މެޑްރިޑް (މެއި 8) - ރެއާލް މެޑްރިޑްގެ ދެ ކުޅުންތެރިން ކަމަށްވާ ފްރާންސްގެ އައުރެލިއަން ޗުއަމެނީ އާއި ފެޑެރީކޯ ވަލްވޭޑޭގެ މެދުގައި މާރާމާރީގެ ކަންތައްތަކެއް ހިނގައި، ވަލްވޭޑޭ އަށް ހޮސްޕިޓަލްގައި ފަރުވާދޭން ޖެހިއްޖެ އެވެ.
ވަލްވޭޑޭ އާއި ޗުއަމެނީގެ މެދުގައި ޖެހިޖެހިގެން ދެ ދުވަހު ވަނީ ހަމަނުޖެހުންތަކެއް ހިނގައިފަ އެވެ. އެ ގޮތުން، ބުދަ ދުވަހުގެ ޓްރެއިނިންގެ ތެރެއިން ވަލްވޭޑޭ އާއި ޗުއަމެނީ މެދުގައި ޒުވާބުތަކެއް ހިނގައި، ދެ ކުޅުންތެރިން މެދުގައި ކޮންމެ ވެސް މިންވަރެއްގެ ހަމަނުޖެހުންތަކެއް ހިނގި އެވެ.
އޭގެ ފަހުން، އިއްޔެގެ ޓްރެެއިނިން ތެރޭގައި ވެސް ދެ ކުޅުންތެރިންގެ މެދުގައި ހަމަނުޖެހުންތަކެއް ހިނގައި، އެ މައްސަލަ އިތުރަށް ގޯސްވީ، ޗޭންޖިން ރޫމަށް ދިޔަ ފަހުންނެވެ. ޗުއަމެނީ އާއި ވަލްވޭޑޭގެ މި މާރާމާރީގެ ތެރެއިން، ވަލްވޭޑޭ ހޭނެތުމާ އެކު، ވަގުތުން ހޮސްޕިޓަލަށް ގެންގޮސް ފަރުވާދޭން ފެށި އެވެ.
މި މައްސަލަތަކާ އެކު، ރެއާލުން ވަނީ ކްލަބްގެ ރައީސް، ފްލޮރެންޓީނޯ ޕެރޭޒް އާއި ޓީމުގެ ކޯޗު އަލްވާރޯ އާބެލޯއާ އަދި ކެޕްޓަން، ޑެނީ ކާވަހާލް ހިމެނޭ ގޮތަށް އިމަޖެންސީ ބައްދަލުވުމެއް ބާއްވައިފަ އެވެ. އަދި، މި ބައްދަލުވުމަށް ފަހު، ރެއާލުން އާންމުކުރި ބަޔާނެއްގައި ބުނެފައިވަނީ، ވަލްވޭޑޭ އާއި ޗުއަމެނީއާ މެދު ފިޔަވަޅު އެޅުމަށްޓަކައި، ކްލަބުން ހިނގައިދިޔަ ކަންކަން ތަހުގީގުކޮށް، ޑިސިޕްލިނަރީ ކޮމިޓީގެ މަސައްކަތް ފަށާފައިވާ ކަމަށެވެ.
ރެއާލުން ސްޕެނިޝް ލީގުގައި ބާސެލޯނާއާ ދެކޮޅަށް ކުޅޭ އެލްކްލަސިކޯ މެޗު އަންނަ އާދިއްތަ ދުވަހު އޮތްއިރު، ރެއާލް ތެރޭގައި ގިނަ މައްސަލަތަކެއް ވަނީ ޖެހިފަ އެވެ. މާރާމާރީގެ މައްސަލަ އަށް ފަހު، ވަލްވޭޑޭ ބޮލަށް ލިބުނު އަނިޔާއާ ހެދި އޭނާ އަށް އެލް ކްލަސިކޯ މެޗު ގެއްލޭނެ ކަމަށް ރިޕޯޓްތައް ބުނެ އެވެ.
އެ ގޮތުން، ރެއާލްގެ ކޯޗު އާބެލޯއާ އާއި އެ ކްލަބްގެ ހަ ކުޅުންތެރިއަކު ވާހަކަ ނުދައްކާ ކަމަށް ސްޕެއިނުގެ މީޑިއާތަކުން ވަނީ ރިޕޯޓްކޮށްފަ އެެވެ.
އަނެއްކޮޅުން، ރެއާލަށް ކުޅެމުން އަންނަ ފްރާންސްގެ ތަރި، ކީިލިއަން އެމްބާޕޭ، އެ ކްލަބުން ބޭރުކުރަން ގޮވާލައި، ރެއާލްގެ ސަޕޯޓަރުންގެ ބަޔަކު ތައްޔާރުކުރި އޮންލައިން ޕެޓިޝަނެއްގައި، މިހާތަނަށް 15 މިލިއަނަށް ވުރެން ގިނަ ސޮއި ވަނީ ހަމަވެފަ އެވެ.
ޖެހިޖެހިގެން ދެ ވަނަ ސީޒަނުގައި ރެއާލުން ތަށްޓެއް ނުލިބި ސީޒަން ނިންމާލުމާ ގާތުގައި އޮތްއިރު، ދާދި ފަހުން އެމްބާޕޭ އަށް ލިބުނު އަނިޔާއެއްގެ ސަބަބުން، އޭނާ މި ވަގުތު ހުރީ ކުޅުމާ ދުުރުގަ އެވެ. އެކަމަކު، އަނިޔާގެ ރިކަވަރީ މުއްދަތުގެ ތެރޭގައި، ލޯބިވެރިޔާއާ އެކު، އެމްބާޕޭ، އިޓަލީ އާއި ފްރާންސްގައި ޗުއްޓީ ހޭދަކުރި ފޮޓޯ އާއި ވީޑިއޯތަކެއް ސޯޝަލް މީޑިއާ އާއި މެއިންސްޓްރީމް މީޑިއާތަކުގައި ދައުރުވާން ފެށުމާ އެކު، ރެއާލް ސަޕޯޓަރުންގެ ކެތްތެރިކަން ކޮޅުންލީ އެވެ.
އަނެއްކޮޅުން، ސްޕެއިނުގެ އެކި މީޑިއާތަކުގައި، ރިޕޯޓްކޮށްފައިވާ ގޮތުގައި، ރެއާލްގެ މެނޭޖްމަންޓުން އެމްބާޕޭ އަށް ވަކި މިނިވަންކަމެއް ދޭ ގޮތަށް ކަންކަން ކުރާތީވެ، އެކަމާ މެދު ޓީމުތެރޭގައި ވެސް މައްސަލަތަކެއް ވެސް ވަނީ ޖެހިފަ އެވެ.
