މިއުނިކް (މެއި 7) - ބަޔާން މިއުނިކް ދަނޑުގައި އެއްވަރުކޮށް، އެ ޓީމު ކަޓުވާލުމަށް ފަހު، ޗެމްޕިއަންސް ލީގުގެ އެންމެ ފަހުގެ ޗެމްޕިއަން، ޕީއެސްޖީން މި ފަަހަރުގެ މުބާރާތުގެ ފައިނަލަށް ދަތުރުކޮށްފި އެވެ.
މިދިޔަ ހަފްތާގައި ޕީއެސްޖީ ދަނޑުގައި 5-4 އިން މޮޅުވިއިރު، މިރޭ ބަޔާން ދަނޑުގައި 1-1 އިން އެއްވަރުވެ، ޕީއެސްޖީން ކުރިހޯދީ 6-5 ގެ އެގްރިގޭޓުންނެވެ.
މިދިޔަ އަހަރުގެ ފައިނަލުގައި އިންޓަ މިލާން 5-0 އިން ބަލިކޮށް ޗެމްޕިއަންސް ލީގުގެ ތަށި ފުރަތަމަ ފަހަރަށް އުފުލާލި ޕީއެސްޖީން މި ފަހަރުގެ މުބާރާތުގައި ތަށި ދިފާއުކުރަން ފައިނަލުގައި ކުޅޭނީ މި މަހު 30 ވަނަ ދުވަހު އާސެނަލާ އެެވެ. މި ފަަހަރުގެ ފައިނަލަށް އާސެނަލް ދަތުރުކުރީ މެޗަކުން ބަލިނުވެ އެވެ. އާސެނަލް، ޗެމްޕިއަންސް ލީގުގައި އެންމެ ފަހުން ބަލިވީ ޕީއެސްޖީ އަތުން މިދިޔަ އަހަރުގެ މުބާރާތުގެ ސެމީ ފައިނަލުގަ އެވެ.
ބަޔާންގެ އަލިއާންޒް އެރީނާގައި ކުޅުނު ސެމީ ފައިނަލް މެޗު ފަށައިގެން ތިން ވަނަ މިނިޓްގައި ޕީއެސްޖީން ލަނޑު ޖަހައި ލީޑުނެގި އެވެ. މި ލަނޑު ޖެހީ ޕީއެސްޖީގެ ކްވިޗާ ކްރަވަޝްކޭލިއާ ދިން ބޯޅައަކުން އޮސްމާން ޑެމްބެލޭ އެވެ.
ރެފްރީ ޖޮއާއޯ ޕިންހޭރޯގެ ނިންމުންތަކާ މެދު ބަޔާންގެ ހިތްހަމަނުޖެހުން މި މެޗުގައި ބޮޑުވި އެވެ. އެ ގޮތުން، މި މެޗުގައި، އެ ޓީމުން ވަނީ ޕީއެސްޖީގެ ޕޯޗުގީސް ފުލްބެކް، ނޫނޯ މެންޑޭސް އަށް ދެ ވަަނަ ރީނދޫ ކާޑެއް ނުދެއްކި ނިންމުމާއި ޕީއެސްޖީގެ ޖޮއާއޯ ނެވޭސް އަތުގައި އޭރިއާތެރެއިން ޖެހުނު ބޯޅަ އަށް ޕެނަލްޓީ ނުދިން ނިންމުމާ މެދު ބަޔާންގެ ބެންޗުން ވަރަށް ބޮޑަށް ހިތްހަމަނުޖެހުން ފާޅުކުރި އެވެ.
ޕީއެސްޖީ އަށް ދެ ވަނަ ލަނޑު ޖަހައިދޭން ޖޮއާއޯ ނެވޭސް ބޮލުން ޖެހި ބޯޅަ އާއި ޑެޒެއާ ޑޫއޭ ފޮނުވާލި ހަމަލާތައް ބަޔާންގެ ކީޕަރު މެނުއަލް ނޯޔާ ވަނީ މަތަކޮށްފަ އެވެ. އަދި، ބަދަލަކަށް ކުޅެން އަރައި ޕީއެސްޖީގެ ބްރެޑްލީ ބާކޮލާ ޖެހި ޝޮޓް ވެސް ކީޕަރު ނޯޔާ ވަނީ ހުއްޓުވައިފަ އެވެ.
އޭގެ އިތުރުން، ބަޔާންގެ ދެ ޑިފެންޑަރުން. ކައިރިން. ނައްޓާފައި ކްވަރަޝްކޭލިއާ އޭރިއާ ތެެރެއަށް ވަދެ، ފޮނުވާލަން އުޅުނު ބޯޅަ ރަނގަޅަށް ފަޔަށް ލައްވާލާ ގޮތެއްނުވި އެވެ.
ބަޔާނުން ލަނޑެއް ޖެހޭތޯ ގިނަ މަސައްކަތްތަކެއް ކުރަމުންދިޔައިރު، އެ ޓީމުގެ މައިކަލް އޮލީސޭ އާއި ލުއިސް ޑިއާޒް ފޮނުވާލި ހަމަލާތައް ޕީއެސްޖީގެ ރަޝިއާ ކީޕަރު، މަޓްވޭ ސަފޯނޯވް ވަނީ މަތަކޮށްފަ އެވެ. ބަޔާންގެ ކޮންރަޑް ލައިމާ ޖެހި ބޯޅަ އާއި ލެނާޓް ކާލް ފޮނުވާލި ޝޮޓް، ޕީއެސްޖީ ޑިފެންޑަރުން ވަނީ ބްލޮކްކޮށްފަ އެވެ.
މެޗުގެ އިތުރު ވަގުތުގެ ގޮތުގައި ދެއްކި ފަސް މިނިޓް ތެރޭ ހެރީ ކޭން ވަނީ މެޗުގައި ބަޔާންގެ ފުރަތަމަ ލަނޑު ޖަަހައި، އެއްވަރުކޮށްދީފަ އެެވެ. އެކަމަކު، އިތުރު ގޯލެއް ޖަހައި، އެގްރިގޭޓުން އެއްވަރުކުރަން ބަޔާނަށް ވަގުތު ނުލިބި ކެޓީ އެވެ.
ވިހި އަހަރަށް ފަހު، އާސެނަލުން ކުޅޭ ޗެމްޕިއަންސް ލީގުގެ ފުރަތަމަ ފައިނަލުގައި ޕީއެސްޖީއާ ކުޅޭ މެޗު އޮންނާނީ ހަންގޭރީގެ ބުޑަޕެސްޓުގައި ހުންނަ ޕުސްކަސް އެރީނާގަ އެވެ.
