ލަންޑަން (މެއި 9) - އިނގިރޭސި ނޫސްވެރިންގެ ޖަމިއްޔާ، ފުޓްބޯލް ރައިޓާސް އެސޯސިއޭޝަނުން ހޮވި މި ސީޒަނުގެ އެންމެ މޮޅު ކުޅުންތެރިޔާގެ އެވޯޑް، މެންޗެސްޓާ ޔުނައިޓެޑްގެ ކެޕްޓަން، ބްރޫނޯ ފެނާންޑޭސް އަށް ލިބިއްޖެ އެވެ.
މިއީ، 900 އަށް ވުރެން ގިނަ ނޫސްވެރިންގެ ވޯޓަށް ބަލައިގެން، 1948 ވަނަ އަަހަރުން ފެށިގެން, ކޮންމެ ސީޒަނެއްގައި ދެމުން އަންނަ އެވޯޑެެކެވެ. ފެނާންޑޭސް ވަނީ ވޯޓުގެ 45 ޕަސެންޓް ކާމިޔާބުކޮށްފަ އެވެ. އޭނާއާ ވާދަކުރީ އާސެނަލްގެ ޑެކްލަންް ރައިސް އާއި މެންޗެސްޓާ ސިޓީގެ އާލިން ބްރައުޓް ހާލަންޑް އެވެ.
އެ ގޮތުން، ފެނާންޑޭސް، 31، ވަނީ ދެ ވަނަ އަށް ދިޔަ ރައިސް އަށް ވުރެން 28 ވޯޓު އިތުރަށް ހޯދައިފަ އެެވެ.
ފެނާންޑޭސް ވަނީ މި ސީޒަނުގެ ހުރިހާ މުބާރާތެއްގައި ކުޅުނު 34 މެޗުން އަށް ގޯލު ޖެހުމުގެ އިތުރުން 20 ލަނޑު ޖަހަން ފުރުސަތު ތަނަވަސްކޮށްދީފަ އެވެ. ފެނާންޑޭސް އަކީ، 2010 ވަނަ އަހަރު ވޭން ރޫނީ، މި އެވޯޑް ހޯދި ފަހުން، މި މަގާމު ހާސިލްކުރި މެންޗެސްޓާ ޔުނައިޓެޑްގެ ފުރަތަމަ ކުޅުންތެރިޔާ އެވެ.
ސްޕޯޓިން ލިޒްބަންގެ ކުރީގެ ކެޕްޓަން، ފެނާންޑޭސް، ޔުނައިޓެޑާ ގުޅުނީ، 2020 ވަނަ އަހަރުގެ ޖެނުއަރީ މަހުގަ އެވެ. އެއީ 80 މިލިއަން ޑޮލަރުގެ ޑީލެއްގަ އެވެ. އޭނާ ވަނީ، ފުރަތަމަ ފަހަރަށް 2022 ވަނަ އަހަރު ޔުނައިޓެޑާ އެކު އާ އެއްބަސްވުމެއްގައި ސޮއިކޮށްފަ އެވެ. އެ ކޮންޓްރެކްޓް އޮތީ، 2026 ވަނަ އަހަރުގެ ޖޫން މަހުގެ ނިޔަލަށެވެ. ފެނާންޑޭސް، ޔުނައިޓެޑް ދޫކޮށްލަން އުޅޭ ކަމުގެ ވާހަަކަތަކެއް ދެކެވެން ފެށުމާ އެކު، އެ ކްލަބުން ވަނީ ފެނާންޑޭސްގެ ކޮންޓްރެކްޓް، 2027 ވަނަ އަހަރުގެ ޖޫންގެ ނިޔަލަށް އާ ކޮށްފަ އެވެ.
އެކަމަކު، މި ސީޒަން ނިންމާފައި، ކުރިއަށް އޮތް ފީފާ ވޯލްޑް ކަޕަށް ފަހު، ފެނާންޑޭސް ވަނީ ޔުނައިޓެޑާ އެކު، މުސްތަގުބަލާ ބެހޭގޮތުން ވާހަކަ ދައްކަން ނިންމައިފަ އެވެ. ފެނާންޑޭސްގެ ސޮއި ހޯދަން ގިނަ ކްލަބްތަކަކުން ވަނީ ޝައުގުވެރިކަން ފާޅުކޮށްފަ އެވެ.
