މެޑްރިޑް (މެއިި 5) - ރެއާލް މެޑްރިޑަށް ކުޅެމުން އަންނަ ފްރާންސްގެ ތަރި، ކީިލިއަން އެމްބާޕޭ، އެ ކްލަބުން ބޭރުކުރަން ގޮވާލައި، ރެއާލްގެ ސަޕޯޓަރުންގެ ބަޔަކު ތައްޔާރުކުރި އޮންލައިން ޕެޓިޝަނެއްގައި އެއް މިލިއަނަށް ވުރެން ގިނަ ސޮއި ހަމަވެއްޖެ އެވެ.
ޖެހިޖެހިގެން ދެ ވަނަ ސީޒަނުގައި ރެއާލުން ތަށްޓެއް ނުލިބި ސީޒަން ނިންމާލުމާ ގާތުގައި އޮތްއިރު، ދާދި ފަހުން އެމްބާޕޭ އަށް ލިބުނު އަނިޔާއެއްގެ ސަބަބުން، އޭނާ މި ވަގުތު ހުރީ ކުޅުމާ ދުުރުގަ އެވެ. އެކަމަކު، އަނިޔާގެ ރިކަވަރީ މުއްދަތުގެ ތެރޭގައި، ލޯބިވެރިޔާއާ އެކު، އެމްބާޕޭ، އިޓަލީ އާއި ފްރާންސްގައި ޗުއްޓީ ހޭދަކުރި ފޮޓޯ އާއި ވީޑިއޯތަކެއް ސޯޝަލް މީޑިއާ އާއި މެއިންސްޓްރީމް މީޑިއާތަކުގައި ދައުރުވާން ފެށުމާ އެކު، ރެއާލް ސަޕޯޓަރުންގެ ކެތްތެރިކަން ކޮޅުންލީ އެވެ.
އަނެއްކޮޅުން، ސްޕެއިނުގެ އެކި މީޑިއާތަކުގައި، ރިޕޯޓްކޮށްފައިވާ ގޮތުގައި، ރެއާލްގެ މެނޭޖްމަންޓުން އެމްބާޕޭ އަށް ވަކި މިނިވަންކަމެއް ދޭ ގޮތަށް ކަންކަން ކުރާތީވެ، އެކަމާ މެދު ޓީމުތެރޭގައި ވެސް މައްސަލަތަކެއް ވެސް ވަނީ ޖެހިފަ އެވެ.
މި ހުރިހާ ކަމަކަށް ބަލައި، ރެއާލްގެ ސަޕޯޓަރުން ފެށި ޕެޓިޝަނުގައި މި ވަގުތަށް ބަލާއިރު، 1.2 މިލިއަން އަށް ވުރެން ގިނަ ސޮއި ވަނީ ލިބިފަ އެވެ.
މި ސީޒަނުގައި މިހާތަނަށް އެމްބާޕޭ ވަނީ ރެއާލަށް ކުޅެދިން 41 މެޗުން 41 ގޯލު ޖަހައި، ހަ ލަނޑު ޖަހަން ފުރުސަތު ތަނަވަސްކޮށްދީފަ އެވެ.
އެކަމަކު، މި ސީޒަނުގައި މިހާތަނަށް އެމްބާޕޭ އަށް ފަސް ފަހަރު އަނިޔާގެ މައްސަލަ ދިމާވެ، 53 ދުވަހު ކުޅުމާ ދުރުގަައި ހުންނަން ޖެހިފައިވާއިރު، އެ މުއްދަތުގައި 10 މެޗެއް ގެއްލިފައިވެ އެވެ.
އެމްބާޕޭގެ ފަރާތުން މިރޭ ނެރުނު ބަޔާނެއްގައި ބުނެފައިވަނީ، މީޑިއާގައި ދައުރުވަމުން އަންނަ ފޮޓޯތަކާއި އެހެނިހެން މައުލޫމާތުތަކަކީ ކަމުގެ އަސްލާ މުޅިން ހިލާފު ކަންކަން ކަމަށެވެ.
އެ ގޮތުން، އޭއެފްޕީ މެދުވެރިކޮށް ނެރުނު ނޫސްބަޔާނެއްގައި އެމްބާޕޭ ބުނެފައިވަނީ، އަނިޔާގައި ހުރެ އޭނާ ކަންކަން ކުރަމުން އަންނަނީ، ކްލަބާއި ގައުމީ ޓީމުގެ ފަރާތުން ލިބޭ އެއްބާރުލުމާ އެއްގޮތަށް ކަމަށެވެ. އަދި، ޕްރޮފެޝަނަލްކޮށް ހުރިހާ ކަމެއް ގެންދިއުމަށްޓަކައި، ކްލަބުން ހުރިހާ ކަމެއް ގަވާއިދުން ބަލަހައްޓަމުން އަންނަ ކަމަށް ވެސް އެމްބާޕޭ ބުނެފައިވެ އެވެ.
ރިޕޯޓްތައް ބުނާގޮތުން، އާދިއްތަ ދުވަހު، ބާސެލޯނާއާ ދެކޮޅަށް ކުޅޭ އެލް ކްލަސިކޯ މެޗަށް އެމްބާޕޭ ފިޓްވުމުގެ ފުރުސަތު އެބައޮތެވެ.
