ބާސެލޯނާ (މެއި 6) - ސްޕެއިން ގައުމީ ޓީމާއި ބާސެލޯނާގެ ކުރީގެ ޑިފެންޑަރު، ޖެރާޑް ޕީކޭ، މެޗަކަށް ފަހު، ރެފްރީއަކާ ދިމާކޮށްލައި، ބިރު ދައްކާފައިވާތީވެ، އޭނާ ދެ މަހަށް ސަސްޕެންޑް ކުރަން ސްޕެއިނުގެ ފުޓްބޯޅަ ފެޑެރޭޝަނުން ނިންމައިފި އެވެ.
ފުޓްބޯޅައިން 2022 ވަނަ އަަހަރު ރިޓަޔާކުރި ޕީކޭ އަކީ އެފްސީ އެންޑޯރާގެ ހިއްސާދާރެކެެވެ. ދެ ވަނަ ޑިވިޝަނުގައި ކުޅޭ އެންޑޯރާ އިން އެންމެ ފަހުން ކުޅުު މެޗުން 1-0 އިން އަލްބަސެޓޭ އަތުން ބަލިވިއިރު، އެ މެޗަށް ފަހު، ޕީކޭ ވަނީ ރެފްރީއާ ކުރިމަތިލައި، ބަހުގެ ހަމަލާތަކެއް ބަދަލުކޮށްފަ އެވެ.
އެ މެެޗުގެ ރެފްރީ، އަލޮންސޯ ޑެ އޭނާ ހިމަނާފައިވާ ގޮުތުގައި ޕީކޭ ވަނީ އިންޒާރުދީފަ އެވެ. އެ ގޮތުން، ޕީކޭ ބުނެފައިވަނީ ދަނޑުން ވީހާވެސް އަވަހަށް މީހެއްގެ އެހީތެރިކަމާއި ރައްކާތެރިކަން ހޯދައިގެން ފޭބުމަށާއި އެހެން ގައުމެއް ނަމަ އޭނާއާ މާެާރާމާރީ ހިންގާނެ ކަމަށާއި އެކަމަކު އެންޑޯރާ އަކީ ތަންކޮޅެއް ތަހުޒީބު ބައެއް ކަމުން ދޫކޮށްލަނީ ކަމަށެެވެ.
މި މައްސަލަ ޑިސިޕްލިނަރީ ކޮމިޓީން ބެލުމަށް ފަހު ނިންމީ، ރެފްރީ އަލޮންސޯގެ ރިޕޯޓްގައި ބަޔާންކޮށްފައިވާ ކަންތައްތަކަށް ބަލާއިރު، ރެފްރީ އަށް ބިރު ދެއްކުމުގެ އަމަލެއް ޕީކޭގެ ފަރާތުން ފެނިފައިވާ ކަމަށެވެ. އެއާ އެކު، ޑިސިޕިްލިނަރީ ގަވާއިދުގެ ތެެރެއިން، ޕީކޭ އަށް އަޅާ ފިޔަވަޅެއްގެ ގޮތުގަައި ދެ މަސް ދުވަހަށް ސަސްޕެންޑް ކުރުމަށެވެ.
ޕީކޭގެ އިތުރުން ރެފްރީއާ ދިމާކޮށްލުމުގައި، އެންޑޯރާގެ އިތުރު އޮފިޝަލެއްގެ އިތުރުން އެ ކްލަބްގެ ރައީސް، ފެރާން ވިލަސޭކާ ވެސް ބައިވެރިވި އެވެ. އެ ގޮތުން ވިލަސޭކާ އަށް ހަތަރު މަހުގެ ސަސްޕެންޝަނެއް އައިއިރު، އެ ކްލަބްގެ ސްޕޯޓިން ޑިރެކްޓަރު، ޖޯމޭ ނޮގުއޭ އަށް ވެސް ވަނީ އަދަބު ދީފަ އެވެ.
އެންޑޯރާ މި ވަގުތު އޮތީ ސްޕެއިނުގެ ދެ ވަނަ ޑިވިޝަނުގެ 10 ވަނައިގަ އެވެ.
ކުރިން މެންޗެސްޓާ ޔުނައިޓެޑަށް ކުޅުނު ޕީކޭގެ ކެރިއަރުގެ ބޮޑު އުސްއަލިތައް ގުޅިފައި އޮތީ ބާސެލޯނާ އާއި ސްޕެއިނާ އެކު އެވެ. އެ ގޮތުން، ބާސެލޯނާއާ އެކު، ސްޕެނިޝް ލީގު ނުވަ ފަހަރު ހޯދައި، ޗެމްޕިއަންސް ލީގުގެ ތަށި ތިން ފަހަރު އުފުލާލި އެވެ. އަދި، ސްޕެއިން ގައުމީ ޓީމާ އެކު، ޔޫރޯ ފުޓްބޯޅަ މުބާރާތާއި ފީފާ ވޯލްޑް ކަޕް، 2010 އާއި 2012 ގައި ކާމިޔާބުކުރި އެވެ.
ކުޅުން ހުއްޓާލުމަށް ފަހު، ވިޔަފާރިއެއް ފަށައި، ކުންފުންޏެއްގެ ދަށުން އެކި ކުޅިވަރުތަކުގައި އަންނަނީ އިންވެސްޓްތައް ކުރަމުންނެވެ.
