މިލާން (އޭޕްރީލް 18) - އިޓާލިއަން ލީގުގައި ރޭ ކަލިއަރީ 3-0 އިން ބަލިކޮށް، ތާވަލުގެ ކުރިގައި 12 ޕޮއިންޓުގެ ލީޑެއް ނަގައި އިންޓަ މިލާނުން ލީގު ޗެމްޕިއަންކަން ހޯދުމާ ގާތަށް ޖެހިލައިފި އެވެ.
ލީގުގެ އެއް ވަަނައިގައި އޮތް އިންޓަ އަށް 33 މެޗުން 78 ޕޮއިންޓް ލިބިފައިވާއިރު، ދެ ވަނައިގައި އޮތް އެންމެ ފަހުގެ ޗެމްޕިއަން، ނަޕޯލީގެ އޮތީ 32 މެޗުން 66 ޕޮއިންޓެވެ. ތިން ވަނައިގައި އޮތް އޭސީ މިލާނަށް 32 މެޗުން 63 ޕޮއިންޓް ލިބިފައިވާއިރު، ހަތަރެއްގައި ޔުވެންޓަސް އޮތީ 32 މެޗުން 60 ޕޮއިންޓް ހޯދައިގެންނެވެ. އަދި، ފަސް ވަނައިގައި އޮތް ކޯމޯ އިން ރޭ ކުޅުނު މެޗުގައި ސަސުއޯލޯ އަަތުން 2-1 އިން ބަލިވިއިރު، ކޯމޯ އަށް 33 މެޗުން ލިބިފައިވަނީ 58 ޕޮއިންޓެވެ.
އިންޓަ ދަނޑުގައި ކުޅުނު މި މެޗުގެ ފުރަތަމަ ހާފުގައި އިންޓަގެ ފޯވާޑް، ޕިއޯ އެސްޕޮސީޓޯ ޖެހި ބޯޅައެއް ކަލިއަރީ ކީޕަރު، އެލާ ކަޕްރީލޭ ވަނީ މަތަކޮށްފަ އެެވެ. އަނިޔާގެ ސަބަބުން އިންޓަގެ ފޯވާޑް، ލައުޓާރޯ މާޓީނޭޒް މި މެޗުގައި ނުކުޅެ އެވެ.
ފުރަތަމަ ހާފުގައި ލަނޑެއް ނުޖެހުނު ނަމަވެސް ދެ ވަނަ ހާފުގައި ކުޅުން ފަށައިގެން ހަތް މިނިޓް ތެރޭ އިންޓަ އިން ލީޑުނެގި އެވެ. ފެޑެރީކޯ ޑި މާކޯ އަރިމަތިން ގޮސް ބޯޅަ ހިފައިގެން، ގޯލު ކުރިމައްޗަށް ހުރަސްކޮށްލި ބޯޅަ، މާކަސް ތުރާމް ވަނީ ގޯލުގެ ތެރެއަށް ފޮނުވާލައިފަ އެވެ. މިއީ، ލީގުގައި އެންމެ ފަހުން ކުޅުނު ތިން މެޗުގެ ތެރެއިން ތުރާމް ޖެހި ހަތަރު ވަނަ ގޯލެވެ.
ލީޑުނެގިތާ ހަތަރު މިނިޓް ފަހުން، އިންޓަ އިން ދެ ވަނަ ލަނޑު ޖެހި އެވެ. މިއީ، މެޗުގެ 56 ވަނަ މިނިޓްގައި އޭރިއާ ކައިރިން ލިބުނު ބޯޅައެއް ހިފައިގެން، ކުރިއަށް ޖެހިލުމަށް ފަހު، ގޯލުގެ ކަނަށް ބޯޅަ އަމާޒުކޮށްލައިގެން ނިކޯލޯ ބަރެއްލާ ޖެހި ލަނޑެކެވެ. ބަރެއްލާ އަކީ ކުރިން ކަލިއަރީގެ ކުޅުންތެރިއެއް ކަމަށްވާތީވެ، އެ ޓީމަށް އިހުތިރާމް އަދާކުރުމުގެ ގޮތުން، ގޯލު ޖެހުމަށް ފަހު އުފާފާޅެއް ނުކުރެ އެެވެ.
އިންޓަގެ ފަހު ލަނޑު ޖެހީ އިތުރު ވަގުތުގެ ތެރޭގަ އެވެ. އޭރިއާބޭރުން ޑެންޒެލް ޑަމްފްރީސް ދިން ބޯޅައެއް ގޯލުގެ މަތީ ކަނަށް އަމާޒުކޮށްލައިގެން މި ލަނޑު ޖެހީ އިންޓަގެ ޕޮލެންޑް މިޑްފީލްޑަރު، ޕިއޮޓްރޭ ޒިއެލިންސްކީ އެވެ.
އިންޓަ އިން 21 ވަނަ ފަހަރަށް ލީގު ޗެމްޕިއަންކަން ހޯދުމަށް އަމާޒުހިފާފައިވާއިރު، އެ ޓީމު އޮތީ އިޓާލިއަން ކަޕްގެ ސެމީ ފައިނަލުގަ އެވެ. ފުރަތަމަ ލެގުގައި ކޯމޯއާ ލަނޑެއް ނުޖެހި އެއްވަރުވިއިރު، ބުދަ ދުވަހު އަމިއްލަ ދަނޑުގައި ދެ ވަނަ ލެގުގެ މެޗަށް އިންޓަ އިން ނުކުންނާނެ އެވެ.
