ބާސެލޯނާ (މެއި 11) - ރެއާލް މެޑްރިޑް 2-0 އިން ބަލިކޮށް ބާސެލޯނާ އިން ސްޕެނިޝް ލީގުގެ ޗެމްޕިއަންކަން ހޯދައިފި އެވެ. .
މިއީ، ބާސެލޯނާ އިން ސްޕެނިޝް ލީގުގެ ތަށި އުފުލާލި 29 ވަނަ ފަހަރު އެވެ. ބާސެލޯނާ އިން ޗެމްޕިއަންކަން މި ހޯދީ ބާކީ ތިން މެޗު އޮއްވަ އެވެ. އަދި، ރޭގެ ނަތީޖާއާ އެކު، ޖެހިޖެހިގެން ދެ ވަނަ ސީޒަނެއްގައި ރެއާލުން ނިންމާލަން ޖެހުނީ ތަށްޓެއް ނުލިބި އެވެ.
ބާސެލޯނާ އަށް 35 މެޗުން 91 ޕޮއިންޓް ލިބިފައިވާއިރު، ދެ ވަނައިގައި އޮތް ރެއާލް މެޑްރިޑަށް 35 މެޗުން ލިބިފައިވަނީ، 77 ޕޮއިންޓެވެ.
ބާސެލޯނާގެ ދަނޑުގައި ރޭ ކުޅުނު މެޗުގައި ފެނިގެންދިޔަ ދެ ގޯލު ވެސް އެ ޓީމުން ޖެހީ މެޗުގެ ފުރަތަމަ ވިއްސަކަށް މިނިޓް ތެރޭގަ އެވެ. އެ ގޮތުން، އެ ޓީމުން ލީޑުނެގި ލަނޑު ޖެހީ މެޗުގެ ނުވަ ވަނަ މިނިޓްގައި ހިލޭ ޖެހުމަކުން މާކަސް ރެޝްފޯޑް އެވެ. އޭރިއާގެ ކުޑަތަންކޮޅެއް ބޭރުން ލިބުނު ހިލޭ ޖެހުމުން، ރެޝްފޯޑް ޖެހި ބޯޅަ އަމާޒުވީ ގޯލުގެ މަތީ ކަަނަށެވެ. ރެއާލްގެ ގޯލްކީޕަރު، ތިބައު ކޯޓުއާ އަށް އެ ބޯޅަ ހުއްޓުވަން މާ ބޮޑު ކަމެއް ނުކުރެވުނެވެ.
މެޗުގައި ބާސެލޯނާ އިން 18 ވަނަ މިނިޓްގައި ދެ ވަނަ ލަނޑު ޖެހި އެވެ. މިއީ، އޭރިއާތެރެއިން ޑެނީ އޮލްމޯ ދިން ބޯޅައެއް ގޯލުގެ މަތީ ކަަނަށް އަމާޒުކޮށްލައިގެން ފެރާން ޓޮރޭޒް ޖެހި ގޯލެކެވެ. ބާސެލޯނާ އިން ލީޑުފުޅާކުރިތާ ދެ މިނިޓް ފަހުން، ރެއާލްގެ ގޮންޒާލޯ ގާސިއާ އަށް ހުސްކޮށް ލިބުނު ފުރުސަތުގައި ފޮނުވާލި ބޯޅަ އަމާޒުވީ އަރިމަތީ ދާގަނޑަށެވެ.
ބާސެލޯނާ އަށް ތިން ވަނަ ލަނޑެއް ޖަހައިދޭން މެޗުގެ 38 ވަނަ މިނިޓްގައި ރެޝްފޯޑް ހުސްކޮށް އަރައި ފޮނުވާލި ބޯޅަ ދިޔައީ ދަނޑިކައިރިން ބޭރުންނެވެ. ދެ ވަނަ ހާފު ފަށައިގެން 10 މިނިޓް ތެރޭ ފެރާން އަށް ލިބުނު ފުރުސަތެއްގައި ފޮނުވާލި ހަމަލާ ކީޕަރު ކޯޓުއާ ވަނީ މަަތަކޮށްފަ އެވެ.
އަނިޔާގެ ސަަބަބުން ކީލިއަން އެމްބާޕޭ ނުލައި ކުޅުނު ރެއާލަށް މެޗުގެ 62 ވަނަ މިނިޓްގައި ޖޫޑް ބެލިންހަމް ޖަހައިދިން ގޯލު ބަލައިނުގަތީ އޮފްސައިޑް މަގާމެއްގައި ހުރެ ޖެހި ގޯލެއް ކަމަށް ވުމުންނެވެ. ބާސެލޯނާގެ ރޮބަޓް ލެވަންޑޯސްކީ އަށް އޭރިއާތެރެއިން ލިބުނު ފުރުަސަތަކުން ޖެހި ޝޮޓް އަމާޒުވީ ކީޕަރު ކޯޓުއާ އަތަށެވެ.
ރޭގެ މެޗުގެ ކުރިން ބާސެލޯނާގެ ކޯޗު ހަންސީ ފްލިކްގެ ބައްޕަ މަރުވިއިރު، މެޗު ފެށުމުގެ ކުރިން ވަނީ ސުކޫތެއް ގެނެސްފަ އެވެ.
