ބާމިންހަމް (މެއި 4) - އިނގިރޭސި ޕްރިމިއާ ލީގުގައި ރޭ އެސްޓަން ވިލާ އަތުން 2-1 އިން މޮޅުވެ، ޓޮޓެންހަމް ހޮޓްސްޕާސް އިން ލީގުގެ ރެލިގޭޝަނުން ސަލާމަތްވުމަށްޓަކައި ކުރާ މަސައްކަތުގައި ބޮޑު ފިޔަވަޅެއް ކުރިއަށް އަޅައިފި އެވެ.
އިޓަލީގެ ކޯޗު ރޮބާޓޯ ޑި ޒާބީ ހަވާލުވެ، ޓޮޓެންހަމްގެ ހާލަތު ބަދަލުކުރަން ކުރާ މަސައްކަތުގައި މިދިޔަ ހަފްތާގައި ވުލްވްސް އަތުން މޮޅުވެ، ޓޮޓެންހަމަށް މި އަހަރު ލީގުގައި ފުރަތަމަ މޮޅު ހޯދައިދިނެވެ. އަދި، ރޭ ކުޅުނު މެޗުގައި ވިލާ އަތުން އެ ޓީމުގެ ދަނޑުގައި މޮޅުވެ، ޓޮޓެންހަމް އިން ވަނީ ރެލިގޭޝަނާ ޕޮއިންޓެއް ދުރަށް ޖެހިލައިފަ އެވެ. އެ ގޮތުން، ވެސްޓް ހޭމް ޔުނައިޓެޑް މި ހަފްތާގައި ކުޅުނު މެޗުން ބްރެންޓްފޯޑް އަތުން ބަލިވުމުގެ ފައިދާނަގައި، ޓޮޓެންހަމުން ވަނީ ލީގުގެ 17 އަށް ޖެހިލައިފަ އެވެ.
ލީގުގެ 18 ވަނައިގައި ވެސްޓް ހޭމް އޮތީ 35 މެޗުން 36 ޕޮއިންޓާ އެކު އެވެ. ލީގުގެ 17 އަށް ޖެހިލި ޓޮޓެންހަމް އަށް 35 މެޗުން ވަނީ 37 ޕޮއިންޓް ލިބިފަ އެވެ.
ވިލާ ޕާކުގައި ރޭ ކުޅުނު މެޗުގައި ޓޮޓެންހަމް އިން ފުރަތަމަ ހާފު ނިންމާލީ ދެ ގޯލުގެ ލީޑެއްގަ އެވެ. މިއީ، މިދިޔަ އަހަރުގެ ޑިސެމްބަރު މަހުގެ ފަހުން ލީގު މެޗެއްގައި ޓޮޓެންހަމް އިން ދެ ގޯލުގެ ލީޑެއް ނެގި ފުރަތަމަ ފަހަރެވެ. އެ ގޮތުން، މެޗު ފަށައިގެން 12 ވަނަ މިނިޓްގައި ޓޮޓެންހަމް އިން ލީޑުނެގީ، އޭރިއާބޭރުން ގޯލުގެ ތިރީ ކަނަށް ބޯޅަ އަމާޒުކޮށްލައިގެން ކޮނާ ގެލަގާ ޖެހި ގޯލުންނެވެ. އަދި، މެޗުގެ 25 ވަނަ މިނިޓްގައި މަތީސް ޓެލް ނެގި ހުރަހަކުން އޭރިއާތެެެރެއިން ބޮލުން ގޯލަށް ބޯޅަ ފޮނުވާލައިގެން، ރިޗާލިސަން ވަނީ މި ފަހަރު ލީގުގައި އޭނާގެ 10 ވަނަ ގޯލާ އެކު، ޓޮޓެންހަމް އަށް ލީޑުފުޅާކޮށްދީފަ އެވެ.
މި ހަފްތާގައި ޔޫރޮޕާ ލީގުގެ ސެމީ ފައިނަލް ދެ ވަނަ ލެގު އޮތުމުން، ފުރަތަމަ އެގާރައިގައި އާންމުކޮށް ކުޅޭ ގިނަ ކުޅުންތެރިން ނުލައި ރޭގެ މެޗު ފެށި ވިލާ އިން ދެ ވަނަ ހާފުގައި ބަދަލުތަކެއް ގެނެސް އެޓޭކްތަކެއް ކުރި އެވެ. އެކަމަކު، އެ ޓީމަށް ގޯލެއް ޖެހޭގޮތްވީ މެޗުގެ އިތުރު ވަގުތުގެ ތެރޭގަ އެވެ. މި ލަނޑު ޖެހީ، ބަދަލަކަށް ކުޅެން އެރި އެމީ ބުއެންޑީއާ އެވެ.
ރޭގެ މެޗުން ޕޮއިންޓެއް ހޯދައިގެން ވިލާ އަށް ލީގުގެ ހަތަރަކަށް އެރުމުގެ ފުރުސަތު އޮތެވެ. އެކަމަކު، ބަލިވުމުން ވިލާ އޮތީ ލީގުގެ ފަސް ވަނައިގަ އެވެ. އެއީ، 35 މެޗުން 58 ޕޮއިންޓް ހޯދައިގެންނެވެ.
