މެންޗެސްޓާ (އޭޕްރީލް 28) - އިނގިރޭސި ޕްރިމިއާ ލީގުގައި ރޭ ބްރެންޓްފޯޑް އަތުން 2-1 އިން މޮޅުވެ، މެންޗެސްޓާ ޔުނައިޓެޑުން އަންނަ ސީޒަނުގެ ޗެމްޕިއަންސް ލީގަށް ކޮލިފައިވުމާ ފިޔަވަޅަކަށް ގާތަށް ޖެހިލައިފި އެވެ.
އިނގިރޭސި ޕްރިމިއާ ލީގުގައި ގަދަ ފަސް ޓީމަށް އަންނަ ސީޒަނުގެ ޗެމްޕިއަންސް ލީގުން ފުރުސަތު ލިބޭއިރު، ޔުނައިޓެޑް އޮތީ ތިން ވަނައިގަ އެވެ. ޔުނައިޓެޑަށް 34 މެޗުން 61 ޕޮއިންޓް ލިބިފައިވާއިރު، ހަތަރެއްގައި އޮތް ލިވަޕޫލާއި ފަސް ވަނައިގައި އޮތް އެސްޓަން ވިލާ އަށް 34 މެޗުން 58 ޕޮއިންޓް ލިބިފައިވެ އެވެ.
އޯލްޑް ޓްރެފޯޑްގައި ރޭ ކުޅުނު މެޗު ފަށައިގެން މާ ލަސްތަކެއް ނުވެ، ޔުނައިޓެޑަށް ލީޑުނަގައިދޭން އަމަދު ޑިއާލޯ އަށް ލިބުނު ރަނުގެ ފުރުސަތުގައި އޭނާ ފޮނުވާލި ބޯޅަ ބްރެންޓްފޯޑްގެ ޑިފެންޑަރުން ވަނީ ގޯލު ރޮނގުމަތިން ސަލާމަތްކޮށްފަ އެވެ. ޔުނައިޓެޑުން ލީޑުނެގީ 11 ވަނަ މިނިޓްގަ އެވެ. މިއީ، ކޯނަރަކުން ހުރަސްވި ބޯޅައެއްގައި، ހެރީ މެގުއާ ބޮލުން ޖައްސާލި ބޯޅަ، ބޮލުން ގޯލަށް ފޮނުވާލައިގެން ކަސެމީރޯ ޖެހި ގޯލެކެވެ.
އޭގެ ފަހުން، ބްރެންޓްފޯޑަށް އެއްވަރުކޮށްދޭން ޑަންގޯ އުޓާރާ އާއި އީގޯ ތިއާގޯ އަށް ގިނަ ހުސް ފުރުސަތުތަކެއް ލިބި ބޭނުންނުކުރެވުނެވެ. އަދި، މައިކަލް ކަޔޯޑޭ އާއި މިކެލް ޑަމްސްގާޑް ފޮނުވާލި ބޯޅަތައް ޔުނައިޓެޑްގެ ކީޕަރު ސެން ލަމެންސް ވަނީ މަތަކޮށްފަ އެވެ.
ފުރަތަމަ ހާފު ނިމުމުގެ ކުރިން، ޔުނައިޓެޑުން ވަނީ ދެ ވަނަ ލަނޑު ޖަހައިފަ އެވެ. އެ ގޮތުން، މެޗުގެ 43 ވަނަ މިނިޓްގައި ޔުނައިޓެޑުގެ ދެ ވަނަ ލަނޑު ޖެހީ ކައުންޓަ އެޓޭކުގައި ބެންޖަމިން ސެސްކޯ އެވެ. މިއީ، ބްރޫނޯ ފެނާންޑޭސް ދިން ބޯޅައަކުން އޭރިއާތެެރެއިން ސެސްކޯ ޖެހި ގޯލެކެވެ. މިއީ، މި ފަހަރު ލީގުގައި ފެނާންޑޭސް ގޯލެއް ޖަހަން ތަނަވަސްކުރި 19 ވަނަ ފުރުސަތެވެ. މެންޗެސްޓާ ސިޓީގެ ކުރީގެ ތަރި، ކެވިން ޑި ބްރޭނާ އާއި އާސެނަލްގެ ލެޖެންޑް، ތިއެރީ އޮންރީގެ ރެކޯޑާ ހަމަކުރަން ފެނާންޑޭސް އަށް ބޭނުންވަނީ އެންމެ އެސިސްޓެކެވެ.
މެޗުގެ 87 ވަަނަ މިނިޓްގައި ބްރެންޓްފޯޑްގެ ހަމައެކަނި ލަނޑު ޖެހީ މަތިއަސް ޖެންސަން އެވެ. މިއީ، އޭރިއާބޭރުން ގޯލުގެ ތިރީ ކަނަށް ބޯޅަ އަމާޒުކޮށްލައިގެން ޖެންސަން ޖެހި ލަނޑެކެވެ.
ބްރެންޓްފޯޑް އޮތީ ކުޅުނު 34 މެޗުން ލިބުނު 48 ޕޮއިންޓާ އެކު ލީގުގެ ނުވަ ވަނައިގަ އެވެ.
