މެންޗެސްޓާ (މެއި 9) - އިނގިރޭސި ޕްރިމިއާ ލީގުގައި މިރޭ ބްރެންޓްފޯޑް އަތުން 3-0 އިން މޮޅުވެ، މެންޗެސްޓާ ސިޓީން ލީގުގެ އެއް ވަނައިގައި އޮތް އާސެނަލް ފަހަތުގައި ވިއްދިއިރު، ޗެލްސީ އާއި ލިވަޕޫލް ބައްދަލުކުރި މެޗު 1-1 އިން އެއްވަރުވެއްޖެ އެވެ.
އާސެނަލާއި ސިޓީ އަށް ބާކީ ތިން މެޗު އޮތްއިރު، ޕޮއިންޓު ތާވަލުގައި ދެ ޓީމުގެ ފަރަގަކީ ދެ ޕޮއިންޓެވެ. އާސެނަލަށް 35 މެޗުން 76 ޕޮއިންޓް ލިބިފައިވާއިރު، ދެ ވަނައިގައި ސިޓީ އޮތީ 35 މެޗުން 74 ޕޮއިންޓް ހޯދައިގެންނެވެ.
ލީގު ތާވަލުގެ ތިން ވަނައިގައި އޮތީ މިރޭ ސަންޑަލެންޑް ދަނޑުގައި 0-0 އިން އެއްވަރުވި، މެންޗެސްޓާ ޔުނައިޓެޑް އެވެ. ޔުނައިޓެޑަށް 36 މެޗުން ލިބިފައިވަނީ 65 ޕޮއިންޓެވެ. ލިވަޕޫލަށް 36 މެޗުން 59 ޕޮއިންޓް ލިބިފައިވާއިރު، ފަސް ވަނައިގައި އޮތް އެސްޓަން ވިލާ އަށް 35 މެޗުން 58 ޕޮއިންޓް ވަނީ ލިބިފަ އެވެ.
ލިވަޕޫލް ދަނޑުގައި އެ ޓީމުން ހަ ވަނަ މިނިޓްގައި ރަޔާން ގްރަވެންބާކްގެ ގޯލުން ލީޑުނެގިއިރު، އެންޒޯ ފެނާންޑޭޒް ހިލޭ ޖެހުމަކުން ކާމިޔާބުކުރި ގޯލުން ފުރަތަަމަ ހާފުގައި ޗެލްސީން އެއްވަރުކުރި އެވެ. ދެ ވަނަ ހާފުގައި، ޗެލްސީގެ ކޯލް ޕާމާ އާއި ލިވަޕޫލްގެ ކާޓިސް ޖޯންސް ޖެހި ލަނޑުތައް ވަނީ ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލައިފައި އޮފްސައިޑް ކަމަށް ނިންމައިފަ އެވެ.
ޗެލްސީން މެޗުން މޮޅުވާން ޕެނަލްޓީއެއް ހޯދަން އެޕީލްކުރި ނަމަވެސް، އެ ޓީމުގެ ޖާއޯ ޕެޑްރޯ އަށް ލިވަޕޫލްގެ ޖެރެމީ ފްރިމްޕޮން ކުރީ ފައުލެއް ނޫން ކަމަށް ވީއޭއާރް އިން ވަނީ ނިންމައިފަ އެވެ. މި މެޗު އެއްވަރުވެގެން ނިމުނުއިރު، މިއީ އެންމެ ފަހުން ލީގުގައި ކުޅުނު ހަތް މެޗުން ޗެލްސީ އަށް ލިބުނު ފުރަތަމަ ޕޮއިންޓެވެ. މި މެޗުގެ ކުރިން އެންމެ ފަހުން ލީގުގައި ކުޅުނު ހަ މެޗުން ވެސް ޗެލްސީ ވަނީ ބަލިވެފަ އެވެ.
މި ސީޒަނުގައި ތިން ވަނަ ކޯޗުގެ ބެލުމުގެ ދަށުން ކުޅޭ ޗެލްސީ އޮތީ 36 މެޗުން 49 ޕޮއިންޓާ އެކު، ލީގުގެ ނުވަ ވަނައިގަ އެވެ.
ލީގުގައި މިރޭ ފުލަމް އަތުން 1-0 އިން މޮޅުވެ، ބޯންމައުތުން ވަނީ ލީގުގައި ބަލިނުވެ 15 ވަނަ މެޗު ހަމަކޮށްފަ އެވެ. ރެލިގޭޓްވެފައިވާ ވުލްވްސް އަތުން ބްރައިޓަން މޮޅުވީ 3-0 އިންނެވެ.
ލީގު ތާވަލަށް ބަލާއިރު، ހަ ވަނައިގަައި އޮތް ބޯންމައުތަށް 36 މެޗުން 55 ޕޮއިންޓް ލިބިފައިވާއިރު، ހަތް ވަނައިގައި އޮތް ބްރައިޓަން އަށް ވަނީ 36 މެޗުން 53 ޕޮއިންޓް ލިބިފައެވެ. އަދި، އަށް ވަނައިގައި ބްރެންޓްފޯޑް އޮތީ 36 މެޗުން 51 ޕޮއިންޓް ހޯދައިގެންނެވެ.
