މިލާން (އޭޕްރީލް 27) - އިޓާލިއަން ލީގުގައި ރޭ ފަހު ވަގުތު ޓޮރިނޯ އިން ލަނޑުތައް ޖަހައި، 2-2 އިން އިންޓަ މިލާނާ އެއްވަރުވުމުން، އެ މެޗުން އިންޓަ އަށް މޮޅުވެވުމުގެ ފައިދާނަގަން ނުކުތް، އޭސީ މިލާނުން ލަނޑެއް ނުޖެހި 0-0 އިން ޔުވެންޓަސްއާ އެއްވަރުވެއްޖެ އެވެ.
ރޭގެ ނަތީޖާތަކަށް ފަހު، އިންޓަ އެއް ވަނައިގައި އޮތީ 10 ޕޮއިންޓުގެ ލީޑަކާ އެކު އެވެ. އެއީ، 34 މެޗުން 79 ޕޮއިންޓް ހޯދައިގެންނެވެ. ދެ ވަނައިގައި އޮތް މި ހަފްތާގައި ކްރެމޮނީސޭ އަތުން 4-0 އިން މޮޅުވެ، 34 މެޗުން 69 ޕޮއިންޓް ހަމަކުރި އެންމެ ފަހުގެ ޗެމްޕިއަން، ނަޕޯލީ އެވެ. ތިން ވަނައިގައި އޮތް މިލާނަށް 34 މެޗުން 67 ޕޮއިންޓް ލިބިފައިވާއިރު، ހަތަރެއްގައި އޮތް ޔުވެންޓަސް އަށް ވަނީ 34 މެޗުން 64 ޕޮއިންޓް ލިބިފަ އެވެ. އަދި، ފަސް ވަނައިގައި އޮތް ކޯމޯ އާއި ހަ ވަނައިގައި އޮތް ރޯމާ އަށް 34 މެޗުން ވަނީ 61 ޕޮއިންޓް ލިބިފަ އެވެ.
ޓިއުރިންގައި ރޭ ކުޅުނު އިންޓަ އިން ފުރަތަމަ ހާފު ނިންމާލީ ލީޑުގައި އޮވެ އެވެ. މިއީ، 23 ވަނަ މިނިޓްގައި ފެޑެރީކޯ ޑި މާކޯ ދިން ބޯޅައަކުން މާކަސް ތުރާމް ޖެހި ގޯލެކެވެ. އަދި، މެޗުގެ 61 ވަނަ މިނިޓްގައި ޑި މާކޯ ދިން ބޯޅައަކުން ޔެން ބިސެކް ވަނީ އިންޓަގެ ލީޑުފުޅާކޮށްދީފަ އެވެ. މި މެޗުގައި ތަނަވަސްކޮށްދިން ދެ ފުރުސަތާ އެކު، ޑި މާކޯ ވަނީ މި ސީޒަނުގައި ޖުމްލަ އެކު، ލަނޑު ޖަހަން ލީގުގައި 18 ފުރުސަތެއް ތަަނަވަސްކޮށްދީ އިޓާލިއަން ލީގުގެ އެއް ސީޒަނެއްގެ އެސިސްޓް ރެކޯޑް ހަދައިފަ އެވެ.
ޓޮރިނޯ އިން މެޗުގެ ތެރެއަށް އެނބުރި އައުމުގެ މަސައްކަތުގެ ތެރެއިން ފުރަތަމަ ލަނޑު ޖެހީ، 70 ވަނަ މިނިޓްގަ އެވެ. މިއީ، ޖިއޮވާނީ ސިމިއޯނީ ޖެހި ގޯލެކެވެ. އަދި، އޭގެ ނުވަ މިނިޓް ފަހުން ޓޮރިނޯ އިން އެއްވަރުކުރި އެވެ. މި ލަނޑު އެ ޓީމަށް ކާމިޔާބުކޮށްދިނީ ޕެނަލްޓީ އަކުން، ނިކޯލާ ވްލަސިޗް އެެވެ. މިއީ، ޓޮރިނޯގެ ޑުވާން ޒަޕަޓާ ބޮލުން ފޮނުވާލި ބޯޅައެއް އިންޓަގެ ކާލޯސް އަގުސްޓޯ އަތުގައި ޖެހުމުން ދިން ޕެނަލްޓީ އެކެވެ.
ޓޮރިނޯ އަތުން މޮޅުވި ނަމަ އަންނަ ހަފްތާގައި ޕާމާ އަތުން ބަލިނުވެ ފަރުޖައްސާލައިގެން ވެސް އިންޓަ އަށް ލީގު ލިބޭނެ އެވެ. އެކަމަކު، މިހާރު އޮތްގޮތުން އިންޓަ އިން ޖެހޭނީ ޕާމާ ބަލިކުރާށެވެ.
