ކްލަބް އެމްޓީސީސީގެ މައްޗަށް 3-1 އިން ފައިނަލުގައި ކުރިހޯދައި، ސްޓެލްކޯ ރެކްރިއޭޝަން ކްލަބުން ސައްތަ އިން ސައްތަ ރެކޯޑް ދަމަހައްޓައި، އޮފީސް ލީގު ފުޓްސަލް މުބާރާތުގެ ތަށި ދިފާއުކޮށްފި އެވެ.
މިދިޔަ އަހަރު އޮފީސްތަކަށް ހާއްސަކޮށް ފެށި ފުޓްސަލް މުބާރާތް، އޮފީސް ލީގުގެ ޗެމްޕިއަންކަން ސްޓެލްކޯ އިން ހޯދީ ފައިނަލުގައި ޕޮލިސް ކްލަބް އަތުން 2-0 އިން މޮޅުވެގެންނެވެ. މި ފަަހަރުގެ ފައިނަލުގައި ސްޓެލްކޯ އިން ރޭ ވަނީ ރަނގަޅު ކުޅުމަކާ އެކު، އެމްޓީސީސީ ބަލިކޮށްފަ އެވެ.
ރެހެންދި ފުޓްސަލް ދަނޑުގައި ރޭ ކުޅުނު ފައިނަލް މެޗުގައި ސްޓެލްކޯގެ ތިން ގޯލު ވެސް ޖެހީ، އެ ޓީމުގެ ކެޕްޓަން، މުއާޒް އަލީ އެވެ. ފުރަތަމަ ހާފުގެ ފަހުކޮޅުގައި މުއާޒް ވަނީ ލިބުނު ފުރުސަތުގައި ތިރިތިރިން ގޯލަށް ބޯޅަ ފޮނުވާލައިގެން ސްޓެލްކޯ އަށް ލީޑުނަގައިދީފަ އެވެ. ދެ ވަނަ ހާފުގައި، އެމްޓީސީސީން ކުރިއަށް ޖެހިގެން ކުޅެ، ފުރުސަތުތަކެއް ހޯދި ނަމަވެސް، މުއާޒް ވަނީ އޭރިއާބޭރުން ފޮނުވާލި ބޯޅައެއް ގޯލަށް ވައްދާލައި ސްޓެލްކޯގެ ލީޑުފުޅާކޮށްދީފަ އެވެ. ސްޓެލްކޯގެ ތިން ވަނަ ލަނޑު ޖަހައި، މުއާޒް، އޭނާގެ ހެޓްރިކް ފުރިހަަަމަކުރި ލަނޑު ޖެހީ އަމިއްލަ ހާފުގެ ތެރެއިން ގޯލަށް ބޯޅަ ވައްދާލައިގެންނެވެ. މުއާޒް، ގޯލަށް ބޯޅަ ވައްދާލީ އެމްޓީސީސީން ޕަވާޕްލޭގައި ކީޕަރު ބަދަލުކުރަން އުޅުނު ވަގުތެއްގަ އެވެ.
ޕަވަޕްލޭފައި ކުރިއަށް ޖެހި އެމްޓީސީސީން ލަނޑެއް ޖެހި އެވެ. މި ލަނޑު ޖެހީ އިސްމާއިލް ރަޔާން އެވެ.
މުބާރާތުގެ މޮޅު ކުޅުންތެރިއަކީ، ސްޓެލްކޯގެ އިބްރާހިމް ރިމާހު (ރިމޭ) އެވެ. އެންމެ ގިނަ ގޯލު ޖެހި ކުޅުންތެރިންނަކީ ރިމޭ އާއި މުއާޒް އެވެ. މޮޅު ފަސް ކުޅުންތެރިންގެ ތެރޭގައި ހިމެނެނީ، ސްޓެލްކޯގެ މުއާޒް، މުހައްމަދު ސިރުހާން އަދި ގޯލްކީޕަރު، އަދުހަމް އަހުމަދު (އަދޭ)ގެ އިތުރުން، އެމްޓީސީސީގެ ކެޕްޓަން، މުހައްމަދު ޝަރީފް (މުޑާ) އާއި ރަޔާން އެވެ.
މުބާރާތުގެ އެންމެ މޮޅު ކޯޗަކީ، އުސްމާން ނަސީރު (އޮއިލޭ) އެވެ. ސްޓެލްކޯ އިން ވަނީ މި ފަހަރުގެ މުބާރާތުގައި ކުޅުނު ހަ މެޗުން މޮޅުވިއިރު، 56 ގޯލު ޖަހައިފަ އެެވެ. އެ ޓީމު ކޮޅަށް ވަދެފައިވަނީ، ފަސް ގޯލެވެ.
