މިލާން (އޭޕްރީލް 20) - އިޓާލިއަން ލީގުގައި ރޭ ކުޅުނު މެޗުތަކުން އޭސީ މިލާނާއި ޔުވެންޓަސް އިން ކުރިއަށްދިއުމަށްޓަކައި، މުހިންމު މޮޅެއް ހޯދައިފި އެވެ.
އެ ގޮތުން، ހެލަސް ވެރޯނާ ދަނޑުގައި އޭސީ މިލާން މޮޅުވީ 1-0 އިންނެވެ. އަމިއްލަ ދަނޑުގައިި ކުޅެގެން ޔުވެންޓަސް އިން ވަނީ ބޮލޯނިއާ އަތުން 2-0 އިން މޮޅުވެފަ އެވެ. މިލާނުން ހޯދި މޮޅާ އެކު، އެ ޓީމުން ވަނީ ލީގުގެ ދެ ވަނަ އަށް ޖެހިލައިފަަ އެވެ. އެއް ވަނައިގައި އޮތް އިންޓަ މިލާނަށް 33 މެޗުން 78 ޕޮއިންޓް ލިބިފައިވާއިރު، ދެ ވަނައިގައި އޮތް އޭސީ މިލާނާއި ތިން ވަަނަައިގައި އޮތް އެންމެ ފަހުގެ ޗެމްޕިއަން، ނަޕޯލީ އަށް ވަނީ 33 މެޗުން 66 ޕޮއިންޓް ލިބިފަ އެވެ. ޔުވެންޓަސް، ހަތަރު ވަނައިގައި އޮތީ 33 މެޗުން 63 ޕޮއިންޓް ހޯދައިގެންނެވެ.
މިލާނުން ރޭގެ މެޗަށް ނުކުތްއިރު ލީގުގައި އެންމެ ފަހުން ކުޅުނު ދެ މެޗުން ވެސް ވަނީ ބަލިވެފަ އެވެ. އެހެންކަމުން، ރޭގެ މެޗުން ނަތީޖާ ނެރުމަށްޓަކައި، އެ ޓީމަށް ކޮންމެ ވެސް ވަރެއްގެ ޕްރެޝަރެއް އޮތެވެ. މެޗުގައި ފެނިގެންދިޔަ ހަމައެކަނި ލަނޑު ފުރަތަމަ ހާފުގައި މިލާނަށް ޖަހައިދިނީ، ފްރާންސްގެ މިޑްފީލްޑަރު އެޑްރިއަން ރަބިއޯ އެވެ. މިއީ، ރަފައެލް ލެއާއޯ އޭރިއާތެރެއަށް ދިން ބޯޅައަކަށް އަރައި، ތިރިތިރިން ގޯލަށް ފޮނުވާލައިގެން ރަބިއޯ ޖެހި ގޯލެކެވެ.
މެޗުގެ ދެ ވަނަ ހާފުގައި ދެ ޓީމުން ވެސް ގިނަ އެޓޭކްތަކެއް ކުރި ނަމަވެސް އިތުރު ގޯލެއް ފެނިފައިނުވެ އެވެ.
ފަހަކަށް އައިސް ރަނގަޅު ފޯމެއްގައި ކުޅެމުން އަންނަ ޔުވެންޓަސް އިން ރޭ ބޮލޯނިއާ ބަލިކޮށްފައިވަނީ ކޮންމެ ހާފެއްގައި ގޯލެއް ޖަހައިގެންނެވެ. އެ ގޮތުން، މެޗު ފެށިގެން ދެ ވަނަ މިނިޓްގައި ޔުވެންޓަސް އިން ވަނީ ލީޑުނަގައިފަ އެވެ. މިއީ، ޕިއޭރޭ ކަލޫލޫ ދިން ބޯޅައަކުން އެ ޓީމުގެ ފޯވާޑް، ޖޮނަތަން ޑޭވިޑް ކާމިޔާބުކުރި ގޯލެކެވެ.
އެއް ގޯލު ކުރީގައި އޮވެގެން ފުރަތަމަ ހާފު ނިންމާލި ޔުވެންޓަސް އިން ވަނީ ދެ ވަނަ ހާފުގެ ކުޅުން ފެށިގެން 12 މިނިޓް ތެރޭ ދެ ވަަނަ ލަނޑު ޖަހައިފަ އެވެ. މިއީ، ވެސްޓަން މެކްކެނީ ތަނަވަސްކޮށްދިން ފުރުސަތެއްގައި، ކެޕްރެން ތުރާމް ޖެހި ގޯލެކެވެ.
ލީގުގެ ތިން ވަނައިގައި އޮތް ނަޕޯލީން މި ހަފްތާގައި ކުޅުނު މެޗުން ވަނީ 2-0 އިން ލާޒިއޯ އަތުން ބަލިވެފަ އެވެ. އެއް ވަނައިގައި އޮތް އިންޓަ އިން މި ހަފްތާގައި ކަލިއަރީގެ މައްޗަށް ކާމިޔާބު ހޯދީ 3-0 އިންނެވެ.
