ރާއްޖޭގައި ގައުމީ ލެވަލްގައި ފުޓްސަލް ލީގެއް އިއުލާނުކޮށްފައިވާއިރު، އެ މުބާރާތް ރަސްމީކޮށް ފެށިގެން ދިއުމާ އެކު، ގައުމީ ފުޓްސަަލް ޓީމުގެ ކުޅުންތެރިންނަށް އެހެން ކުޅިވަރުތަކުގެ ގައުމީ ޓީމުތަކެކޭ އެއްގޮތަށް މުސާރަ އާއި އެހެނިހެން ކަންކަން ހަމަޖެހިގެންދާނެ ކަމަށް ފުޓްބޯލް އެސޯސިއޭޝަންގެ ރައީސް، އަހުމަދު ތޯރިގު (ޓޮމް) ވިދާޅުވެއްޖެ އެވެ.
ގައުމީ ފުޓްސަލް ޓީމުގެ ކަންކަމަށް އަބަދުވެސް އޮންނަނީ "އަންނަ އަހަރު": އިންމި
ރާއްޖޭގެ ގައުމީ ފުޓްސަލް ޓީމުގެ ކަންކަން ފުރިހަަމަކޮށްދިނުމަށްޓަކައި، އަބަދުވެސް ރަސްމީ އިދާރާތަކުން އިވޭ ވާހަކަ އަކީ ބަޖެޓްގައި ހިމަނައިގެން "އަންނަ އަހަރު" އެކަން ކޮށްދޭނެކަން ކަމުގައި، ގައުމީ ފުޓްސަލް ޓީމުގެ ކެޕްޓަން، މުހައްމަދު އިމްރާން (އިންމި) ވަނީ ބުނެފައި.
އިއްޔެ ބޭއްވި ނޫސްވެރިންގެ ބައްދަލުވުމުގައި ތޯރިގު ވިދާޅުވީ، ގައުމީ ފުޓްސަލް ޓީމަށް ލިބެންޖެހޭ އަދި ފުރިހަމަވާން ޖެހޭ ކަންކަން މި ފެށޭ ގައުމީ ލެވަލްގެ ފުޓްސަލް މުބާރާތްތަކާ އެކު ހަމަޖެހިގެންދާނެ ކަމަށެވެ.
އެފްއޭއެމް އިން އިއްޔެ ނޫސްވެރިންގެ ބައްދަލުވުން ބޭއްވީ އެފްއޭއެމްގެ ފުޓްސަލް މުބާރާތްތައް ކްލަބް މޯލްޑިވްސްއާ ގުޅިގެން ކުރިއަށްގެންގޮސް، ކްލަބް މޯލްޑިވްސް އަކީ އެފްއޭއެމް އިން އެންޑޯޒްކުރާ މުބާރާތެއްގެ ގޮތުގައި ހަަމަޖައްސާ އެއްބަސްވުމުގައި ސޮއިކުރަން ބޭއްވި އިވެންޓެކެވެ.
އެފްއޭއެމް ފުޓްސަލް ޗެމްޕިއަންޝިޕް، މައިގަނޑު ހަަތަރު ރީޖަނަކަށް ބަހާލައިގެން ކުރިއަށްގެންދާ ފޯމެޓަށް ބާއްވަން ވަނީ އިއުލާނުކޮށްފަ އެވެ.
ތޯރިގު ސޯޝަލް މީޑިއާގައި އާންމުކުރި ޕޯސްޓެއްގައިވަނީ އަންނަ ހަފްތާގައި ރަޖިސްޓްރޭޝަނަށް ހުޅުވާލާނެ ކަމަށް ވިދާޅުވެފަ އެެވެ. އިއްޔެ، ތޯރިގު ވިދާޅުވީ، އަތޮޅުތަކުގައި ބޭއްވޭ މުބާރާތުގެ ތެރެއިން، ކްލަބް މޯލްޑިވްސްއާ ގުޅޭގޮތަށް ފޯމެޓް ރޭވުމުގެ މަސައްކަތް ކުރަމުން އަންނަ ކަަމަށެވެ.
އެ ގޮތުން، އެފްއޭއެމްގެ ވިސްނުމަކީ، މިހާރު ރާއްޖޭގެ ފުޓްބޯޅައިގެ އޮނިގަނޑު ވެސް ކުރިއަށްގެންދާ އުސޫލުން ހަތަރު ރީޖަނަކަށް ބެހުމަށް ފަހު ފުޓްސަލް މުބާރާތް ކުރިއަށްގެންދިއުމަށެެވެ. މިއީ، މި ގޮތަށް ރަށްރަށަށް ހުޅުވާލައިގެން އެފްއޭއެމް އިން ބާއްވާ ފުރަަތަމަ ފުޓްސަލް މުބާރާތެވެ.
އެފްއޭއެމުން އިއުލާނުކޮށްފައިވާ ގޮތުން، ހަތަރު ޒޯނަކަށް ރާއްޖެ ބަހާލާއިރު، ނޯތު ރީޖަންގައި ހިމެނެނީ، ހއ. ހދ. ށ، ނ، ރ، ބ، ޅ، ކުޅުދުއްފުށި ސިޓީ އެވެ. އަދި، ސެންޓްރަލް ރީޖަންގައި ހިމެނެނީ، ކ، އއ، އދ، ވ، މ، ފ، ދ އެވެ. ސައުތު ރީޖަންގައި ތ، ލ، ގއ، ގދ، ތިނަދޫ، ފުވައްމުލައް ސިޓީ، އައްޑޫ ސިޓީ ހިމެނޭއިރު، ދެން އޮންނާނީ، މާލެ ރީޖަން އެވެ. އެއީ، މާލެ ސިޓީ ކްލަބުތައް، ދެ ވަނަ ޑިވިޝަނުގެ ކްލަބްތައް، ތިން ވަނަ ޑިވިޝަނުގެ ކްލަބްތަކެވެ.
އެފްއޭއެމް އިން މި ފޯމެޓަށް ފުޓްސަލް މުބާރާތް ބާއްވައި، ކްލަބް މޯލްޑިވްސްއާ އެކު، މުބާރާތް ކުރިއަށްގެންގޮސް، އެފްއޭއެމް އިން އެވޯޑްސް ދިނުމުގައި ބަލާނީ ވެސް މި މުބާރާތަށް ކަމަށް ތޯރިގު ވަނީ ވިދާޅުވެފަ އެވެ.
