މެންޗެސްޓާ (އޭޕްރީލް 20) - ލޯން އެއްބަސްވުމެއްގެ ދަށުން ބާސެލޯނާ އަށް ކުޅެމުން އަންނަ އިނގިރޭސި ފޯވާޑް، މާކަސް ރެޝްފޯޑްގެ އެއްބަސްވުން ދާއިމީ ކުރަން ބާސެލޯނާ އިން ހުށަހަޅާ ޑީލާ މެދު މަޝްވަރާ ކުރަން މެންޗެސްޓާ ޔުނައިޓެޑުން ދެކޮޅު ހަދާފައިވާ ކަމަށް ރިޕޯޓްތައް ބުނެފި އެވެ.
މެންޗެސްޓާ ޔުނައިޓެޑްގެ ކޮންޓްރެކްޓެއްގައި ހުރި، ރެޝްފޯޑް، 28، ބާސެލޯނާ އަށް ގެންދިޔައީ މި ސީޒަން ނިންމައިފައި، 30 މިލިއަން ޑޮލަރަށް އޭނާގެ އެއްބަސްވުން ދާއިމީ ކުރެވޭ ގޮތަށް ޝަރުތު ކޮށްފަ އެވެ. ލޯންގެ މުއްދަތުގައި ރެޝްފޯޑްގެ މުޅި މުސާރަ ދޭނީ ވެސް ބާސެލޯނާ އިންނެވެ. ރެޝްފޯޑް، ޔުނައިޓެޑާ އެކު ކޮންޓްރެކްޓް އޮތީ 2028 ވަނަ އަހަރުގެ ޖޫން މަހުގެ ނިޔަލަށެވެ.
ރިޕޯޓްތައް ބުނާގޮތުން، ބާސެލޯނާގެ މާލީ ހާލަތު ހުރި ގޮތުންނާއި ތަފާތު އެކި ކަންކަމަށް ބަލާފައި، އެ ކްލަބުން ރެޝްފޯޑްގެ އެއްބަސްވުން ދާއިމީ ކުރަން ދައްކަން ޖެހޭ ޓްރާންސްފާ ފީ ދޭން ބޭނުންވަނީ، ތިން އިންސްޓޯލްމަންޓަށް ބަހާލައިގެންނެވެ. ޖުމްލަ އެކު، ތިން އަހަރަށް ދެމިގެންދާ ގޮތަށް ބަހާލައިގެން މި ފީ ދޭން ބާސެލޯނާ އިން ހުށަހަޅަން ތައްޔާރުވާއިރު، އެ ގޮތަށް ޔުނައިޓެޑުން ރުހޭނެ ކަމުގެ ފުރުސަތު ކުރިން ވެސް އޮތީ ކުޑަކޮށް ކަމަށް އޮތީ ބެލެވިފަ އެވެ.
އިނގިރޭސި މީޑިއާ ރިޕޯޓްތައް ބުނާގޮތުން، ބާސެލޯނާ އިން މި ޑީލް ކުރިއަށްގެންދާނެ ގޮތެއް މަޝްވަރާ ކުރުމަށް ޔުނައިޓެޑަށް ހުށެހެޅުމުން، ޔުނައިޓެޑްެގެ ޖަވާބަކީ، އެންމެ ފުރަތަމަ އެއްބަސްވެފައި އޮތް ޑީލާ އެއްގޮތަށް ކުރިއަށްދިއުމަށެވެ. އެއީ، އެއްބަސްވުން ދާއިމީ ކުރާނަމަ، 30 މިލިއަން ޑޮލަރު ދެެއްކުމެވެ. ރިޕޯޓްތައް ބުނާގޮތުން، އެ ގޮތަށް ބާސެލޯނާ އަށް ކުރިއަށް ދެވެން ނެތުމުން އަންނަ ސީޒަނުގައި، ރެޝްފޯޑް އަލުން ޔުނައިޓެޑުން ފެނުމުގެ ފުރުސަތު އެބައޮތެވެ.
މި ސީޒަނުގެ މިހާތަނަށް ރެޝްފޯޑް ވަނީ ބާސެލޯނާގެ 43 މެޗުގައި ކުޅެ، 12 ލަނޑު ޖަހައި، 13 ލަނޑު ޖަހަން ފުރުސަތު ހޯދައިދީފައެވެ.
ލޯން އެއްބަސްވުމެއްގެ ދަށުން ރެޝްފޯޑް މިދިިޔަ ސީޒަނުގެ ފަހު ބައި ހޭދަކުރީ އެސްޓަން ވިލާގަ އެވެ.
