މެޑްރިޑް (މެއި 10) - އޭނާގެ އެންމެ ބޮޑު ބޮލުގެ ރިހުމަކީ އަދި ކަންބޮޑުވުމަކީ ވެސް ރެއާލް މެޑްރިޑްގެ އެތެރޭގައި ހިނގާ ކަންކަމުގެ މައުލޫމާތު މީޑިއާ އަށް ލީކުކުރާ މީހެއް ނޭނގުން ކަމަށް ރެއާލް މެޑްރިޑްގެ ކޯޗު އަލްވާރޯ އާބެލޯއާ ބުނެފި އެވެ.
ސްޕެނިޝް ލީގުގައި މިރޭ ރެއާލުން ބާސެލޯނާއާ ދެކޮޅަށް ކުޅޭއިރު، މި މެޗުން. ބާސެލޯނާ ބަލިނުވެ ފަރުޖައްސާލައިފިނަމަ، އެ ޓީމަށް ލީގު ޗެމްޕިއަންކަން ލިބޭނެ އެވެ. ރެއާލުން މި ހަފްތާގައި ކުރިމަތިލާން ޖެހުނު އެއް ކަމަކީ، އެ ޓީމުގެ ދެ ކުޅުންތެރިން ކަމަށްވާ ފްރާންސްގެ އައުރެލިއަން ޗުއަމެނީ އާއި އުރުގުއޭގެ ފެޑެރީކޯ ވަލްވޭޑޭގެ މެދުގައި ޖެހިޖެހިގެން ދެ ދުވަހު ހަމަނުޖެހުންތަކެއް ހިނގުމެވެ. މި މާރާމާރީއާ ހެދި ވަލްވޭޑޭ އަށް ހޮސްޕިޓަލުން ފަރުވާ ދޭން ޖެހުނުއިރު، ރެއާލުން މި މައްސަލަ ބަލައި، ދެ ކުޅުންތެރިން އެއް މިލިއަން ޑޮލަރުން ޖޫރިމަނާކޮށްފައިވެ އެވެ.
އާބެލޯއާ ބުނީ، އެ ހިނގައިދިޔަ ކަންތައްތަކުގެ ވާހަކަ ދެން އިތުރަށް ދެއްކުމުގެ ވިސްނުމެއް ނެތް ކަމަށެވެ. އަދި، އެ ކަމުގައި ޝާމިލުވާ ކުޅުންތެރިން ވަނީ މީޑިއާގައި އެ ކަމާ މެދު މާޔޫސްވާ ކަމަަށް ބުނެފައި ކަމަށާއި އެއީ ދެން މި ވާހަކަ ނިންމާލަން ޖެހޭ ހިސާބު ކަމަށް އާބެލޯއާ ބުނެފައިވެ އެވެ.
"އަދި ވެސް އެއް ފަހަރު މި ބުނަނީ. ފަހަރެއްގައި ކުރިން މި ވާހަކަ ދެއްކިއިރު މާ ސާފުވެފައި ނޯވެދާނެ. ޓީމުގެ ލޮކަރޫމްގެ ތެރޭގައި ހިނގާ ކަންކަމުގެ މައުލޫމާތު ލީކުވުމަކީ ރެއާލް މެޑްރިޑަށް ދެވޭ ދެރައެއް. މި ބެޖަށް ކުރެވޭ ބޭއިހުތިރާމެއް،" އާބެލޯއާ ބުންޏެވެ.
ރެއާލްގެ މައުލޫމާތު ލީކުކުރާ ކުޅުންތެރިއެއް ނޫނީ އޮފިޝަލެއް އެނގުނަސް އާންމުން ކުރިމަތީގައި އެ މީހަކު ގޯސްކޮށްފައި ވާހަކަ ނުދައްކާނެ ކަމަށާއި އެކަން އެ އަށް ވުރެން ރަނގަޅަށް ހައްލުކުރާނެ ކަމުގެ ޔަގީންކަން އާބެލޯއާ ވަނީ ދީފަ އެވެ.
އާބެލޯއާ ބުނީ ޖެހިޖެހިގެން ދެ ސީޒަނުގައި ތަށްޓެއް ނުލިބި ނިންމާލަން ޖެހުމަކީ ރެއާލްގެ ފެންވަރެއް ނޫން ކަމަށެެވެ. އެކަމަކު، މި ފަދަ އުނދަގޫ ހާލަތެއްގައި ރެއާލުން ބައިބައިވެގެން ލިބޭނެ މޮޅެއް ނެތް ކަމަށާއި ރެއާލަށް ކުޅޭ ކުޅުންތެރިން އެ އަށް ވުރެން ޒިންމާދާރު ކަމާ އެކު ކަންކަމަށް ކުރިމަތިލުން މުހިންމު ކަމަށް އާބެލޯއާ ވަނީ ބުނެފަ އެވެ.
ބާސެލޯނާ ދަނޑުގައި މިރޭ ރެއާލާ ކުޅޭ މެޗު ފަށާނީ 00:00 ގަ އެވެ.
