މިލާން (މެއި 8) - އިޓަލީގެ އޭސީ މިލާންގެ ވިސްނުން އެ ޓީމަށް ކުޅެމުން އަންނަ ޕޯޗުގީސް ފޯވާޑް، ރަފައެލް ލެއާއޯ، މި ސީޒަން ނިމުމުން އިނގިރޭސި ޕްރިމިއާ ލީގުގެ. ކްލަބަކަށް ވިއްކާލުމަށް ކަމަށް އިނގިރޭސި މީޑިއާ ރިޕޯޓްތައް ބުނެފި އެވެ.
އުުމުރުން 26 އަހަރުގެ ލެއާއޯ ވިއްކާލަން މިލާނުގެ މެނޭޖްމަންޓުން ނިންމާފައިވަނީ، ރިޕޯޓްތައް ބުނާގޮތުން، މިލާނުގެ ޓްރެއިނިންއެއްގެ ތެރެއިން އެ ޓީމުގެ ކޯޗު މެކްސިމިލިއާނޯ އަލެގްރީ އާއި ލެއާއޯއާ ދެމެދުގައި ޖެހުނު މައްސަަލަ އަކަށް ފަހު އެވެ.
މި ސީޒަނުގައި މިލާނަށް ކުޅެދިން 28 މެޗުން 10 ގޯލު ޖަަހައި، ތިން ގޯލު ޖަހަން ފުރުސަތު ތަނަވަސްކޮށްފިން ލެއާއޯ އަކީ މި އަހަރަށް ބެލިޔަސް މިލާނުގެ އެންމެ މުހިންމު ކުޅުންތެރިޔާ އެވެ. އެކަމަކު، އަހުލާގީ މައްސަލަތަކާއި ކްލަބްގެ މާލީ ހާލަތުގެ ބައެއް ކަންކަމަށް ބެލުމަށް ފަހު، މިލާންގެ ސީނިއާ މެނޭޖްމަންޓުން ނިންމީ މިއީ، ލެއާއޯ ވިއްކާލުމަށް ކްލަބަށް އެންމެ ރަނގަޅު ވަގުތު ކަމަށެވެ.
އެ ގޮތުން، ލެއާއޯއާ އެކު، މިލާނުގެ މެނޭޖްމަންޓުން ބޭއްވި ބައްދަލުވުމަކަށް ފަހު، އެ ޓީމުން ނިންމާފައިވާ ގޮތް ވަނީ ހިއްސާކޮށްފަ އެވެ. އެއާ އެކު، ލެއާއޯގެ އޭޖެންޓް ވަނީ އިނގިރޭސި ޕްރިމިއާ ލީގުގެ ކްލަބްތަކާ ވާހަކަ ދައްކަން ފަށައިފަ އެވެ. އެ ކްލަބްތަކަކީ، އާސެނަލް، ޗެލްސީ އަދި މެންޗެސްޓާ ޔުނައިޓެޑް ކަމަށް ރިޕޯޓްތައް ބުނެ އެވެ.
މިލާނުން ލެއާއޯ ވިއްކާލަން ކިޔާ އަގު އުޅޭނީ ރިޕޯޓްތައް ބުނާގޮތުން، 50-70 މިލިއަން ޑޮލަރުގަ އެވެ.
ސްޕޯޓިން ލިޒްބަން އާއި ލިލް އަށް ކުޅުނު ލެއާއޯ، މިލާނަށް ބަދަލުވީ 2019 ވަނަ އަހަރު އެވެ. މިލާނުން ލެއާއޯގެ ސޮއިހޯދަން ޖުމްލަ އެކު، ލިލް އަށް 45 މިލިއަން ޑޮލަރުގެ ފީއެއް ދެއްކި އެވެ. މިލާނާ އެކު، 2028 ވަނަ އަހަރުގެ ޖޫން މަހުގެ ނިޔަލަށް ކޮންޓްރެކްޓް އޮތް ލެއާއޯ ވަނީ އެ ޓީމަށް ކުޅެދިން، 289 މެޗުން 80 ގޯލު ޖަހައި، 65 ލަނޑު ޖަހަން ފުރުސަތު ހޯދައިދީފަ އެެވެ.
