލުން ލީޑުނަގައިދިންއިރު، ލޯރިއަންޓުން އެއްވަރުކުރީ ބަދަލަަކަށް ކުޅެން އަރައި، މެޗު ނިމެން 12 މިނިޓަށް ވެފައި ވަނިކޮށް ޓޮސިން އައިޔެގުން ޖެހި ގޯލުންނެވެ.
ލޯންސް އިން ވަނީ ރޭގެ މެޗުގެ 60 ވަނަ މިނިޓްގައި އެލަން ސެއިން-މެކްސިމިން ޖެހި ލަނޑުން ލީޑުނަގައިފަ އެވެ. އެކަމަކު، ލޯންސްގެ ފުލްބެކް، ސައުދު އަބްދުލްހަމީދަށް މެޗުގެ 80 ވަނަ މިނިޓްގައި ރަތެއް ދެއްކުމުން، އެ ޓީމުގެ އެއް ކުޅުންތެރިއަކު މަދުވުމުގެ ފައިދާނަގައި، ނީސް އިން ވަނީ އެއްވަރުކޮށްފަ އެވެ. މެޗުގެ 84 ވަނަ މިނިޓްގައި މި ގޯލު ޖެހީ އަލީ އަބްދީ އެެވެ.
ފްރެންޗް ލީގުގައި ރޭ މެޓްޒް އަތުން 2-1 އިން މޮނާކޯ މޮޅުވި މެޗުގައި އެ ޓީމުގެ ފުރަތަމަ އެގާރައިގައި ޕައުލް ޕޮގްބާ ވަނީ ކުޅެފަ އެވެ. މިއީ، 2024 ވަނަ އަހަރުގެ މެއި މަހު ޔުވެންޓަސްގެ މެޗެއްގައި ފުރަތަމަ އެގާރައިގައި ކުޅުމުގެ ފަހުން، ޓީމެއްގެ ފުރަތަމަ އެގާރައިގައި މެޗެއް ކުޅުނު ފުރަތަމަ ފަހަރެވެ.
