ލަންޑަން (މެއި 10) - އިނގިރޭސި ޕްރިމިއާ ލީގުގައި މިރޭ ވެސްޓް ހޭމް ޔުނައިޓެޑް 1-0 އިން ބަލިކޮށް އާސެނަލުން ލީގު ޗެމްޕިއަންކަން ހޯދުމުގެ ފުރުސަތު ބޮޑުކޮށްފި އެވެ.
ލީގުގެ އެއް ވަނައިގައި އޮތް އާސެނަލުން ވަނީ ދެ ވަނައިގައި އޮތް މެންޗެސްޓާ ސިޓީ އަށް ވުރެން މެޗެއް އިތުރަށް ކުޅެ ފަސް ޕޮއިންޓަށް ލީޑުފުޅާކޮށްފަ އެވެ. އާސެނަލަށް 36 މެޗުން 79 ޕޮއިންޓް ލިބިފައިވާއިރު، ސިޓީ އަށް ލިބިފައިވަނީ 35 މެޗުން 74 ޕޮއިންޓެވެ.
އާސެނަލަށް ބާކީ ދެ މެޗު އޮތްއިރު، އެ ދެ މެޗުން އަމިއްލަ ދަނޑުގައި ބާންލީ އާއި ރަށުންބޭރުގައި ކްރިސްޓަލް ޕެލަސް ބަލިކޮށްގެން 22 އަހަރަށް ފަހު ފުރަތަމަ ފަހަރަށް ލީގު ޗެމްޕިއަންކަން ހޯދޭނެ އެވެ.
ވެސްޓް ހޭމްގެ ލަންޑަން ސްޓޭޑިއަމްގައި ކުޅުނު މި މެޗުގައި އެ ޓީމު މޮޅުކޮށްދިން ލަނޑު ޖެހީ މެޗުގެ ފުރިހަަމަ ވަގުތު ހަމަވާން ހަތް މިނިޓަށް ވެފައި ވަނިކޮށް ލެއަންޑްރޯ ޓްރޮސާޑް އެވެ. މިއީ، މާޓިން އޮޑެގާޑް ދިން ބޯޅައަކުން. އޭރިއާތެރެއިން ޓްރޮސާޑް ޖެހި ގޯލެކެވެ.
މި މެޗުގެ ފުރަތަމަ ހާފުގައި އާސެނަލްގެ ރިކާޑޯ ކަލަފިއޯރީ ފޮނުވާލި ބޯޅައެއް ވެސްޓް ހޭމްގެ ޑިފެންޑަރު، ކޮންސްޓަންޓީނޯސް މަވްރަޕާނޯސް ވަނީ ގޯލަށް ވަނަނުދީ ސަލާމަތްކޮށްފަ އެވެ. އަނެއްކޮޅުން، ފުރަތަމަ ހާފުގެ ފަހުކޮޅުގައި ވެސްޓް ހޭމްގެ ފޯވާޑް، ޓަޓީ ކަސްޓެޔާނޯސް ބޮލުން ފޮނުވާލި ބޯޅަ އާސެނަލްގެ ކީޕަރު، ޑޭވިޑް ރާޔާ ވަނީ މަތަކޮށްފަ އެވެ. އަދި، ދެ ވަނަ ހާފުގައި ވެސްޓް ހޭމްގެ މަޓެއުސް ފެނާންޑޭސް ހުސްކޮށް ވަދެ، އޭރިއާތެރެއިން ފޮނުވާލި ބޯޅަ ވެސް ކީޕަރު ރާޔާ ވަނީ މަތަކޮށްފަ އެވެ.
އާސެނަލުން ލަނޑު ޖެހީ ވެސްޓް ހޭމަށް ލީޑުނަގައިދޭން ލިބުނު ރަނުގެ ފުރުސަތު ފެނާންޑޭސް އަތުން ގެއްލުނު ފަހުންނެވެ.
ވެސްޓް ހޭމަށް އެއްވަރުކޮށްދޭން ކަލުމް ވިލްސަން ޖެހި ޝޮޓެއް އާސެނަލްގެ ޑިފެންޑަރު، ގަބްރިއެލް މަގާޅައެސް ވަނީ ބްލޮކްކޮށްފަ އެވެ.
މެޗުގެ އިތުރު ވަގުތުގެ ތެރޭގައި ވެސްޓް ހޭމްގެ ކަލުމް ވިލްސަން ވަނީ ލަނޑެއް ޖަހައިފަ އެވެ. އެކަމަކު، ކޯނަރަކުން ހުރަސްވި ބޯޅައަކުން ވިލްސަން ފޮނުވާލި ބޯޅަ ގޯލަށް ވަނުމުގެ ކުރިން، ވެސްޓް ހޭމްގެ ފޯވާޑް ޕަބްލޯ ވަނީ އާސެނަލްގެ ކީޕަރު ރާޔާ އަށް ހުރަސް އަޅައިފަ އެވެ. އެ ގޮތަށް ނިންމީ، ވީޑިއޯ އެސިސްޓަންޓް ރެފްރީ (ވީއޭއާެރް) އިން އަންގައިގެން ދަނޑުކައިރީގައި ހުރި މޮނީޓަރުން ވެސް ބަލައިފަ އެވެ.
ވެސްޓް ހޭމްގެ ބެންޗުން ވަނީ އެ ނިންމުމާ މެދު ވަރަށް ބޮޑަށް ހިތްހަމަަ ނުޖެހުން ފާޅުކޮށްފަ އެވެ.
