ރިއޯ ޑި ޖަނެއިރޯ، ބްރެޒިލް (މެއި 5) - ބްރެޒިލްގެ ފުޓްބޯޅަ ފެޑެރޭޝަނުން އެދިގެން މެންޗެސްޓާ ޔުނައިޓެޑުން މި ސީޒަނުގައި ބާކީ އޮތް ތިން މެޗުގައި މަޓެއުސް ކޫންޏާ ބޭނުންނުކުރަން އެއްބަސްވެފައިވާ ކަމަށް ބްރެޒިލްގެ ނޫސްތަކުން ރިޕޯޓްކޮށްފި އެވެ.
މިދިޔަ ހަފްތާގައި ޔުނައިޓެޑުން ބްރެންޓްފޯޑް އަތުން މޮޅުވި މެޗުގައި އަނިޔާގެ ސަބަބުން ކޫންޏާ ނުކުޅެ އެެވެ. އެކަަމަކު، އޭނާ ވަނީ އާދިއްތަ ދުވަހުގެރޭ ލިވަޕޫލް އަތުން ޔުނައިޓެޑް 3-2 އިން މޮޅުވި، މެޗުގައި އެނބުރި ކުޅުމަށް އައިސް، މެޗުގައި ޔުނައިޓެޑްގެ ފުރަތަމަ ލަނޑު ޖަހައިފަ އެވެ.
އެކަމަކު، ލިވަޕޫލް އަތުން ހޯދި މޮޅާ އެކު، ޔުނައިޓެޑަށް އަންނަ ސީޒަނުގެ ޗެމްޕިއަންސް ލީގުގެ ޖާގައެއް ޔަގީންވެފައިވާއިރު، ބްރެޒިލް ފުޓްބޯޅަ ފެޑެރޭޝަނުން ވަނީ ލީގުގައި ބާކީ ހުރި މެޗުތަކުގައި ކޫންޏާ ބޭނުންނުކޮށް، އަނިޔާއިން އެއްކޮށް ރިކަވާވުމަށް އޭނާ އަށް އަރާމްކުރަން ފުރުސަތު ދިނުމަށް ޔުނައިޓެޑްގެ ކިބައިން އެދިފަ އެވެ.
އީއެސްޕީއެން ބްރެޒިލް އިން ރިޕޯޓްކުރާ ގޮތުގައި ބްރެޒިލް ފުޓްބޯޅަ ފެޑެރޭޝަންގެ އެދުމާ އެއްގޮތަށް ކޫންޏާ ފަހު މެޗުތަކުގައި ބޭނުންނުުކުރަން ޔުނައިޓެޑުން ވަނީ އެއްބަސްވެފަ އެވެ.
މި ސީޒަނުގައި ޔުނައިޓެޑަށް ދެން ބާކީ އޮތް ތިން މެޗަކީ، އަމިއްލަ ދަނޑުގައި ނޮޓިންހަމް ފޮރެސްޓާ ދެކޮޅަށް ކުޅޭ މެޗާއި ރަށުންބޭރުގައި ސަންޑަލެންޑާއި ބްރައިޓަންއާ ބައްދަލުކުރާ މެޗެެވެ.
އެތުލެޓިކޯ މެޑްރިޑަށް ކުރިން ކުޅުނު ކޫންޏާ ގަންނަން މެންޗެސްޓާ ޔުނައިޓެޑުން 84 މިލިއަން ޑޮލަރު (62.5 މިލިއަން ޕައުންޑް)ގެ ފީއެއް ދެއްކި އެވެ. މި ސީޒަނުގައި ކޫންޏާ، ޔުނައިޓެޑަށް ކުޅެދިން 33 މެޗުން ނުވަ ގޯލު ޖަހައި، ހަތަރު ލަނޑު ޖަހަން ފުރުސަތު ވަނީ ހޯދައިދީފަ އެވެ.
ބްރެޒިލް ގައުމީ ޓީމަށް ކުޅުނު 21 މެޗުން ކޫންޏާ ވަނީ އެއް ގޯލު ޖަހައިފަ އެވެ.
