ލިވަޕޫލް (މެއި 5) - އިނގިރޭސި ޕްރިމިއާ ލީގުގައި ރޭ މެންޗެސްޓާ ސިޓީން އެވަޓަންއާ ދެކޮޅަށް ކުޅުނު މެޗު 3-3 އިން އެއްވަރުވިއިރު، ލީގުގެ ރޭހުގައި އާސެނަލަށް ލީޑެއް ލިބިއްޖެ އެވެ.
އާސެނަލުން ސިޓީ އަށް ވުރެ އެއް މެޗު އިތުރަށް ކުޅެގެން، އެއް ވަަނައިގައި އޮތީ ފަަސް ޕޮއިންޓުގެ ލީޑަކާ އެކު އެވެ. ސިޓީ އަށް އެވަޓަން އަތަުން މޮޅުނުވެވުމުން، މެޗު ހަމަވާއިރު ވެސް އާސެނަލަށް ދެ ޕޮއިންޓުގެ ލީޑެއް އޮންނާނެ އެވެ.
އެއް ވަަނައިގައި އޮތް އާސެނަަލަށް 35 މެޗުން 76 ޕޮއިންޓް ލިބިފައިވާއިރު، ދެ ވަނައިގައި އޮތް ސިޓީ އަށް 34 މެޗުން ލިބިފައިވަނީ 71 ޕޮއިންޓެވެ.
އެވަޓަންގެ ހިލް ޑިކިންސަން ސްޓޭޑިއަމްގައި ރޭ ކުޅުނު މެޗުގައި އެވަޓަން ކައިރިން ސިޓީން ފުރަތަމަ ހާފުގައި ލީޑު ނެގި އެވެ. ސިޓީގެ އާލިން ބްރައުޓް ހާލަންޑް އާއި އަންޓުއާން ސެމެންޔޯ އަދި ރަޔާން ޗާކީ އަށް ލިބުނު ފުުރުސަތުތަކުން ގޯލެއް ނުޖެހި ދަނިކޮށް، ސިޓީން ލީޑުނެގީ، 43 ވަނަ މިނިޓްގައި ގޯލުގެ މަތީ ކަނަށް ބޯޅަ ފޮނުވާލައިގެން ޖެރެމީ ޑޮކޫ ޖެހި ގޯލުންނެވެ.
ސިޓީ އަށް މި މެޗު ގެއްލުނީ ދެ ވަނަ ހާފުގެ 13 މިނިޓް ތެރޭގައި އެ ޓީމަށް ސަމާލުކަން ގެއްލި ގޯސްތަކެއް ހެދިގެންނެވެ. އެ ގޮތުން، އެވަޓަން އިން ވަނީ މެޗުގެ 68 ވަނަ މިނިޓްގައި، ސިޓީގެ މާކް ގޭހީ ހެދި ގޯހެއްގެ ފައިދާނަގައި، އެވަޓަންގެ ތިއާނޯ ބެރީ ވަނީ ލަނޑެއް ޖަހައި އެއްވަރުކޮށްދީފަ އެވެ. އޭގެ ފަސް މިނިޓް ފަހުން، ޖޭމްސް ގާނާ ނެގި ކޯނަރަކުން، ޖޭކް އޯބްރަޔަން ބޮލުން ގޯލު ޖަހައި، އެވަޓަން އަށް ލީޑުނަގައިދިނެެވެ. އަދި، 81 ވަނަ މިނިޓްގައި ބެރީ ވަނީ އިތުރު ގޯލެއް އެވަޓަން އަށް ކާމިޔާބުކޮށްދީފަ އެވެ.
އެވަޓަން އިން ދެ ގޯލުގެ ލީޑެއް ނެގިތާ ދެ މިނިޓް ފަހުން، މެޗުގެ 83 ވަނަ މިނިޓްގައި ހާލަންޑް ވަނީ ސިޓީ އަށް ލަނޑެއް ޖަހައިދީ، ފަރަގު ކުޑަކޮށްފަ އެވެ. ބަލިނުވެ ފަރުޖައްސާލުމަށްޓަކައި ފަހު ވަގުތާ ހަމައަށް ސިޓީން ދިޔައީ މަސައްކަތް ކުރަމުންނެވެ. އެ ގޮތުން، ސިޓީން މެޗުގެ ނަތީޖާ ހަމަހަމަކުރި ގޯލު ޖެހީ އިތުރު ވަގުތުގެ ހަތް ވަނަ މިނިޓްގަ އެވެ. މި ލަނޑު އެ ޓީމަށް ޖަހައިދިނީ ޑޮކޫ އެވެ.
ސިޓީގެ ކޯޗު ޕެޕް ގާޑިއޯލާ ބުނީ، ލީގު ހޯދުމުގެ އަމިއްލަ ބާރު ގެއްލުމަކީ މާޔޫސްކަމެއް އަންނާނެ ކަމެއް ކަމަށާއި އެހެން ނަމަވެސް އެއްކޮށް އުންމީދު ނަގައިނުލާނެ ކަމަށާއި ފަހު ވަގުތާ ހަމައަށް ހިތްވަރު ކުރާނެ ކަމަށެވެ.
