ރޯމް (މެއި 10) - އިޓާލިއަން ލީގުގެ ޗެމްޕިއަން، އިންޓަ މިލާނުން ލީގުގައި ރޭ ކުޅުނު މެޗުގައި، ލާޒިއޯ އަތުން ވަނީ 3-0 އިން މޮޅުވެއްޖެ އެވެ.
މިއީ، މިދިޔަ ހަފްތާގައި ޕާމާ އަތުން މޮޅުވެ، އިންޓަ އިން ލީގުގެ ޗެމްޕިއަންކަން، 21 ވަނަ ފަހަރަށް ޔަގީންކުރި ފަހުން އެ ޓީމުން ކުޅުނު ފުރަތަމަ މެޗެވެ. ލާޒިއޯ އަތުން ރޭ އިންޓަ އިން މޮޅުވިއިރު، މީގެ ހަަތަރު ދުވަސް ފަހުން އިޓާލިއަން ކަޕް ފައިނަލުގައި މި ދެ ޓީމު ބައްދަލުކުރާނެ އެވެ. މިއީ، އެ މެޗުގެ ކުރިން ކޮންފިޑެންސް ހޯދަން ބަލާއިރު، އިންޓަ އަށް މުހިންމު ނަތީޖާ އެކެވެ.
ލާޒިއޯގެ ސަޕޯޓަރުން އެ ޓީމުގެ މެނޭޖްމަންޓާ މެދު ހިތްހަމަނުޖެހިގެން ހޯމް މެޗުތައް ބޮއިކޮޓް ކުރަމުންދާއިރު، ރޭގެ މެޗުގައި ވެސް ގިނަ ހުސް ސީޓުތަކެއް ރޯމްގެ އޮލިމްޕިކް ސްޓޭޑިއަމްގައި ހުއްޓެވެ.
އިންޓަ އިން ރޭގެ މެޗު ފަށައިގެން ހަ މިނިޓް ތެރޭ ލީޑުނެގި އެވެ. މި ލަނޑު ޖަހައިދިނީ ޓީމުގެ ކެޕްޓަން، ލައުޓާރޯ މާޓީނޭޒް އެވެ. މިއީ، އޭރިއާތެރެއަށް އެއްލި ދިގު އެއްލުމެއްގައި މާކަސް ތުރާމް ބޮލުން ޖައްސާލި ބޯޅައެއް ގޯލުގެ ތިރީ ކަަނަށް ފޮނުވާލައިގެން މާޓީނޭޒް ޖެހި ގޯލެކެވެ. އޭގެ ތިން މިނިޓް ފަހުން، އޭރިއާތެެރެއިން ތުރާމް ޖެހި ބޯޅަ އަމާޒުވީ ގޯލުގެ އަރިމަތީ ދާގަނޑަށެވެ.
ފުރަތަމަ ހާފު ނިމުމުގެ ކުރިން އިންޓަ އިން ލީޑުފުޅާކުރި އެެވެ. މެޗުގެ 38 ވަނަ މިނިޓްގައި މި ލަނޑު ޖެހީ ޕީޓާ ސުޗިޗް އެވެ. މާޓީނޭޒް ދިން ބޯޅައެއް، ސުޗިޗް ވަނީ އޭރިއާބޭރުން ގޯލުގެ ކަނަށް އަމާޒުކޮށްލައިފަ އެވެ. ދެ ގޯލުގެ ލީޑެއް ލިބިފައި އޮތުމުން، އިންޓަ އިން ފުރަތަމަ ހާފު ނިންމާލީ ހަމަޖެހިލައިގެން އޮވެ އެވެ.
ދެ ވަނަ ހާފުގެ ކުޅުން ފަށައިގެން ހަތަރު ވަނަ މިނިޓްގައި އިންޓަގެ ޔަން ބިސެކް އަށް ލިބުނު ހުސް ފުރުސަތުގައި ފޮނުވާލި ބޯޅަ ލާޒިއޯ ކީޕަރު، އެޑޮއާޑޯ މޮޓާ ވަނީ މަތަކޮށްފަ އެވެ.
ލާޒިއޯ އިން މެޗުގެ ފަހު ބައިގަނޑިއިރު ކުޅެން ޖެހުނީ ކުޅުންތެރިއަކު މަދުކޮށެވެ. އެއީ، މެޗުގެ 59 ވަނަ މިނިޓްގައި ލާޒިއޯގެ ޑިފެންޑަރު، އަލެސިއޯ ރޮމަނިއޯލީ އަށް ރަތެއް ދެއްކުމުންނެވެ. އޭނާ އަށް ރަތެއް ދެއްކީ ވީޑިއޯ އެސިސްޓަންޓް ރެފްރީ (ވީއޭއާރް)ގެ އެހީ ހޯދައިފަ އެވެ. މިއީ، އިންޓަގެ އަންގެ ބޮނީ އަށް ރޮމަނިއޯލީ ކުރި ނުރައްކާތެރި ފައުލަކަށް ދެއްކި ރަތެކެވެ.
ކުޅުންތެރިއަކު މަދުކޮށް ކުޅެ، ލާޒިއޯ އިން ގޯލެއް ޖެހޭތޯ މަސައްކަތްކުރި އެވެ. އެ ގޮތުން، ލާޒިއޯގެ ގުސްޓާވް އައިސަކްސަން ފޮނުވާލި ބޯޅަ ގޯލަށް ވަނުމުގެ ކުރިން އިންޓަގެ ފުލްބެކް، ކާލޯސް އަގުސްޓޯ ވަނީ ސަލާމަތްކޮށްފަ އެެވެ.
މެޗުގައި އިންޓަ އިން ފަހު ލަނޑު ޖެހީ 76 ވަނަ މިނިޓްގަ އެވެ. މިއީ، އޭރިއާތެރެއިން ބޮނީ ދިން ބޯޅައަކުން ހެންރިކް މިކިތާރްޔަން ޖެހި ގޯލެކެވެ. އޭނާ ފޮނުވާލި ބޯޅަ އަމާޒުވީ ގޯލުގެ މަތީ ދާގަނޑަށެވެ.
އިޓާލިއަން ލީގުގައި ރޭ ލެޗޭ ދަނޑުގައި ކުޅުނު މެޗުން ޔުވެންޓަސް މޮޅުވީ 1-0 އިންނެވެ. މެޗުގައި ފެނިގެންދިޔަ ހަމައެކަނި ލަނޑު ފުރަތަަމަ މިނިޓްގައި ކާމިޔާބުކުރީ ޑޫސާން ވްލަހޯވިޗް އެވެ. މި މެޗުގައި ފަހުން، ވްލަހޯވިޗާއި ޕިއޭރޭ ކަލޫލޫ ޖެހި ގޯލުތައް ވީއޭއާރް އިން ނިންމީ ބަލައިނުގަންނާށެވެ.
